إشرب يا مجلس ...تعليق الدراسة في 5 كليات بجامعة عين شمس ... منقول
أحد فيديوهات مسيرة اليوم للمطالبة برحيل القيادات الجامعية ..
[youtube]http://www.youtube.com/watch?v=9zJHtpUeBM4&feature=youtu.be[/youtube]
للأسف مش المجلس اللي هايشرب .. لكن مصر كلها اللي هاتشرب .....
والكلام ده كان معروف وواضح للجميع من شهور ....
لإن من البديهيات إن الثورة قامت للقضاء على الفساد ...
فلما نلاقي مؤسسة زي الجامعات كلها بدون إستثناء .. مازالت على قديمة .. وكل القيادات الفاسدة التي أختارها جهاز أمن الدولة لإحكام سيطرتهم على شباب الجامعات وقتل الطموح لديهم مازالت على كراسيها ... وتحجج المجلس منذ شهور ماضية بغنه لا يستطيع أن يغير القايدات دي في نهاية العام الدراسي ... وإن شاء الله في العام الجديد كل شيء هايتصلح ..... وكالمعتاد ... قام مجلس الفلول بعمل عكس ما تمناه الناس وقال لمصر كلها " طظ فيكم " الناس دي قاعدة على قلبكم ... واللي مش عاجبه يشرب من البحر ... يبقى ماذا نتوقع مع بداية العام الدراسي اللي بدأ أمس ؟؟؟؟؟؟؟؟؟
وهل تعلمون إن في عناصر من أمن الدولة - انا شايف انها لسه ما أتغيرتش حتى لو غيروا الإسم للأمن الوطني أو الامن الغذائي - نزلت امبارح على سبيل المثال في مقر جامعة عين شمس .. ومن فوق المباني زي القناصة كده صوروا بالزووم ان كل القيادات الجامعية سواء طلاب أو أطقم تدريس التي تقود المظاهرات ضد الفساد ..... طبعاً كلنا عارفين ليه
ولما تقوم تظاهرات من قبل الدارسة من أطقم التدريس تعترض على الظلم الفاحش والفًجر اللي موجود في الجامعات وتقول مش هانقبل بما كان مفروض علينا في عهد الظالم المجحوم مبارك ...
تصوروا الفرق الرهيب بين مرتب أستاذ مساعد في هندسة عين شمس ... طلع عين اللي جابوه في الأبحاث والدراسات والدرجات العلمية و وو و و و لأكثر من 10 سنوات ... كل ده وبياخد الفين ملطوش أخر كل شهر .... في حين إن عميد الكلية بياخد ما لا يقل عن 70 الف ج ... بدل ولاء يا فندم .. عشان يكتب تقارير أمنية كويس في زملاءه وفي الطلبة أصحاب النشاط السياسي أو الديني أو اللي بيصلوا في جامع الكلية حتى ..
والبيج بوص رئيس الجامعة ده بيعدي الربع مليون جنيه شهرياً ... ده بدل ولاء وسناء وهناء والعز كله
مين متذكر طرد الطالبات المنقبات من سكن الجامعة العام الماضي ورميهم في الشارع لمجرد إنها منتقبة ده كان بيحدث حتى العام السابق؟
مين فاكر زوارالفجر اللي بييجيوا في سكن الجامعة يقبضوا على طلاب الأخوان .. لا لشيء سوا إنهم يقولون ربنا الله ... واللي ما بيقبضوش عليه بيرموه في الشارع ويروح يسكن في أي داهيه ؟
حسبنا الله ونعم الوكيل
ومقابل ده كله .. بعيني دي .. كنت بأشوف الجامعة بتتردم لافتات تأييد للسيد الرئيس الأخ القائد المفدى مبارك كل شويه مدعومه من السيد العميد والسيد رئيس الجامعة .. اللي بعد التطور الطبيعي للحاجة الساقعة بقوا كلهم أعضاء في لجنة السياسات ... ومع هيبتهم ووقارهم .. كنت باشوف الواحد فيهم بيبقى هاين عليه يوطي يبوس على إيد جمال بيه ... وهو يمكن قد عياله .... وللاسف الاقي منهم أساتذتي اللي الواحد كان بيخاف يسلم عليهم ولهم في قلبة مهابه علمية وأحترام أثناء فترة الدراسة .. الاقيهم بقوا أعضاء في لجان تقييم بيع شركات القطاع العام .. وأشوفه بمنتهى الفجور يطلع يتكلم كلام على التليفزيون عكس اللي علموه لنا ويقول مثلاً : أيوه عُمر أفندي ما يسواش أكتر من 400 مليون بـال 80 فرع بتوعه بأصوله الثابته .. بمخازنه .. بأسطول سياراته .. إلخ ... أصل إحنا يا جماعة بنقيم شركة خسرانة ( عُمرها ما كانت خسرانه منذ أنشاءها ) .... ولما يتسأل .. بس يا دكتور الأرض الموجود عليها المشروع ده لوحدها تساوي أضعاف أضعاف المبلغ ده ؟ يرد ويقول دكتور المحترم ؟ لأ إحنا لم نُقيم الأرض لأننا مش بنبيع حتة ارض مباني
إخص عليك ... إخص عليك ياللي بتبيع علمك وشرفك عشان عمولة أو عشان تترقى تاني يوم وتبقى عميد الكلية أو نائب رئيس الجامعة وتقف تلحس حذاء سيدك جمال مبارك وتقول له : أنا خدام الجزم يا سيدي .. أهم حاجه رضاك عني ...
أما رفع شعار إن مافيش سياسة في الجامعة والجامعة عشان الدراسة والكانتين وبس .... فكانت طبعاً لا تنطبق على جميعة المستقبل - الأسود - فاكرينها ؟ اللي مبارك قدم بها إبنه للشعب من خلالها .. على أساس إنه شاب روش وقريب من شباب الجامعات .. وأهو مرمي في السجن إلى غير رجعه ... وكان لها مقرات داخل الجامعات المختلفة
وإذا كان المجحوم أصبح ماضي كريه لنا جميعاً وكنا نعرف تصرفاته وسلوكه المُشين ..
فما حجة المجلس العسكري اللي بيضحك علينا وبيقول إنه بيحمي الثورة ... ما حجته في الأبقاء على مثل تلك الوجوه الكريهة وفرضها علينا ؟
ولماذا يُصرون على دفع البلاد إلى حافة الهاوية في كل الأمور ؟
وإذا كان الأطباء في إضراب .. والمدرسين في إضراب .... وسائقي النقل في إضراب ... والجامعات في إضراب ..؟ إذن لمن يستمع المجلس العسكري وتابعه مجلس الوزراء ؟
ومتى يتحركون لوضع حلول لتلك المشكلات ؟...
للمرة الالف ... تذكروا كلامي هذا وأرجو أن يُخيب الله ظني .... هناك فئة وحيدة مغلوب على أمرها لم تضر بمصر حتى الان .. ومستحملة غُلب من عشرات السنين ... وعاملة زي الشعب المصري صابره وساكته ... وعددهم بالملايين ... الفئة دي لو تحركت ونزلت الشارع في إضرابات أو إمتناع عن العمل أو أو او ... يبقى قول على البلد يالله السلامة وأستغفر الله العظيم سوف نذهب حيث اللاعودة ... واعني هنا فئة " الفلاحين " اللي شايلين الطين وساكتين .... ومع ذلك لا يجد إنسان محترم يتجاوب معهم ويحل لهم مشاكلهم قبل أن يسبق السيف العذل .....
