الموضوع: مركز الصفا لتحليل و معالجة العوادم وصيانة الكربراتير والانجكشن

عربيتي فورد اسكورت 1300 كربراتير كان استهلاكها في البنزين عالي وبتهبب بوجيهات وطبعا كان فيه دخنة سوداء من الشكمان. اتصلت بمركز الصفا الأسبوع اللي فات ورد عليا المهندس محمود وقولت له على المشكلة وطلب مني اني اروح يوم الجمعة الصبح بدري علشان اخد رقم متقدم. فعلا روحت الساعة 9:20 الصبح وكنت رقم 3.
قام المهندس / علي بفحص العربية على جهاز co وفعلا اكتشف زيادة الأستهلاك لكنه اخبرني ان الأستهلاك العالي ده على السرعات العالية. تم فك الكربراتير واخدوه في الورشة وبعد حوالي ساعتين تمت صيانته وتركيبه. سألت الفني اللي كان بيعمله الصيانة وبيركبه عن سبب استهلاك البنزين وتهبيب البوجيهات ، اخبرني ان كان فيه جوان بين نصفي الكربراتير وكان مقلوب وده كان بيسد مجاري الهواء فالعربية كانت بتعوض نقص الخليط عن طريق البنزين الزيادة ، بالأضافة لأن كان فيه بك سرعة وسع شوية وتم تركيب واحد تاني نفس المقاس .


قطع الغيار المستخدمة:
1- بك سرعة
2- اورانج (معرفش ايه ده الحقيقة)
3- جوان قاعدة

قبل تركيب الكربراتير تم الكشف على اسلاك البوجيهات عن طريق جهاز شبه الأفوميتر كده للتأكد من فاعليتهم.
بعد تركيب الكربراتير تم ضبط العربية على الجهاز لضبط نسب الخليط ، وبعد كده خدتها مشوار للعاشر من رمضان علشان الشكمان يطرد الهباب المخزن فيه.
ملاحظاتي:
1- العربية بقت انعم عن الأول.
2- بعد مشوار العاشر توقف الدخان الأسود عن الخروج من الشكمان.
3- العربية كان اخرها معايا 120 كم/س ، بعد موضوع صيانة الكربراتير جبت بيها 160 كم/س في طريق العاشر.
4- لاحظت حدوث تعريق مياه من الشكمان وده مكنش بيحصل قبل كده.

النتيجة:
شكراً مركز الصفا.