عرض للطباعة
عربيه عامله حادث ومخبوط الجانب الشمال كله سكودا فابيا الراجل عارضها عليا 34
دلوقتي العربيه عايزه فرش ابواب (ضروري)
وتابلوه (مش ضروري)
وهو عمل سمكره ودهان واستعدلها وبقيت زي الفل (كويسه مش ممتازه يعني شغل علي قده)
بس مش عارف اركب عربيه عامله حادث ولا لا
نسيت اقول الخبطه في الكارتيره اللي قدام من ناحيه الشمال (ناحيه السائق)
الكارتيره كانت مدمره وهو استعدلها
بلاش منها ... على كلامك محتاج تعيد الشغل في الأساسيات من الأول
بالإضافة إن حسب معلوماتي فابيا ليها قطع غيار أغلى من أوكتافيا ...
حضرتك مقولتش ايه العربيه والموديل والمواصفات
بس عموما ابعد عن عربيه وخده حادثه بالمنظر ده لان الكارتيره ممكن متبقاش معدوله زي الناس
وتعاني انت من حدفه كاوتش بيبوز عفشه بتبوز بسرعه وكمان العزل بتاع العربيه مش هيرجع زي الاول
العربية موديل كام ؟
وهل رش في الدواخل ولا لا
ولو مش فارقة معاك تركب عربية زي كدة يبقى تخلى بالك من السعر كويس جداا ، لان ممكن تكتشف بعد ما تشترى ان انضحك عليك
العربيات اللى راشة جوة سعرها بينزل جامد جدا خصوصا الموديلات الحديثة
لازم تعرف سعرها الحقيقى بالحالة دى في السوق الاول
وتتأكد من حالة الشاسيه والعفشة
فابيا 2001 ومسئلتش راشه جوه ولا لا
هي تكييف وباور وزجاج كهرباء
ومشيت بيها مشوار بتاع ربع ساعه العربيه حاسس انها فايقه شويه مش تعبانه سحبها كويس
بس برضه حاسس الموتور في سحبته عايز اتتك عليه في الاول يعني رجلي كانت تقيله في البنزين (بس احنا عندنا ازمه وهي كان فيها 80)
بس بعد كده مشيت حلاوه
هو انا حاسس انه ممكن ينزل باكو كمان
لو فيه حد منكم يكون عنده ياهو ياريت ندردش مع بعض لاني بجد نفسي حد يفهمني اعمل ايه خصوصا اني معلوماتي صفر لاني مش بتعامل مع صنايعيه خالص
حتي في العربيات بتاعتنا اللي بيوديها السواقين
انا بحسبها فابيا الجديدة
لا طبعا 34 كتير
والخبطة جااااااااااااامدة طالما جت في الكرتيرة والقاايم
طيب وجهه نظرك اوصل لكام معاه خصوصا انها ست مش راجل
ودماغها ناشفه شويتين (لانها صارفه عليها كتير)
اه صحيح نسيت اقول انها 1400 مش 1000
هتتعب اوي في قطع الغيار بتاعتها
و انت عليك ايه بوجع الدماغ ده يعني متبهدله من بره و رشه و الله اعلم في ايه من جوه ده غير ان بتقول بتمشي ب بنزين 80 يعني بقالها بتاع 10 سنين ب 80 زمان الموتور اتهلك.
عايز راى بصراحة بلاش منها خالص و دور على عربية تانية احسن و ابعد عن العربيات اللى عاملة حوادث
العربيه لو تم إستعدالها غلط...حتبقي صاحبة عاهه مستديمه مش حينفع تعدلها بعد كده مهما عملت...وبعدين هيه دماغها ناشفه علي ايه ؟؟ هيه عربيه زيرو وفبريكه علشان تعمل كل ده ؟؟ وبعدين مش معني انها صرفت عليها يبقي تحملها للزبون......الحادثه هيه إلي عملتها والمفروض تدفع تمنها الزبون ملهوش دعوه يدفع لها إلي دفعته في التصليح
فكك منها أحسن....الفابيا موجوده كتيييييير.....فكك
بلاش عربيه عمله حادثه
بلاش ابدا منها لو جبت لانوس راشة و طالع عنيها بس سليمة ب 34 انتا الكسبان
بعد موصلنا 28 الف فشكلنا البيعه لان العربيه مقلوبه ومتسمكره علي اساس انها خبطه بس لاكن العربيه مقلوبه وكل بيبانها فيها فروق حتي الزجاج الامامي
علشان كدة قلتلك اتاكد
الحمد لله انك طلعت منها
العربيات الحوادث دى سكك وحوارات بجد
ومهما عملت ناصح ممكن ينضحك عليك اسهل مما تتخيل