الموضوع: سؤال للسادة هواة صيد الاسماك

هواية صيد السمك جميلة جداا بس بتحتاج للصبر
و بما انه لسه مبتدأ فملهاش لازمة يجيب مكن
يخلي المكن ان شاء الله لما ياخد ع الصيد و يبتدي يبعد عن الشاطئ و حيتانه

الادوات اللي هيحتاجها كلآتي :

- بوص يد
و لما يشتريها يقول الراجل عايز بوصة يد و يجيب حاجة في حدود 3- 4 متر و هي عبارة عن بوصة بتتفتح و تتقفل مكونة من 3-4 عقل ع حسب يعني
و ديه هتعملها في حدود 30 جنيه تزيد او تقل 5 جنيه

- بكر خيط
يقول الراجل عايز بكرة خيط عادية و يقول الراجل انه لسه مبتدأ و هيصطاد من ع الشاطئ
الراجل غالبا هيديله حاجة تشيل لحد 3-5 كيلو
و ديه هتكون في حدود 4-7 جنيه

- فل \ عوامات \ غمازات
كلها اسماء لحاجة واحدة و يجيب منها كام واحدة لأن الصنارة لو شبكت احتمال كبيرة ان الخيط يتقطع
و ديه اسعارها بسيطة 50 قرش - جنيه - 1 و نص يعني في الحدود ديه
و الغمازات ديه وظيفتها انها تحدد عمق الخيط يعني لو رفعها لفوق العمق بيزيد نزلها تحت العمق بيقل
و في نفس الوقت لو سمكة اكلت الطعم هيلاقي الغمازة بتنزل في المية و تطلع كأنها بتغمز

- تقلات \ رصاص
و ده اللي بيخليكي تقدري ترمي الخيط و هو عبارة عن تقلات رصاص صغيرة
و لما يشتري خليه يجيب المقاس الصغير اللي بيبقي زي الخرز بتاع المسدسات اللعبة بس ع اكبر حاجة بسيطة
و يده برده مش هتزيد عن 5 جنيه مجموعة في كيس او علبة

- سنون
يجيب مقاس متوسط قد عقلة الصباع في الطول و ده ع ما اتذكر مقاس 5
و ده برده سعرها بسيط في حدود 5 جنيه و بيبقوا حبة حلوين في العلبة او الكيس

- الطعم
طبعا الطعم بيتنوع
دود - عجين - ريم - طعم صناعي
و هنا طعم نيلي فهو يخليه في الدود و العجين

الدود هيلاقي عند محلات الصيد و هو عبارة عن دود احمر غامق صغيرة اللي هي دودة الارض بيحطه في السن و السمك بيجري عليه جري ههههههههه و مش عارف بصراحة اسعاره ايه دلوقتي لأني كنت بربيه للصيد في قصرية زرع او استخدم عجين بس هيبقي في حدود الــ5 جنيه برده

النوع التاني العجين و ده يا اما بتروح للفرن تقوله عايز بــ2 جنيه عجينة
او يعملها في البيت
اسهل طريقتين العجينة الباردة و ديه عبارة عن كوباية دقيق و معلقة زيت و معلقة سكر و يتخلطوا كلهم ببعض و يتعجنوا بالمية لحد ما تبقي عجينة جاهزة
ياما يجيب رغيش بلدي و بشوية مية و يتعجن لحد ما يبقي عجينة
بس مشكلة العجين لما بينزل المية بيدوب
فممكن يجيب قطن خشن شوية و يتخلط مع العجينة و هي بتتعمل هيخليها تمسك كويس في المية

كده مش ناقص غير تجهيز الصنارة

هيجيب البوصة و يفردها ع اخرها و يجيب خيط و يربطه في التلبيسة اللي فوق
و يقطع الخيط في طول البوصة بالظبط يعني لو البوصة 3 متر يقطع الخيط 3 متر

و بعدين يدخل الفل\ الغمازة في الخيط و يزنقها بحتة خشبة كبريت او خلة اسنان

و بعدين يدخل التقالة\ الرصاص لو اللي عامل زي البلي الصغير يدخل اتنين ورا بعض و بعدين يلف الخيط و يدخله تاني و يطلع التقلات لفوق تكون قريبة من الفل \ الغمازة
و بعدين يجيب السن و يربطه في اخر الخيط
كده الصنارة بقت جاهزة

يجيب الطعم لو دود يمسك الدودة كويس لأنها هتبقي عايز تنط و يدخل السن من راسها لحد ما يغطي السن كله و ميبقاش باين
لو العجين يعملها زي كورة صغيرة و يبططها و يحطها في السن و يدوس عليها عشان تمسك

و يسمي و يرمي ابعد ما يقدر عن الشاطئ عشان الصنارة متشبكش في الصخور

و يفضل مستني لحد ام يحس ان السمك اكلت الطعم و شبكت و ديه بتيجي مع الوقت بالاحساس و شوف الغمازة غمزت في المية
يشد الصنارة لفوق ربع شدة زي ما كنا بنشد الطيارة و احنا صغيرين عشان تعلي في السما اكتر و ده عشان لو السمكه اكلت الطعم السن يمسك فيها و متهربش
و بعدين نطلع

طبعا في الأول ممكن السمك يطلع ناصحو ياكل الطعم و يهرب او يطلع في الأول حيتان من بتوع الشاطئ وممكن تلاقي زرع و قبل كده طلع معايا فردة كوتشي اسود ههههههههه
فميقلقش

و ان شاء الله لما تطلع سمكة معاه يمسكها من بين الخياشيم و البطن كويسة و يضغط عليها بالابهام و السبابة و يطلعها من السن و يفضل ماسكها لحد ما يحطها في مكان امين لأنها هتبقي عايز تنط برده

نقطة اخيرة لو الصنارة شبكت يحاول ميتعفاش عليها عشان ميكسرش البوصة

فيه بقي شوية اداوت اضافية
- سكينة صغيرة او مقص عشان تقطع الخيط او لو الصنارة شبكت و مفيهاش امل تسلك تقطع
انا عن نفسي قبل كده نزل سلكتها بس كانت المية لحد تحت الركبة هههههههه و الناس كلها اتفرجت ع المجنون اللي نازل بيشيل الصخر و يسلك صنارته ههههه
- طبعا كاب عشان الشمس
- ايس بوكس صغير عشان المشروبات و تحط فيها السمك عشان ميعفنش في الشمس و الحر
- لو مش هيستعمل جوانتي يبقي مية و صابونة عشان غسيل الايد بعد الصيد


و اي استفسار اتفضلي

بالنسبة محلات ادوات الصيد حضرتك تتبعوا منطقة ايه ؟؟ عشان اقولك ع اقرب واحد

معلش نسيت اضيف دول
و ديه صورة ع برنامج بينت ع ادي هتبين تجهيز الصنارة بيبقي عامل ازاي




و ديه طريقة لربط السن بسيطة