ممكن من الاخوة مساعدة فى اختيار التيريوس 2000

السلام عليكم و رحمة الله

اخوانى ممكن حد يكون مجرب التيريوس او عارف معلومات عنها ينصحنى لوجه الله اولا بعيوبها و مميزاتها

هى قدامى عربية 1300cc موديل 2000 و حالتها الظاهرية ممتازة و اوتوماتيك
و عايزين الصراحة الاختيار صعب اوى

و جزاكم الله كل الخير

ابعد عنها
عربيه اعطالها كتير و ثباتها وحش .
شوف عاوز تدفع في حدود كام و ايه اللي انت عاوزه من العربيه و نفكر معاك لحد ما نوصل للاختيار المثالي :)

ربنا يبارك فيك يا أخ حازم
والله انا انبهرت بالعربية لأن حالتها حلوة اوى و مش ماشية كتير و عالية
و الأهم انها مع ناس معرفة و ثقة و انا معايا فيليشيا 97 و حضرتك عارف مفيهاش امكانيات
و التريوس معروضة عليا ب 45 لف و انا لما بدور على حدود اسعارها الاقي مطلوب فيها خمسينات

بس الحمد لله انى استشرت ناس زى حضراتكم

و انا منتظر النصيحة العيوب و المميزات

و الله المستعان

بلاش الموديل القديم
مشاكله كتير
وثباته وحش

ايه ي جاعه مشاكل ايه
التيريوس القديمه مشكلتها في الثبات فقط غير كده مفيش
وبعدين ده سعر حلو لو العربيه حالتها حلوه زي ما بيقول اخونا

وبرضه هناك اختيارات تانيه بس مش بـ 45 الف

يا ابو عبد الله
زي ما انت قولت ثباتها وحش و الواحد مش كل يوم بيجيب عربيه .
غير كده كانت مع ناس صحابي عربيتين و مطلعين عنيهم و اعطال بايخه كده مالهاش لازمه.
غير كده سوقها واقف و لا بتتباع و لا بتتشري.
......................
بص يا استاذ ايهاب
ال 45 الف
ممكن باقل من كده 6 او 7 الاف تجيب اكسيل 98 فول اوبشن مانيوال 1500
عربيه وسعه و مافيهاش مشاكل و قطع غارها رخيصه و استهلاك البنزين قليل و ممكن تستعمل معاها بنزين 80 كمان مش حتقول لاء و عن تجربه .
انا عن نفسي بحب لما اركب عربيه اركب عربيه تريحني مش كل يوم اقف بيها عند صنايعي شكل و كل ما احتاج قطع غيار الف عليها الكره الارضيه و بطبيعه الحال حتبقي غاليه.
و الاهم من كلامنا كله استخير ربنا و اللي فيه الخير ربنا حيقدمه

ابعد عنها احسن

ده غير ان العربيات المستعملة بيتلعب فى عدادها, فمتفتكرش انها ممكن تكون ماشية قليل فعلا

ربنا يبارك فيكوا يا اخوانا
والله كلامكم لازم احترمه و متشكر جدا ع النصيحة
سبحان الله البيعة من نفسها وقفت كدة و ما حصلش نصيب
بس الحيرة لسة موجودة عشان انا دلوقت بدور وسط كوم قش
اولا لسة مش محدد لانوس مثلا و لا اكسيل زى اخويا حازم ما نصحنى

و لو المبلغ فى حدود 50 - 55 الف ايه حتكون افضل الخيارات اللى قدامى
انا مش غاوى السرعة ( ىبجيب ال 120 بالعافية ) و مشاويرى كلها جوة البلد و عاوز عربية عائلية سيدان و طبعا عارفين بند استهلاك البنزين مع الاسعار الجديدة.

50 او 55 الف يبقى حاجه من اتنين
لا كورولا عيون وانا افضلها لا لانسر كريستالة

لو عاوز زيروا يبقى بيكانتو أوبرودا كيليسا