السلام عليكم ورحمة الله وبركاته
إزيكم يا عصابة الأوبل إن شاء الله تكونو كلكم بخير
فى الأول أحب أقول كلمة لكل الأعضاء هنا فى المنتدى
أنا الحمد لله بقالى اكتر من سنتين هنا فى المنتدى والحمد لله عمرى ما زعلت حد منى
وكل الأعضاء القديمة تعرفنى (من خلف شاشات الكمبيوتر) ولم يحالفنى الحظ لحضور أى مقابلات
بس شوفت ناس من المنتدى هنا زى العضو (تامر تامر) والعضو (محمدzalantaheee) وبعض الاعضاء الاخرين
عشان مش عايز أنسى حد منهم
والحمد لله عمرى ما هكدب على حد وربنا الشاهد على كل كلمة قولتها وهقولها
نبدأ
بسم الله الرحمن الرحيم

أنا قصتى مع عبدالله أوبل كانت كالآتى
أولا يوم 30/5/2011
روحت أنا ووالدى لعبدالله أوبل عشان نغير الفيتيس بتاع العربية عشان لمبة الفحص كانت على طول بتنور
المهم قابلنا صلاح المفروض إنه محاسب وبيأخد كل تعليماته من عبدالله عن طريق التليفون
قاعد أنا ووالدى وصلاح عشان نتفاهم على تكاليف التغيير وكدة ومرة واحدة لقيت صلاح بيقول ممكن نعمل عمرة للفيتيس...... إيه رأيكم ؟
وهتكون كل حاجة جديدة بدل ما تجيب فيتيس إستيراد وممكن يبوظ بسرعة والعمرة كمان عليها ضمان 6 شهوووووووووور بحالهم
لكن لو عايز فيتيس إستيراد ممكن نجيبه ونركبه وبندى عليه ضمان 3 شهور بس ف أنا رديت وقولت له المفروض إن ضمان الفيتيس الاستيراد بيبقى 6 شهور
قالى من فترة وبقى فترة ضمان الفيتيس 3 شهور بس لكن العمرة كله هيبقى جديد والحياة حلوة وضمااااااااااااااان 6 شهور
طبعا صلاح كان عمال يحلى موضوع العمرة ف عنينا ويبعد فكرة الفيتيس الإستيراد
فوالدى راح قال خلاص توكل على الله ف العمرة وشوف إيه المطلوب عشان نبدأ ف الموضوع ونخلص على طول
وبعد مداولة وفصال وخصومات وكلام من دة ما بين صلاح وعبدالله على التليفون تم الإتفاق على الآتى : ,,,,,,,,,,,,,,,,
1: طقم إصلاح عمرة فيتيس 1450
2: طوق بند 400
3: مصفة 250
4: خراطيم تبريد الفيتيس 320 (الصغير والكبير) مع العلم إن الاتنين التانين كانو شغالين بس قالو عشان يستحملو ضغط الزيت بتاع الفيتيس بعد العمرة
5: جوان مشترك شكمان وكاوتشة شكمان 30 جنيه (الكاوتش والجوانات كانو سلام وتمام ومع الفك والتركيب باظو وكمان فى جاويط إتقطم ف الفرن وبيقولو كان مقطوم من الاول)
6: مصنعية ميكانيكا 500 (فك وإعادة تسقيط الفيتيس فى العربية)
الاجمالى ::::::::::::::::::::::::::: 2950 جنيه
وزيت باور عادى لتنضيف الفيتيس 20 جنيه مش فاكر والله أو 30
نيجى بقى لزيت التشغيل 10 لتر زيت شل الاسود 280 جنيه
غير الاكراميات 50 جنيه
إذا الإجمالى 2950+20+280+50=3300
مقابل صيانة فيتيس أوبل فيكترا بضمان 6 شهور
لحد هنا تمام أوى أوى
تانى يوم أسافر إسكندرية أنا والعائلة وأنا ف السكة الاقى تسريب زيت وكمان مقياس زيت الفيتيس مش راكب
رجعت جبت المقاس مواصلات وطبعا كنت شايط واقولهم يقولولى معلش يابيه المهم سألت أجيب زيت أيه أحطو ف العربية عشان ارجعها عند الورشة
قالولى زيت عادى من بتاع الباور اللى هو ب 10 أو 15 جنيه روحت إسكندرية وجبت تقريبا ب120 جنيه وخدتهم كلهم ف السكة
وجبت العربية تانى يوم وسبتها وقالولى العربية هتخلص بكرة وكان يوم الإستلام عندى إمتحان قولتلهم بعد الامتحان هاجى أخدها
تانى يوم بعد الامتحان روحت عشان اخد العربية وبقولهم كان فيها إيه يقولى أوبل سيل فيتيس كان إتقطع وبتاع طب مش المفروض دة إتغير مع العمرة قالى لأ
قولت ماشى حسابك كام
مصنعية فك وتركيب فيتيس وتغير أوبل سيل 200 جنيه
وكمان مطلوب 4 لتر زيت روحت إشتريت 2 لتر وكان باقى من 10 بتوع العمرة 2 لتر
حساب الزيت 56 غير الاكراميات 15
يبقى الإجمالى :::::::::::::::::::::: 271 روحت دافع زى الباشا
خدت العربية وروحت البيت ونمت يومين من التعب وقمت عشان كان عندى إمتحان تالت يوم قمت ذاكرت وخلصت وتانى يوم وأنا رايح الإمتحان سامع تزيق ورجة ف العربية والعربية بترمى لوحدها
بعد الامتحان روحت أظبط زوايا واظبط نيتروجين وكانت المفاجاة بتاع الزوايا بيقولى تعالى يا بيه أوريك حاجة بصيت لقيت مسمارين من بتوع العفشة مش مربوطين أصلا
قالى روح إعملهم عشان دى ممكن تبوط الدنيا خدت العربية أنا وصاحبى وطلعنا على عبدالله وقالى خلاص سيبها وبالليل تعالى خدها
سبتها لتانى يوم وروحت أخر النهار أستلمها وكانت المفاجاة إنى هدفع فلوس إزاى يقولى أصل القنطرة كانت ملووووحة طب ما هى كانت راكبة كويس يقولى إصلها فكت ومش راضية تركب عدل
كام يا عم 70 جنيه ليه يا عم إنت عدلتها يدوى قالى السمكرى 50 ومسمارين عشان اللى عندك كانو بايظين 20 والمصنعية عليا
وكمان خليت العيال يغسلو العربية بس دى على حسابى قولت له تشكر يا سيدى
دفعت 70 زى الباشا و5 للواد اللى غسل العربية
الإجمالى :::::::::::::::::::::::::::: 75 جنيه

بعدها تقريبا بإسبوع أو 10 أيام العربية بتجيب زيت من تحت روحت له الورشة فيها إيه
قالى أوبل سيل خراطيم تبريد باظ ياعم ماهو لسة متغير ماهو مش إستحمل ظغط الزيت وباظ
بعد الفك والتركيب 100 بالزيت اللى هما حطوه بسألهم حطيتو شل لا يا بيه حطينا من العادى
أنا هنا زعقت وكنت خلاص إتقرفت بجد يعنى أنا جايب زيت من النضيف تقومو تحطو عليه زيت معفن أًصل عادى يابيه ما دة بردة بتاع فيتيس روميت 100 جنيه ومشيت وأنا قرفان

وبعدها بشهر تقريبا أو شهر ونص (طول الفترة دى يعتبر العربية مش بتتحرك) وكان يوم سبت
أنزل أحرك العربية من مكانها وكانت الفاجعة بقعة زيت زى الزفت ونشفت طبعا أقيس الزيت مفيش زيت طبعا بقيت شايط
زودت لتر ونص زيت عادى كان موجود عندى وجريت عليهم وريتلهم المنظر قالولى أوبل سيل خراطيم التبريد
روحت مزعق وقولت لهم أنا قرفت بجد وروحت سيبتهم ومشيت ويومها بالليل روحت أجيب العربية مشيت بيها من عنده لحد بيتى اللى هما 5 دقايق بالكتير
قبل ما اتحرك لقيتهم بيقولو الحساب يا بيه حساب إيه مش الكلام دة إنتو عملينه قيل كدة قالو مش عارفين أخر مرة إيه الى إتعمل كام يا حج 80 بالزيت بالمصنعبه والاويل سيل
طلعت 100 إديتهالو رجعلى 20 إديت 10 للواد اللى إشتغل ومشيت وأنا بشتم نفسى إنى دفعت فلوس
روحت ركنت العربية وتانى يوم مش خرجت بالعربية ويوم الاتنين أبص الاقى زيت نازل من العربية أنا لقيت نفسى أوتوماتيك أخدت العربية على هناك كانت الساعة 10 وتلت تقريبا
كانو لسة هيفتحو المهم فتحو وفطرو وفكو الخراطيم وغيرو الاويل سيل وخطو زيت من المعفن بتاعهم كل دة وأنا قاعد على الكرسى وحاطط رجل على رجل وقايل فى نفسى هخليهم يعملو كل اللى أنا عايزه ومش هدفع قرش
المهم ساعة تقريبا أو ساعة وربع كانو خلصو وجم قالو الحساب مع الاسطى أحمد أخو عبدالله قولت ماشى روحت له وقولت له الشغل اللى حصل ف العربية كان كذا كذا وكل الكلام دة معمول يوم السبت بالليل
أنا مش دافع قرش با بيه قالى بص مصنعيه والاويل سيل علينا لكن الزيت عليك قولتله مش دافع قرش يا بيه لازيت ولا بتاع مش دافع قرش
قالى يبقى مش هتستلم عربيتك روحت ضاحك أوى وقايل له إيه بتقول إيه قالى أنا أقصد إنك هتستلم عربيتك من عبدالله قولت له أه بحسب طب هاتو عبدالله قالى عبدالله لسة ماشى ومش هيرجع دلوقتى ممكن تسيب العربية وتيجى تاخدها بالليل
قولتله لا أنا معاك لحد ما يرجع قالى تنور مفيش دقيقتين وعبدالله رجع شكله كان ناسى حاجة روحت أكلمه لقيت مراته معاه وبعدين صلاح (بتاع أول الموضوع) قالى أنا هروح اكلمه عشان مش ينفع إنت تكلمه عشان مراته المهم راح دقيقتين وقالى الاسطى عبدالله قال الزيت علينا
قولت أوك خدت العربية ومشيت

كل الكلام دة والفترة دى كلها اللمبة الكريمة بتاعت الفيتيس بتنور وأنا ماشى طبعا أنا كنت ببقى حاسس إنى هعيط
المهم من تقريبا إسبوعين والدى كلم عبدالله وقاله العربية زى الزفت اللمبة منورة على طول لما حد بيركبها قالو خلاص إبعت إبن حضرتك وأنا هظبطهاله
المهم روحت لقيته مستنينى وقالى تعالى نجرب إركب يا عصام إنت كمان عشان لو حصل حاجة ف الفيتيس تبقى موجود قالو ماشى (عصام دة اللى عامل العمرة)
نطلع نجرب العربية سخنة اللمبة مش راضية تنور قولتله طيب عايز أكشف كمبيوتر قالى مفيش وأقرب واحد ف كفر طهرمس قالى لما تنور تانى تعالى وإحنا نروح نكشف
تانى يوم كانت العربية مع والدى وهو أصلا بيسوقها قليل أوى بس لما لقى اللمبة منورة إتنرفز وطلع على عبدالله ومكنش عبدالله موجود خد العربية وروح وكلم عبدالله وقال أنا هبعت أحمد بالعربية تشوف إبه اللى فيها عشان مش عايز اللمبة تنور تانى
المهم روحت وأنا عمال أضحك المهم سيبتله العربية ورجعت خدتها بالليل قبل ما يقفلو على طول (كان خطاب محمود عباس ف الامم المتحدة) يوم 23/9/2011
بقوله إيه اللى كان فيها قالى الترامل بتاعت فيشة الكمبيوتر بتاع الفيتيس كانت واسعة ونضفتها وكله بقى تمام التمام ونضفت لك الحساسات المهم عصام طلع جرب العربية وهيا سخنة اللمبة نورت مرة وقالى بس مكان التنضيف وكدة قولت وماله صدق يا أحمد
المهم أخدت العربية وطلعت على سيتى ستارز وماشى طول الطريق 60 على الدائرى ورجعت نورت مرتين ومش فيها مرشدير وأنا راجع بالليل
يوم السبت كنت مشغول سبت العربية وخلص مشاويرى مواصلات
يوم الاحد 25/9/2011 جدتى توفت بعد الظهر (الله يرحمها وأسالكم الفاتحة والدعاء لها) وإحنا رايحين الدفنة والدى قالى أنا هسوق وإنت سوق عربية عمك أنا مش كنت راضى بس قالى محدش عارف يطلع بعربيتهم
المهم روحت ركبت عربية عمى وسافرنا المهم وصلنا للمقابر وخلصنا الدفنة ووالدى راح يركب العربية مش فيها مرشدير ندهالى
المهم روحنا وقالى بالليل وتانى يوم أخدت العربية أوديها لعبدالله قالى سيبها قولت لأ عشان كنت مسافر قالى الغطا بتاع جمب الفيتيس كان بايظ والمجارى بتاعته اتسدت غيرناه والحياة هتبقى لذيذة قولت ماشى
إطلع يا عصام جرب مش فيها مرشدير بردة قالى كدة وحدة البلوف إتسدت وعايزة تتنضف وهنا سحب من العربية 4 لتر بنزين إستخدم تقريبا نص لتر وخبى الباقى بين تربيزة العدة والحيطة وأنا شايف ومش رضيت اتكلم (أقسم بالله الكلام دة حصل)
المهم سيبتها وروحت يوم التلات عشان أخدها عشان كان تالت يوم عزا وكنت لازم أخد والدى أوديه دار المناسبات اللى فيه العزا وكنت جبت زيت شل عشان الزيت المعفن اللى كان محطوط ب 112 غير الموصلات تقريبا 15 جنيه
الساعة 5 والدى كلمنى وقالى أنا لازم أمشى عشان الحق أوصل قولتله العربية لسة المهم الساعة 6 خلصت ودور يا عم بردة مفيش مرشدير عصام كلم عبدالله على الموبايل وقالة اللى حصل
وكلمنى قالى سيبها وأنا هنزل الفيتيس وهشوف وهكلمك بكرة عشان تيجى تأخدها كل دة كان يوم التلات أنا هنا زعقت وعليت صوتى أوى وكان الموضوع هيقلب بمشكلة قولتله أنا لازم أخدها دلوقتى
قالى خدها بس مش هستلمها منك تانى أنا سمعت الكلمة دى وعليت صوتى كل اللى ف الورشة بقى باصصلى راح قالى طب ثوانى أنا جايلك مفيش ثوانى و جيه وبقى بيتكلم بالراحة أوى وشهدت ناس عليه وقالى بكرة كلمنى وأنا هقولك تيجى تأخدها إمتى
قولتله لا مش هاجى بكرة أنا جاى بعد بكرة قالى ماشى كتر خيرك وكدة وبلغ والدك تعازينا والكلام اللى مش بيأكل عيش دة روحت الخميس الصبح عشان أخد العربية لسة مش خلصت فين عبد الله مش موجود ومكنش عصام موجود
روحت البيت والعشا كلمتهم العربية لسة مش خلصت وبعدين عبدالله لسة مش جيه وعصام مش عايز يرد عليا الراجل اللى هناك يقوله صاحب العربية عايز يعرف فيها إيه يقوله مش هتكلم بكل قلة ذوق فالشخص اللى رد عليا قالى بعد الجمعة على طول العربية هتكون خلصانة
المهم روحت على 2 العربية خلصت لأ دة لسة بيسقطو الفيتيس عبدالله مش موجود وعصام مسافر طب إيه الحل قالى على صلاة المغرب هتلاقيها خلصانة ودايرة ماشى روحتلهم 7.05 سبعة وخمس دقائق لسة مش خلصت كان معايا صاحبى راح مزعق راحو قايلن فاضل تركيب الشمكان والزيت
المهم على 9.30 خلصو وحطو 4 لتر زيت طيب إيه الحل لسة عايزين مابين 3 أو 4 لتر زيت يا عم أنا لسة جايب يوم التلات قالى ازاى قولتله زى الناس قالى طب معلش روح جيب قولتله مش معايا فلوس لقيت واحد صبى جاى من برة بكل تلقائية وطلع زيت من جوة التسجة (تربيزة العدة) كان متشال ومتخبى زى البنزين
بقوله زيت مين دة قالى زيت عربيتك قولتله ومش محطوط جمب الجركن التانى ليه قالى اصل الاسطى عصام قال لو العربية إحتاجت زيت تانى طلعو وزود منه (أقسم بالله دة حصل )
المهم زودو الزيت دور الشكمان مش راكب كويس ليه ياعم فى جاويط مكسور تانى قالى لا هو جاى مكسور قولتله نفس الكلمة دة إتقالت المرة اللى فاتت وبعدها أنا روحت عملته بإيدى عند الخراط (وأقسم بالله أنا فعلا اللى أخدت الفرن وعملته عند الخراط)
قالى خلاص يا بيه أخلص الفيتيس بس ويوم الاتنين نعملك الشكمان قولت ماشى بس أخلص الفيتيس دور يا عم دارت وطبعا صوت محرات إطلع جرب ف طريق المريوطية لحد أول كوبرى بتاع كرداسة تقريبا 5 كيلو أو أقل ولفيت الكوبرى
وأنا راجع مرة واحدة الاقى العربية علقت على الغيار التانى ومش راضية تنقل روحت مدى إشارة ووقف بطلت العربية ودورتها جبت d.3.2.1 مش راضية تتحرك طب وإيه العمل جبت r بردة مش راضية المهم بطلت وشيلت الفيشة بتاعت الكمبيوتر
وركبيتها دور يا أحمد العربية دارت وجبت d العربية مشيت تمام وفصلت تانى قدام باب الورشة بطلتها وروحت كلمت أحمد أخو عبدالله قالى أنا كلمت عبدالله وهو نازلك عشان لسة جاى من برة طب ماشى إستنيت ساعة الاربع وجيه نزل 11
قولتله اللى حصل وأنا أما فكيت الفيشة وركبتها إتعدلت وفصلت تانى (أنا قولت له كدة عشان حوار المرشدير دة حصل بعد ما نضف الحساسات وضيق ترامل الكمبيوتر)
المهم قالى بص كدة مفيش غير إننا نغير قربة زيت الفيتيس قولتله وبعدين قالى لو أوكى يبقى خير وبركة لو مش نافعة قولتله أه قالى تجيب فيتيس إستيراد
هنا انا وقفت أضحك أوى وصاحبى قاله يعنى وكل اللى هو دافعه دة يترمى ف الارض قاله مش ذنبى وأنا قولتله مش ذنبى أنا كمان قالى خلاص أنا قولت اللى عندى قولتله وأنا مش هشترى الفيتيس قالى براحتك
سبت صاحبى يتكلم معاه وروحت أنا إتصلت بوالدى وقالى إديله التليفون أكلمه المهم إديته التليفون وكلم والدى وأنا خرجت قعدت ف العربية وسبت صاحبى معاه واما خلصو كلام مع بعض صاحبى أخد الموبايل
وإتكلم هو ووالدى شوية والموضوع رسى على إن والدى لازم يروح يتكلم مع عبدالله ويشوف حل وسط وهو إن لو الفيتيس إتغير يبقى عبدالله يشيل المصنعية ويشيل جزء من الفيتيس
أنا لغاية دلوقتى دافع
3300+271+75+100+80+112=3938
+120 الزيت اللى أنا جيبته وأنا جاى من إسكندرية يبقى =4058
فى عمرة فيتيس بتتكلف 4058 جنيه
غير أقسم بالله أنى جبت زيت كتير وكان بينزل من سواء التقفيل ب أكتر من 100 جنيه
غير الاكراميات اللى أنا مش كاتبها غير المواصلات بتاعت إسكندرية غير مواصلات مشاوير الزيت اللى انا مش مدخلها الحساب
والله العظيم أكتر من 200 جنيه بكتير وفى الاخر جاى يقولى تجيب فيتيس إستيراد لو القربة مش نفعت
قولولى انا اعمل ايه دلوقتى بجد تعبان من يوم الجمعة المفأجاة كمان إن أنا حاطط ف العربية يوم الاحد قبل ما نسافر عشان الدفنة على طول 40 لتر بنزين وكان تقريبا كدة فول تانك سافرت ورجعت مشوار يقرب من 150 كيلو أو أقل ووالدى ماشى بسرعة من 60 الى 90
إول ما العربية دارت يوم الجمعة لمبة البنزين منورة والعداد نازل على الاخر يبقى كدة كمان فى سرقة بنزين وكمية محترمة
وأقسم بالله العلى العظيم إن فى كمان كارت ميمورى كنت سايبه ف الكاسيت بتاع العربية إتسرق هو كمان
أقسم بالله العلى العظيم أنا مش مزود كلمة وكل الكلام دة حصل والله على ما أقول شهيد
دلوقتى المفروض والدى كان يروح يقعد مع عبدالله عشان يتفاهمو مع بعض (الكلام دة إمبارح )لان أنا على اخرى وحاسس إنى لو روحت هعمل مشكلة كبيبرة أوى ومش هيبقى ليها أخر والدى راح ومش لقاه ومش كان بيرد على مكالمات والدى وشوية وعبدالله كلم والدى وقاله أنا كنت عند الدكتور ومعلش يا بيه
قالى الفيتيس مش نافع ولازم واحد إستيراد قاله ازاى وزعقو مع بعض وقالو معرفش راح والدى قاله أنا مش معايا فلوس المهم إتفقو إن والدى يديله 1500 والباقى عليه وعبدالله كلمنى وقالى تعالى ب 1000 جنيه وبكرة هتنزل إنت وعصام الحرفيين تشترو فيتيس قولت ماشى الساعة كام قالى 11 بالظبط قولتله ماشى (شوفو تضارب الأقوال)
النهاردة 11 الا عشرة كنت هناك 10.52صباحا بالظبط روحت عبدالله مش موجود وعصام كمان طب والعمل عبدالله جاى الساعة 11.30 تقريبا وكان راكب عربيته ومش راضى ينزل عشان أنا قاعد

دخل بعدها ببتاع ربع ساعة لقيته ضحك وقالى إنت جاى قبلى قولتله أنا بحب ابقى ملتزم فى مواعيدى فين عصام قالى لسة مش جيه وراح ناده على واحد من الناس اللى شغالين عنده وقاله روح معاه هات فيتيس من عند سوسو اللى ف طريق كعابيش (الطوابق عند شارع الشيشينى) قولت للصنايعى هو باعت معاك فلوس قالى لأ روحت لعبدالله قولتله أن مش معايا غير 1500 اللى إنت متفق عليهم مع والدى قالى لأ أنا مش إتفقت على حاجة روحت مكلم والدى وكلم عبدالله ووالدى زعق معاه وقالو أنت متفق على كدة عبدالله أنا مش معايا فلوس فوالدى قالو طب جيب وركب دلوقتى وأما نخلص نبقى نكمل حسابنا قالو الراجل مش هيرضى وأنا كدة مش هشتغل وفضلو يتكلمو شوية وقفلو وبعد صلاة الظهر بربع ساعة المحاسب اللى عند عبدالله كلم سوسو من موبايلى مع العلم إن كنت كل لما أقوله كلمه يقولى أنا كلمتة ولسة مش فتحو ومفيش دقيقتين فرق بين لما قالى كدة وبين لما كلمو من تليفونى

المهم السعر من عند سوسو 2500 نهائي وواحد إسمه هنتش 3000 وعشان عبدالله 2800 وواحد قاله 3500 كلمت والدى قالى خلوهم يلمو العربية على كدة
الساعة كانت 1.05 سألته أجى أخدها إمتى قالى ساعتين بالظبط وتلاقيها خلصانة
روحت 3.20 تقريبا لسة مش خلصت روحت صليت ورجعت الساعة 3.40 تقريبا ولسة المهم خلصت الساعة 5.24 بالظبط وامشى مش راضية تتحرك المهم خدت الغيار الاول لوحدها ومش راضية تنقل عنه واديتها لواحد قريبى وقالى أنا هخلصهالك كلم والدى دلوقتى وقاله فردة كوبلن داخلى مكسورة وسلوك كهربا كتير مقطعة (وأنا ماشى مكنش فيه كلاكس والرعاش لمبة منهم مش شغالة وحاجات كتير تانية بتعلق) ومسامير من بتاعة القنطرة مش موجودة والباقية تأتى غير كاوتشة الانتاك اللى بين الماف وبوابة المانيفولد إتقطعت بس أنا زعقت وقولت مش هستلم العربية كدة قالى مش عندى قولتله أنا لسة شاريها ب 50 جنيه هات تمنها وأنا أشتريها تانى (فعلا لسة شاريها قريب) راح جاب لى واحدة من المحل التانى غير ودن من بتوع الريداتير اللى ف القنطرة من تحت إتكسر ومش عارف أفهمهم إنه جاى سليم
دلوقتى أنا هروح أعمل محضر بالفواتير اللى معايا فى القسم
الفاتورة الاولى مكتوب عليها كل المصاريف ومكتوب تحت ضمان 6 شهور عبدالله

ومعايا كمان فاتورتين بردة هاخدهم معايا أثبتهم فى المحضر
اللى أنا حاسه إن عبدالله ممشيها عافيه وأنا عايز أخدها قانونى أحسن بس لو مش جاب نتيجة مش عارف هتوصل لإيه
مستنى ردودكم
أقسم بالله العلى العظيم أنا مش بكدب
والناس القديمة هنا ف المنتدى تعرفنى والحمد لله عمرى ما زعلت حد منى غير أنى الحمد لله كنت بسأل على قطع الغيار لكل الناس اللى كانت بتطلب أسعار أى حاجة فى موضوع العضو محمد zalantaheee اللى أنا بعزه اوى
عايزكم تدعولى إن ربنا يجيب لى حقى من النصاب دة ............

مرفق صور 3 فواتير اللى أنا أخدتهم منه

http://img41.imageshack.us/img41/6458/1000393c.jpg

http://img24.imageshack.us/img24/4871/1000382r.jpg

http://img21.imageshack.us/img21/7250/1000384s.jpg

والسلام عليكم ورحمة الله وبركاته