الموضوع: طلب اقتراحات لتظبيط فيات 131

المشاركة الأصلية كتبت بواسطة michohat

السلام عليكم ورحمه الله وبركاته
عندى عربية فيات 131 موديل 79 ودخلتها الايام دى علشان اجددها فعاوز احافظ على شكلها الاصلى بتاع المصنع و اظبطها دورت على النت على ان الاقى حد ظبط عربية من النوع ده مش لاقى
فمتوقع انى الاقى عند اعضاء المنتدى افكار تساعدنى انى اطلع بنتيجه مرضية
مرفق صور لعربية من نفس الموديل بس مش بتاعتى لان عربيتى دلوقت مفكوكة وعلى الصاج

انا كنت حقولك على نصايح ......
لكن رد بشمهندس الفيات حازم قال الى عاوز اقوله و زياده كمان .....كلام مظبوط مليون الميه .

ال131 والفيات القديم عموما جماله انك ترجع العربيه لحاله المصنع .... وبدون ادنى تغير .. لاجنط ولا شكمان ولا تفيم ولا اى حاجه ... لو حابب جانت اكبر واعرض هات جانط ال132 ال 14 بوصه " المروحه " وركب عليه كاوتش 185 .
واحذر انك تجيب شبكه اماميه جديده ..... لانهم كلهم مضروبين " عن تجربه " هات مستعمله ... وحتلاقيها اغلى 3 اضعاف الجديده المضروبه بس بتحطها وتنساها.
الفوانيس الخلفيه اوعى تسترخص وتحطلها باغات مصرى ام 10 جنيه ... كدة بقت ال131 تاكسى .... للاسف مافيش منهم جداد ... هاتهم استيراد ..فعلا زى ما حازم بيقول بتفرق جدا فى شكل العربيه .
الباكيتات الى فى الجنب مهمه جدا ... للاسف مانفيش منها اصلى ... لكن فى نوع مصرى كويس اسمه اوتوبوفايل .
حاجه مهمه ماتنسهاش ... العزل الحرارى .... روح عند واحد سوروجى بس يكون درجه اولى وبيفهم .. وخليه يشيك على العزل الحرارى و اللباد الحرارى الى فى وش الموتور وفوق الفتيس ....... مهم جدا الموضوع ده

وخليك مع نصايح حازم باشا ........ صح مليار % وحتلاقى العربيه بقى شكلها مبهر جدا واحلى 100 مره من لو انك عدلت فى شكلها او غيرت حاجه فيها .

بس خد بالك لان التكاليف مش حتبقى قليله و حتفتح معاك .... بس مش خساره وحتحس انك راضى عن العربيه 100 % .

وربنا يوفق

المشاركة الأصلية كتبت بواسطة hazem_khidr

اسف للتاخير يا استاذ مجدي:)
ال 131 عامله زي ال 132 ال 2000 بلضبط
يعني علشان تبقي مميزه اعملها زي ما كانت زيرو بلضبط
ركب الجنوط الروحه بتاعها و فرش القطيفه بتاع السوبر و فرش الابواب كمان قطيفه بيج و السقف.
ركب النواكل السودا اللي علي الابواب.
الشبكه هات الاصلي و لو استعمال و اغلي من الجديده.
التابلوه برضه لو تعبان هات تابلوه استعمال ايطالي و بلاش بتاع الشاهين شكله وحش و خاماته تعبانه.
اللي يخلي العربيه تمام و شكلها كويس السمكره
قبل ما ترش العربيه ركب الفوانيس و الاكصدامات و و لازم يركبو صح و يبقو مريحين علي العربيه و مضبوطين و مافيش فيهم اي فروق و مخدمين مع السدر و الرفارف.
فروقات الابواب و لازم تبقي ماشيه مضبوطه و تجيب كاوتش الابواب و تركبه عند السمكري و تخليه يضبط الابواب عليه علشان ما تترشش و يقولك مش حينفع و المره الجايه نعملها.
الفوانيس لو وحشه ارميهم و هات فوانيس جديده حتفرق جامد في الشكل بس مركه محترمه ما لقتش يبقي تنكل اللي قدام عند اي محل اكسسوار و تغير اللي وراه بجوز استعمال.
البوهيجي ياخد باله من السوك(جمع سوكه ) و يظبطهم اوي
بس و ان شاء الله حتلاقي العربيه بقت تحفه
ما تنساش تتابعني باخر الاخبار و لو فيه اي حاجه ما تترددش و اسالني و انا افيدك باذن الله.

:) ولا حقدر اقول نص كلمه ..... 100 100