تجربتى فى تسقيط موتور اسبيرو
بداية العيب اللى كان عندى هو استهلاك زيت عالى (لتر كل 400 - 500 كيلو)
رغم إن سحب العربية كان كويس جدا و بتجيب سرعات عالية
بعد أخذ رأى العديد من الاصدقاء و كمان الميكانيكية و الناس اللى عملت عمرة قبل كدة
معظمهم قال إن تغيير موتور أفضل من العمرة لأنى كنت شاكك إن الموضوع أكبر من طقم شنبر
و أخدت بالنصيحة و بدأت البحث عندنا فى إسكندرية و إتصلت بناس فى القاهرة و كمان فى بور سعيد
و كان ملاحظ إن موتور الاسبيرو قليل و ماسك سعر عالى شوية عن فترات سابقة
المهم كان السعر بيدور حول 3000 جنيه للموتور الكامل بأدوات التغذية بدون فتيس
و كان أهم حاجة بالنسبة لى هى الضمان لقيت ناس بتقول أول ما تركب و الموتور يدور فقط
و ناس قالوا أسبوع و ناس 10 أيام
و بعد بحث كتير لقيت واحد أخذته ب 2150 جنيه و علية ضمان شهر كامل و الميكانيكى شافه و قال كويس ظاهريا
(كنت بدور على أفضل ضمان و كمان أفضل سعر)
و تم التركيب كان من أوله فيه صعوبات لقينا طلمبة المية بتجيب مية غيرناها
و كمان ركبت حساس TPS وIdle valve من عندى
فى أمل الدوارة الموتور عتل كتير و طلع كمية دخانة كتير
و ظلت هذه الدخنة ملازمة للموتور لكن كبس و سحب كويس جدا
رجعت لصاحب الموتور قال لى إصبر علية شوية يمكن الشنبر قافل و كمان غير علبة الجكمان الخلفية لأنها بتجمع عادم من الموتور القديم ( غيرتها ب 100 جنيه إستثمارى)
لاحظت مستوى الزيت لقيته بينقص و بعد وعود من التاجر بموتور آخر طالت الفترة
قررت أروح بور سعيد و هناك لقيت تفاوت كبير فى الأسعار من 3500 بالفتيس ل 2700 بالفتيس
و الحمد لله أخدت موتور كويس راكب من 12 يوم مفيش دخانة و مفيش نقص فى الزيت ولا ترشيح من أى مكان
أخدته ب 2250 من غير الفتيس و رسوم التسجيل 100 جنيه و أخدته على تجربة أسبوع بس بان من أول دوارة
أنا طولت عليكم
أنا حبيت أنقل تجربتى
ولو فيه أى إستفسار أنا فى الخدمة