الموضوع: نور العربيه الواطى والكاسيت بينور لما ادوس فرامل

المشاركة الأصلية كتبت بواسطة tarek_2005

مع احترامي التام لكلامك فكلامك غير صحيح لان اللمبة الي 2 بول لا تركب مكان اللمبة ال 1 بول والعكس صحيح لان اللمبة ال 1 بول البنزين الجانبيان بتوعها في مستوي واحد ولكن اللمبة ال 2 بول البنزين واحد اعلي من الثاني ودا علشان تحديد الفتيلة العالية من الفتيلة الواطية حتي تكون العالية للفرامل والواطية لنور الموضع ولا تركب بالعكس الا لو بوظت الدواية وركبتها بعنف

انا مجربها بنفسى يافندم :) :)
عندى لمبة بتنور مع السلانسيه بس لكن مابتنورش مع الفرامل وماكنتش اعرف ان فيه حاجة اسمها لمبة عادية ولمبة 2 بول، رحت واخد لمبة من فانوس عربية قديمة مرمى عندنا وركبتها مكان اللمبة الاتنين بول وكل مادوس فرامل كانت العربية كلها تنور هههههه
فعرفت ان القفلة دى من اللمبة الجديدة وبعد التفحيص والتمحيص عرفت السبب وهحاول اوضحه لحضرتك على قد ماقدر
اولا اللمبة العادية بتاعة العربيات القديمة بتركب مكان اللمبة ال2 بول عادى خالص مافيهاش مشكلة...مركبها بايدى
اللمبة ال2 بول داخلها كهربة من تلت نقط... نقطة من المسمار(معرفش دا السالب ولا الموجب بس هانقول عليه افتراضا السالب) ونقطتين داخلين للمبة (من تحت) كل نقطة لبول فى اللمبة وهانفترض ان دول الموجب
دلوقتى نورالسلانسيه والفرامل مشتركين فى السالب ومنفصلين فى الموجب
ولما نور السلانسيه يشتغل النقطة الموجب اللى تبع السلانسيه هى اللى بيجيلها كهربة فبتنور الفتيل الخاص بيها
وحضرتك اكيد عارف الحاجات دى اكتر منى لانى لسة مبتدئ وممكن اكون عاكس الاقطاب خالص :)
دلوقتى اللمبة الاتنين بول ليها نقطتين قصدير من تحت واحد بول السلانسيه والتانى بول الفرامل
المسافة مابينهم تقريبا تلت تربع سنتى وبيقابلهم فى الدواية النقطتين اللى بيدوهم الكهربا اللى بردو مابينهم ييجى تلت تربع سنتى
نيجى بقى للمبة العادية اللى ليهامن تحت نقطة قصدير واحدة فى المنتصف بالظبط واللمبة دى بتركب فى مكان اللمبة الاتنين بول مستريحة
بس لما تركب بتلمس النقطتين(بتوع السلانسيه والفرامل) اللى فى الدواية نفسهم ببعض عن طريق النقطة القصدير اللى فى اللمبة..يعنى اللمبة بتبقى كأنها الكوبرى مابينهم وبكدا بيبقى الطرفين الموجب اللى جايين للمبة ملمسين بعض وكدة كدة السالب مشترك مابينهم
فلما تدوس فرامل والنقطة الموجب القصدير بتاعة الفرامل يجيلها كهربا بتروح موصلة كهربتها للنقطة الموجب بتاعة السلانسيه عن طريق اللمبة وبكدا ينور السلانسيه بس بيبقى نور ضعيف جدااااااا
الكلام دا كله لصديقنا اللى غير لمبة عربيته وانا واثق فى الكلام دا ومجربه
اما صاحب الموضوع فلو ماغيرش اللمبة فممكن يكون فتيل من الفتيلين اتقطع وبيلمس فى التانى..بس مش واثق بقى فى التحليل دا وماعرفش هو ممكن يحصل على ارض الواقع اساسا ولا لأ
واعذرنى لو كنت قالب الاقطاب فى كلامى لانى ماعرفش بصراحة من فيهم الموجب ومين السالب واعذرنى كمان فى اسامى القطع لانى كالعادة ماعرفش اسامى
بس ياريت حضرتك توضح يعنى ايه بنزين اللمبة ؟؟
لانى ماعنديش حاجة فى جوانب اللمبة غير المسمارين بتوعها ودول بالظبط عاملين زى اللمبة المسمار بتاعة البيوت يعنى متصلين ببعض وفى نفس المستوى والنقطتين القصدير اللى اسفل اللمبة عندى الاتنين فى مستوى واحد...بردو زى لمبة البيوت الصفرا بس بدل نقطة قصدير فى النص لأ نقطتين منفصلتين
عربيتى نوبيرا 1 كورى فماعرفش مختلفة عن عربية حضرتك ولا لأ
آسف للاطالة