الموضوع: سؤال للسادة هواة صيد الاسماك

لو قريبة من الجيزة ممكن ابنك يطلع معايا اعرفه الدنيا ماشية ازاى
ممكن يجى معايا ادوار قريبة
المنيل
كوبرى الجامعة
كوبرى 15 مايو
الزمالك
ماسبيرو
لكن ساعات بروح حتت بعيدة زى المناشى او جرزا او القناطر او الودى
و كمان اروح معاه لمحل ادوات الصيد عشان الراجل ممكن يخمه لانهم لما بيلاقوا واحد مش فاهم او لسة جديد بيشتغلوه و يبيعله من البضاعة اللى محدش يشتريها
و الصيد لازم ممارسة لاكتساب خبرة
هاخليه يعرف يربط السن ازاى و ازاى يعمل وش
امتى يقصر الوش و امتى يطوله
تركيب العود كله كامل مكمل من عود رقع و مكنة و شعر و غمازات و تقلات و مداور و فوسفور للصيد الليلى و كيفية وضع الطعم (دود الارض) على السن و امتى يعنكب الطعم و امتى يحد طعم على قد السن من غير عنكبة
الصيد بالغماز و الصيد بالحداف
لو ابنك بيقرف ممكن يصطاد بريم او غلة
عموما لو مستعجل و عايز يجيب الحاجات بسرعة
بروح محل لادوات الاصيد و يشترى الاتى:
عود (سنارة) 4 متر و نصف او 3 متر و نصف كبداية ( ممكن يبتدى بنوع اسمه اوكوما او دايوا ) و بعد كدة يغير عدته و يجيب حاجات تقيلة
بكرة شعر (خيط) 40 للمكنة و بكرة شعر 30 او 25 ترميل (يعنى لعمل وشوش اللى بنربط بيها السنون)
مكنة صغيرة فى مكنة اسمها sl 500 كويسة و مش غالية بحوالى 20 جنيه تقريبا
غمازات صغيرة
2 جنيه تقلات صغيرة او مناسبة لحجم الغماز
2 جنيه مداور
علبة سنون 7 ملوى مش مفتوح بحوالى خمسة جنيه
و ياريت علبة سنون 10 و يقول للراجل علبة سنون 10 515 السن دة مشكلة لما السمكة بتخش عليه خلاص السمكة دى بتاعت ابنك :)
احسن سن لصيد الحداف و لو صغير علي ابن و مش عارف يمسكة يجيب علبة سنون 9
ملحوظة : السن الـ 10 اصغر من السن الـ 7 يعنى كل ماتطلعى بالرقم السن هايصغر
طبعا لازم يطلع مع صياد يتعلم منه و يكتسب منه خبرة
طريقة وضع الطعم الصحيحة و اوقات الصيد
لو السمكة مالوش نفس ياكل ازاى يخليه ياكل ( تسخين الدور او تظفير الدور)
امتى يثبت الغماز و امتى يخليه يسرح
يقصر او يطول وش امتى
لو حاشت (شبكت) منه فى حجر ازاى يسلكها
ازاى يجيب السمكة من الميه و متروحش منه
جميع عقد الصيد و هى كتير جدا
و حاجات كتير هاتيجى مع الممارسة
و تحت امرك فى استفسار

المشاركة الأصلية كتبت بواسطة axel

:s_thum1[1]: :s_thum1[1]: :s_thum1[1]: :s_thum1[1]:

انا بنزل الزمالك و المعادي

بيس يا مان ظبط كدة و ننزل مع بعض :)

المشاركة الأصلية كتبت بواسطة mrbebo

لا بقولكم ايه فيها لخفيها ههههههههه

ياريت نصيحة بقه في عدة محترفة الى حد ما ولو اسعار يبقى فل جدا

عايز تخش على الاحتراف مرة واحدة ؟ :)
ميزانيتك فى حدود كام كدة ؟

انا معايا كذا عدة
بس لما بنزل الادوار القريبة باخد معايا اقل عدة عشان الاحجام هنا مش كبيرة
لكن فى قبلى باخد كل حاجة معايا
بالنسبة لحضرتك كل اللى فى السوق صينى بس فيه صينى كويس و قليل لما تلاقى كورى
او لو حضرتك عايز تجيب حاجة اصلية ممكن تشترى من على النت ماكنة فايكينج اصلية مع عود دايوا يابانى اصلى يبقى تمام او عود دايو كورى