ماذا لو عاد الزمان للوراء ؟هل كنت ستشتري عربيتك ؟ و لماذا؟

أنا هافرض معاك إن الزمن رجع ( بنفس ظروفه خاصة عدم وجود هوندا سستي 1300)
الزمان: من 2004 قبيل بداية العام الدراسي
أنا : بابا أنا عاوز عربية
بابا : طيب انجح ة ادخل طب و أنا هجيبلك عربية
وكمان سنة .....
أنا : بابا أنا نجحت و جبت مجموع كويس يدخلني طب فين العربية
بابا: أما تأخد الرخصة و تدخل الكلية
و يمر 3شهور .........
أنا : بابا أنا دخلت طب و جبت الرخصة فين العربية
بابا : طيب اتعلم السواقة و كمان سنة بالكتير
و تمر السنة ......
أنا : بابا عدت سنة و أنا فكرت في 3 عربيات في رنج 85.000 و هم بروتون جين تو و يارس و كيا سيراتو و أنا قررت الأخيرة
بابا : لأ و ألف لأ كوري لأ
أنا : خلاص تويوتا يارس
بابا : ماشي خذ الفلوس و روح اشتري العربية اللون إلي يعجبك
و الحمدالله جت العربية و بعد مرور شهرين ......
الشيطان:ياه لو كنت جبت البروتون دي جميلة و فيها كمليات كتير و لا سيراتو دي قوية و مكيفها حلو
أنا : تصدق عندك حق يا ريت ( و بدأ الكف يتجه نحو أخيه و يتقابلان مرارا و تكرارا)
وبعد مرور 7 شهور و افتتاح موقنا هذا .........
أنا : دي الناس بتشكر في العربية و كمان أنا شيفها حلوة جدا و تسارعها حلو و الأمان عالي و استهلاك البنزين ممتاز و التوكيل ممتاز و المكيف حلو ( اه منك يا شيطان)
الشيطان : بسس الصاج ضعيف و الثبات نص نص و قطع الغيار غالية ( السبويلر ب1000)
أنا : أيوة بس الصاج ميزة بيخاي العربية خفيفة و كمان بيسرعها و محركها القوي جدا بيساعد على كده و أما بالنسبة للثبات ده مقابل المميزات الأخرى و بعدين كفاية إنها ياباني و تكنولوجيا عالية و كمان دي أحسن عربية في فئتها و بالنسبة لقطع الغيار هترخص أما العربية تنتشر و تنزل قطع غيارها في الحرفيين
الشيطان : طيب و اللانسر
أنا : أولا هي أحلى من اللانسر 1300 أما اللانسر 1600 سبورت فهي خارج الامكانيات المادية
الشيطان : ده آخر كلام
أنا : أيوة ده أخر كلام و بعدين لو رجع الزمان هشتري نفس العربية (هوندا 1300 مش موجودة) بس أنت أخرج منها بس و هي هتحلى
فعلا القناعة كنز لا يفنى و أن تكون سعيدا هو أن تكون قنوعا :D :D :D

مش عارف يابشا بس الشيطان معاه حق المرة دي ...
الجين 2 أحلى من الياريس

معاك حق جدا في نقطة القناعة كنز لا يفنى . عدم رضا الواحد عن عربيته بيخليه يجري ورا كل عربية و يتشتت في الانواع و الاسعار و يتمنى حاجات مش في متناوله .

اقتباس:

---

الشيطان : طيب و اللانسر
أنا : أولا هي أحلى من اللانسر 1300 أما اللانسر 1600 سبورت فهي خارج الامكانيات المادية

---

فى دى يا باشا معندكش حق

اللانسر ال 1300 اعلى قيمه وامكانيات فى هذه الفئه السعريه وكمان منتشره وقطع غيار ارخص وصيانه اسهل وبيع فى ثوانى
وعموما دى اذواق اولا واخير
اهم حاجه انك تقتنع بالعربيه وتحبها

لو عاد بى الزمان كنت جبيها هى هى
بس اوتوماتيك!!

ايوه اوتوماتيك

واللى بيقول اوتوماتيك كتير على ال 1300 يبقى يا اما ماسقهاش, او متعود على عربيات غاليه زى البى ام والمرسيدس

كورولا عشق الأول والأخير

والله الموضوع واقعى جداااا

لانو بيحصل فعلا لما تيجى تشترى عربية جديدة

وبعد ماتستقر على سيارة خلاص هتشترى

تلاقى حاجة تانية احلى واغلى فى السعر

وبعدين تقول الفرق مش كبير ازود واجيبها

وبعدين تيجى تشترى تلاقى عربية احلى بسعر اعلى :lol: وهكذا

يا أخوانا أنا مش عاوز تعليقكم عن أنتم معايا و لا مع الشيطان بس أنا عاوز تجارب شخصية مع حياد كامل

السلام عليكم

لو رجع بيه الزمان كنت برضه حجيب الميجان و دا عن إقتناع تام خلال تجربة سنتين (الحمد لله على شراء هذه السيارة) .
من الأخر السيارة دى ماتخليش الواحد يفكر يجييب أى سيارة غيرها لإنها فيها كل اللى إنت عايزه بسعر منافس جدا.

لو عاد بي الزمان لما اشتريت هذه الشاهين اللعينه بس احقاقا للحق فانا طلعت عينها وعملت بيها 150الف كيلو في تلات سنوات

أنا لو الزمن كان رجع و أمامى الإختيار :

كان ممكن أوى أفكر فى الجين 2 :) بس أنا الحمد لله عارف و مقتنع إن عربيتى تكون أفضل عربية فى الفئة السعرية 70 ألف

بس كان ممكن آجى على نفسى حبة و أمد فى القسط كام شهر كمان بس الحمد لله

هو أنا وقتها كان يادوب ال 70 ألف آخرى لأن أنا مكنش عندى إستعداد أرفع فترة القسط عن 3 سنوات ده بالإضافة إلى إن القسط أنا رافعه و المقدم كان كل إللى معايا فعشان كده كانت العربية الويرا أفضل إختيار

آه أنا جالى وقت و كنت حسيت بالندم (لما الشيطان لعب معايا) بس بعد حبة و خاصة بعد ال 5000 كم الأولى إتأكدت إنى إخترت صح :)

لو عاد بي الزمان وكان تفكيري هو نفس التفكير المادي لاشتريت الاسبيرانزا مرة أخرى
أما لو عاد بي الزمان مع تغير واقعي المادي من حيث التوفير في ثمن العربية من أجل شيئ آخر مهم ما ترددت قط في شراء الأوكتافيا الألماني أو إحدى روائع هوندا (المتوسطة طبعاً)

بعد تفكير طويل و بحث فى جميع انواع السيارات و جدت الانسر احسن حاجه فى السوق كسعر و امكانيات و صناعه
فعلا هى عروس 2006 و 2007 لحد دلوقتى
االى ندمت عليه انى كنت ضغطت نفسى و جبتها اوتوماتيك
لكن الحمد لله المانيوال برضه جامده و مبتزهقش

يا استاذ
memo_hefnawy

تقدر تقولى لو سمحت ايه مميزات الويرا اللى مخلياك معتز بيها كده
اصل انا معايا نفس المبلغ و بالقسط طبعا اساسى
و ماعرفش حد جاب الويرا علشان يكلمنى عنها

مع نفس الإمكانيات المادية أنا كنت و مازلت مقتنع تماماً أن الواجا أفضل سيارة في قئة ال90 ألف.

لو زادت الإمكانيات دلوقتي مش حغير لكن لو رجع بيا الزمن حقول بالترتيب من الأرخص للأغلي

1 سوبارو امبريزا أوتوماتيك فول أوبشن و بكبود الWRX
2 هوندا سيفيك 2007
3 سيتروين C4 Coupe SunRoof
4 بيجو 307 SW فول أوبشن.
5 جيتا
6 دودج تشارجر 6.1 SRT8

أكتر من كده ماليش طموح :)

يا أستاذ محسن كلنا بنحلم و أنا مثلا بحلم بالمرسيدس M-CLASS و BMW525 و يا رب

اعفن جيب شيروكي الاقيها علشان اخخش في اي سواق غبي بقلب مطمئن

مع الاحتفاظ بالميجان طبعا

اشتريت نفس سيارتي العزيزة - الاسبوع الماضي عملت لها صيانه (تنظيف كربيراتير + قطع غيار + بقشيش) ب 20 جنيه مصري - اتحدى احد في هذا المنتدى يدفع هذا المبلغ في صيانه سيارته -
مع سلاماتي و تحياتي

دايما اول ما بتشتري العربيه تاني يوم يجيلك كل الناس اللي تعرفهم واللي متعرفهمش يقوللك ان في واحد لسه بايع عربيه زي بتاعتك اواحسن وارخص
لكن الواحد يحمد ربنا وانا بحب عربيتي و اكيد كنت هشتريها

مش عارف
سؤال صعب ؟؟؟

بس انا لما عربيتي اتسرقت
قولت
يا لانسر
يا جين2 تاني
يا ماتيرا (بس مش مفتنع بيها خالص )

فكان الموضوع منحصر بين عربيتي وبي اللانسر
ودي فيها حاجات بيعوضوا بعض يعني مقدرس اقول عربيتي احسن او اللانسر احسن
بس اعتقد وقتها بعد السرقة كنت كدة كدة حاجيب لانسر
لاني حتكون جاتلي حالة من الارف والزهق
من الجين 2
لكن الان جين 2 جين 2 جين2
بلا تردد
حتي لو ضاعت تاني :mrgreen: :mrgreen:
مع احترامي للانسر

وكلة في الاول والاخر نصيب 8)

لو مكنتش جبت ماتريكس مانيوال
اكيد كنت هادور على حاجة احسن بنفس السعر
ماتريكس مثلا
مفيش حاجة ب77500 فيها مميزات شبه الماتريكس


ربنا يجعل كلامنا خفيف على شباب الوزة

منغير مانرجع بالزمن لورا
لكن لو هتكون العربيه جديده أكيد هفكر كتير قبل ما اقرر لوجود تقارب فى الأسعار و الأمكانيات و كل سنه بتنزل عربيه جديده بموديل جديد
و الأستقرار على رأى صعب فى الحاله دى
لكن لو هشترى عربيه مستعمله
هتكون الفولفو طبعآآآآآآآآآآآآآآآآآآآآآآ آآآآآآآآآآآآآآآآآآآآآآآآآ آآآآآآآآآآآآآآآآآآآآآآآآآ آآآآآ
مع انى بتخنق منها كتير و ممله فى المشاوير داخل البلد لكن تحفه على الطرق السريعه
لكن عربيه أصيله و بتستحمل كتيييييييييييييييييييير

انا عن نفسي كنت هجيب نفس العربيه ولكن كنت ممكمن اشتريها من الخارج الدفع الرباعي بتاعها الرياضية

وممكن كنت لو استنيت شويه كنت اشتريت الماتيريا ولكن السيريون حلاوتها ان ادائها رياضي شويه عن الماتيريا ولكن برضه الماتيريا ماتور 1500 سي سي اعلى شويه

ولو شويه حبتين كنت تركت دايهاتسوا واشتريت الهوندا السيفيك الجديه بصراحه والله تحفه .......... انا لما ركبتها بصراحه مكنتش مصدق ان العربيه سعرها كده .

لو الزمن رجع لحد امتى بالضبط؟؟
لحد ما كنت بشترى العربية؟ هشتريها هى هى بس كنت هجيبها سودة...

انما لو كان معايا أكتر بصراحة كنت اشتريت كورولا أو هوندا .

لو الزمن رجع كنت هجيب برده نفس العربية لأنها كنات احسن أختيار بالنسبة ليا فى السعر بتاع 70 ألف
بس كان ممكن يكون فى شوية تردد علشان موضوع ان العربية واطيه على الارض وبتحط كتير فى المطبات

اقتباس:

---

المشاركة الأصلية كتبت بواسطة FANTOMASS

اشتريت نفس سيارتي العزيزة - الاسبوع الماضي عملت لها صيانه (تنظيف كربيراتير + قطع غيار + بقشيش) ب 20 جنيه مصري - اتحدى احد في هذا المنتدى يدفع هذا المبلغ في صيانه سيارته -
مع سلاماتي و تحياتي

---

ربنا بياركلك فيها ويكرمك ان شاء الله بمرسيدس
ال 127 اللى معاك دى احسن عربيه فى مصر طبقآ لمبدأ Value-for-the money

العربيه دى كانت معانا 13 سنه اتعلمنا عليها انا واخواتى ووالدتى وبهدلناها وفى الأخر اتباعت سنه 97 ب 11 الف !!
والله بكيت لما المشترى جه واخدها!!

عربيه اصيله

لو لم اكن من المقيمين في الهوندا سيتي
لتمنيت الطيران علي متن الهوندا سيفيك

طبعا أنا بقى مثال حى للوفاء للويرا فلثد بعت مو 2000 وإشتريت 2004 وبعت 2004 وإشتريت 2005 وناوى أأعد أغير فيها إلى أن يبطلوا يصنعوعا فعامل السعر مخلينى ماخرجش بعيد عنها لانها فى رنج ال50000 طيب لما تبيع وتيجى تشترى نفس الإمكانيات هتكون فى حدود ال70000 اللآنسر

لو عاد بى الزمان ثلاثة شهور للوراء

لاحترت بين الأوبترا والإلانترا واللانسر والكورولا والصنى والماتريكس كما كنت فى ذلك الوقت

ولحذفت الأوبترا و إلانترا بسبب تجربة سيارات يابانى وكورى من نفس الفئة عمرها عشرة سنوات واحساسى بالفرق

وسأحذف الماتريكس بناء على عدم اقتناع السيدة زوجتى بشلكها (مع انى بحب شكلها)

وسأحذف الكورولا للمبالغة بشدة فى سعرها بدون داعى

وتبقى المنافسة الاخيرة بين اللانسر والصنى واللى تعبت فيها جدا محاولا الإختيار بين لانسر 1300 مانيوال او لانسر 1300 اوتوماتيك او صانى 1600 اوتوماتيك او لانسر 100 اوتوماتيك

اولا انا كنت رافض فكرة اللنسر الخليجى علشان قصة الضمان والاوراق وعلشان انا بحب اشترى من الموزع ومش بحب وجع القلب

وكما تم استثناء كل اللنسر الخليجى، تم استثناء اللنسر المانيوال لانى كنت عايز اوتوماتيك، وتم استثانء اللانسر 1300 اوتوماتيك لأحساسى وعن تجربة ان الأوتوماتيك قليل عليه محرك ميتسوبيشى 1300
وبقيت الصنى واللانسر 1600 اوتوماتيك، وبعد بحث طويل جدا تم استبعاد الانسر لأنى لم اجد فروق جوهرية عن الصنى تبرر ال11000 جنيه الفرق (الى جانب ان الصنى فيها كاسيت وانذار فابريكة مش موجودين فى اللانسر)، خصوصا وانى غير مصاب بعقدة الخواجة، وهكذا استقريت على الصنى

وبالتالى لو رجع الزمان اعتقد انى هختار نفس الإختيار، والحمد لله الأيام والتجربة مكسفتنيش

لورجع بي الزمن للوراء ماكنش أخذت قرار شراء السيارة الدايو المستعملة إلى معايا .كنت أستنيت لغاية ماإدخر مبلغ دايو أوفرنا زيرو وجبتها .نصيحة لكل واحد مفدم عل شراء سيارة مستعملة لو الفرق بين الجديد والمستعمل مش كتير .أزنق نفسك وهات الجديد فوراً.

أنا معاك و عندي قصص كتيير المجال لا يتسع لها الأن لكن هيجي وقتها