السلام عليكم ورحمة الله وبركاته

أنا طبعا بحكم شغلى في ABB .. الشركه هنا بتبقى محتاجه ناس وبتبقى فيها وظايف خاليه في اماكن كتير جواها

كان نزل إعلان للشركه عندنا في أهرام الجمعه الماضيه.. ومش عايز أقول أنه نادر جدا إنك تلاقي إعلان ل ABB في أي جريده رسميه ( نااااادر جداااا )

اللي بيحصل كالأتي.. الشركه مقسمه لمجموعة شركات داخليه وكلها تحت إسم ABB .. وكل شركه من دول بيبقى ليها تخصصات معينه.. فبالتالي .. عندنا تخصصات كتير وفي مجالات مختلفه

الشركه أسسها شغل كهرباء وتصنيع لوحات كهربائيه وكل ما يتعلق بالمجال ده في المواقع المختلفه ..

الويب سايت بتاع الشركه وهي من اكبر الشركات عالميا في مجال الكهرباء هو :

www.abb.com

وفيه كل حاجه عن الشركه وعن مجالها وعن نشاطها

الشركه بتعلن عن الوظائف الخاليه من خلال الويب سايت الخاص بيها..وطبعا الوظائف الخاليه مش في مصر بس .. لأ.. في جميع انحاء العالم ( الخمس قارات )

حضرتك بتعمل الأتي :

1: تدخل على الموقع ده www.abb.com/careers

2: على إيدك اليمين هتلاقي ( Search for professional jobs at ABB ) إضغط عليها

3: بعد ما تضغط عليها .. هاتطلعلك صفحه عليها خريطة العالم وفي كل قاره في box .. تضغط عليه .. وتختار البلد اللي إنت فيها

4: في الحاله بتاعتنا .. هانضغط على (Africa/Middle East ) ونختار Egypt

5: هاتطلعلك صفحه فيها نوعية الوظائف واماكنها واللي إنت عايز تشتغل فيها .. طبعا أفضل حاجه إنك تختار all وتضغط على search

6 : هاتطلعلك صفحة بكل الوظائف المتاحه في ABB مصر .. ومن خلال كل وظيفه ممكن تضغط عليها علشان تعرف كل حاجه عنها وكمان ممكن تبعت ال CV من عليها

حاليا في وظائف للمهندسين ولل HR .. ممكن تدخلوا وتشوفوا التفاصيل

انا الحمد لله ربنا كرمني وإشتغلت في الشركه ده بعد ما إتخرجت علطول.. وكان في وقتها الناس اللي بتشتغل في الشركه ده بيبقى 99% منهم من جوه الشركه .. فتلاقي دائما أغلبية الناس عارفه بعض.. بس في الوقت الحالي.. الدنيا إتغيرت كتيييير والشركه بدأت تعين ناس من بره .. وده أفضل بكتييييير لأن ده بيجدد الدم جوه الشركه وبيخلي ناس جديده وعقول جديده وفرص عمل جديده تبقى متاحه للجميع

أنا متاكد إن في شركات كتير بتعين ناس جوه الشركه من خلال المعارف بس وأيضا بيبقى في ناس بتتعين في اماكن معينه فقط علشان الشخص ده متوصي عليه من فلان الفلاني ( والفلان ده طبعا هو قمة الهرم في منظومة الشركه ) ومابتديش أي فرصه لشباب مصر إنها تحصل على فرصة العمل ديه.

هو طبعا إسلوب فلان الفلاني مازال موجود وهايفضل موجود في جميع الشركات مادام الناس لسه بتفكر بالمبدأ ده.. بس علشان الناس تتعين في شركه زي ديه وفي الوقت الحالي مافيش غير الموقع والوظائف المتاحه فيه

علشان كده انا حبيت أوضح النقطه ديه بالنسبه للشركه عندنا .. واكون قدرت أفتح فرص عمل لناس كتير ممكن يكون ليها نصيب وتشتغل فيها

ويارب يوفق الجميع في مجالات العمل المختلفه ويلاقي العمل اللي يناسبه واللي يتمناه