العربيات القديمة المستعملة افضل بكتير من الجديد الزيرو وبعد تجربة

**kimotop** · 06-10-2011 11:30 AM

السلام عليكم

قصتي الكاملة مع سيارتي المستعملة

انا زي اي شاب عادي بعد ما اتخرجت قررت اجيب عربيتي الخاصة علشان شغلي و مشاويري .

و طبعا رحت اتعلمت القيادة في احد المدارس والحمد لله المدرس كان راجل عصبي فطلع عيني و طلعت عينه وفي الاخر اتعلمت على عربيات اصحابي .
وطبعا رحت طلعت رخصة و اول ما امسكتها حسيت اني بقيت شوماخر و جايلك يا شوارع مصر .

لحد هنا كويس جدا علشان بعد كدا هتبدأ رحلة البحث عن عربية
وطبعا كل الناصحيين نصحوني اني اجيب عربية قديمة مستعملة علشان اتعلم فيها واخبط براحتي !

وبالفعل روحت ضربت صحوبية مع اقرب ميكانيكي علشان يظبطلي عربية حلوة و قولتله عايز 128 وقالي يا باشا خد لادا بلاش ال 128 قولتله لا 128 شكلها حلو وقطع غيارها احسن و اكتر

وخلال يومين كدا لقيته بيكلمني ويقولي في عربية 128 للبيع في المكان الفلاني روح شوفها وبالفعل روحت جري علشان اشوف العربية و اخدت معايا الميكانيكي و قعد يبص عليها ويدخل من الكبوت يطلع من الشطنة زي القرموط ويدخل تحت العربية ابص عليه الاقيه طلع فوق السقف ويشيل كاوتشات الابواب و يدور الموتور ويزود بنزين و قالي العربية زي الفل

وبعد مفاوضات اشتريت العربية و كنت مبسووووووووووط جدا اني اخيرا امتلكت عربيتي الخاصة وان كانت لفترة محدودة علشان ناوي اغيرها بعد ما اتقن القيادة .

وبعد ما جبتها قابلت ناس بيها و كعادة الشعب المصري يقولك دفعت كام فلما تقوله السعر يقولك ليييييييييه كدا دا انا كان قدامي واحدة موديل مش عارف ايه وسعرها اقل وحالتها احسن .... الخ

لغاية لما قابلت واحد حكيم ويا رتني كنت قابلته من الاول وقالي ليه تشتري مستعمل كنت جبت جديد وخلاص وسيبك من كلام اخبط فيها والحوار دا لان الجديد هيريحك مش هيعقدك وكمان اسهل في القيادة وعلى العموم ربنا يباركلك بس حاول تغيرها بسرعة وقالي حكمة انجليزية جامدة اوي " لست غنيا كي اشتري سيارة مستعملة "

المهم نسيت كلامة وقعدت اتعلم بالعربية وامشي بيها واروح واجي و رحت لميكانيكي مشهور وقولتله بص يا اسطى على العربية وشوف هي محتاجة تغير ايه وغيره
لقيته بصلي باستغراب كدا وقالي اوفرلك انك لما تشتكي من حاجة تعملها بعينها
قولت دا باين عليه مش عايز يشتغل وخلاص الراجل دا قفلني لما اروح لكهربائي بقى
وفعلا روحت لكهربائي وقولتله نفس البق شوف الي عايز يتغير غيره
بصلي نفس النظرة بتاعة الميكانيكي وقالي هي العربية فيها حاجة ؟
قولتله لا
قالي طب خلاص انت عايز تفتح على نفسك فتحة ليه
قولتله يا عم انا عايز اظبط العربية علشان متتعبنيش
قالي طيب وجابلي فيوزات و كاتوت كهربا وغيرها وقالي العربية بقت زي الفل !!

رحت لبتاع الزيت وقولتله حط احسن زيت عندك فقالي موتورك خفيف ولا كويس ؟
ولا كنت فاهم خفيف يعني ايه ولا بتاع فقولتله لا خفيف على اساس ان العربية 128 خفيفة يعني
قالي انصحك بزيت موبيل الازرق انضف حاجة
قولتله حط يا اسطى وبعد دردشة عرف اني لسه جديد فتطوع وكشف على زيت الفتيس والفرامل وقعد يفهمني شوية حاجات

بعدها حسيت لما العربية صوتها نعم والفتيس نعم اني راكب مرسيدس ههههههههههه

وفضلت معايا على الحال دا يومين تلاتة و بعد كدا بدأت القصة الحقيقية :

وانا ماشي هووووووووووب العربية بطلت وادور مفيش والحمد لله كانت في حتة فاضية فنزلت وفتحت الكبوت ال يعني هفهم حاجة وطبعا ولا فهمت اي ابن تيت كل الي علمته قعدت اخبط في الكربراتير بخوف كدا كاني انسان بدائي شاف حاجة نازلة من السما بتلمع وقاعد يخبطها ويتعرف عليها " هونجا هونجا "

وبعدين واحد ابن حلال قالي البطارية نايمة وعايزة تتزق .
قولتله زق
قالي بتعرف ترمي ؟
بصتله ببلاهة قالي طيب هفهمك وبعدين فهمني بقى قصة رمي العربية وتجيب التاني وتفصل بالدبرياج وتفتح الكونتاكت واول ما العربية تسرع شوية اكبس بنزين و ارفع من الدبرياج بسرعة .. وقد كان والعربية دارت وفرحت جدااا

قالي روح بقى اشحن البطارية وحاول متبطلش منك تاني والحمد لله بطلت مني في الشارع وانا مروح والناس قعدت تزق و كلمة ارمييييييييي بتخرم ودني .

خدت البطارية ورحت شحنتها وبعد فترة عملت نفس الحوار فرحت تاني قالي البطارية فيها ربع قولته " وات ديو مين ذا كوارتر اذ بروكين ؟ " بالعربي طبعا بس اصل بتاع البطاريات دا واحد لابس نظارة وبيحسسني وانا بكلمة انه بيشحن بطاريات تشرنوبل او مثلا ماسك توكيل الطاقة الذرية في العالم المتقدم !!!

نكمل بعدين ...

**ahmed2y** · 06-10-2011 12:05 PM

منتظر الباقى

**Hyper3G** · 06-10-2011 01:17 PM

ههههه
مستنى التكملة :)

**ahmed_120s** · 06-10-2011 01:18 PM

ربنا يعينك شكلك معبي اوي من جوة ... كمل كمل علشان تنسي

**Lion_Heart** · 06-10-2011 01:46 PM

اكمل و لا تتوقف

**kimotop** · 06-10-2011 02:22 PM

نكمل
انا اصلي اجازة النهاردا بقى 6 اكتوبر وفاضيلكوا وكل سنة وانتو منتصرين

بعد ما خلصت بتاع البطارية وقالي في ربع ضارب قولتله بقولك ايه هات بطارية جديدة وبالفعل اداني بطارية جديدة نوعها " النسر " و قولت بس هي دي البطارية الي هتطير العربية

وبعدين روحت اوصل واحد صاحبي في مشوار بعيد شوية وفجأة لقيته بيقولي حرام عليك اركن قولتله في ايه قالي العربية هتولع
رحت راكن بسرعة قالي ايه يا عم مش شايف عداد الحرارة المهم ببص لقيته قرب يعدي الاحمر ؟
قولتله والله كويس انك اخدت بالك بس هو عمل كدا ليه دا انا بزود مية باستمرار ولا كاني بظغط بطة بلدي
المهم نزلنا وصاحبي كان ليه خبرة ما شاء الله بالعربيات قالي متفتحش الريداتير دلوقت غير لما تهدى والمهم اكتشفت في الاخر ان المروحة مش شغالة
روحنا لاقرب كهربائي و قعد يغير في سلوك ويعمل حوارات وقالي خلاص تمام المهم وانا راجع مروحة الريداتير فصلت تاني فرحت عن اكفأ كهربائي في المنطقة والذي افتى ان السلك بيحك في الريداتي فبيتقطع فلازم نرفع الريداتير شوية
قولتله ارفع بس الظاهر انه فهم غلط لاني كنت اقصد انه يرفع الريداتير مش يرفعني انا في المصنعية
بس قولت مش مهم كله يهون في سبيل ان فيفي - نسبة لفيات - متعطلش تاني في الشارع وتخضني عليها

والعربية بقت فل الفل بس كالعادة لمدة اسبوع بالكتير وبعد الاسبوع وانا ماشي حسيت ان الفتيس تقيل فرحت لبتاع الزيت اياه قالي جلدة الزيت باظت وعايزة تتغير قولتله غيرها قالي بتتغير عند المكانيكي

فرحت لميكانيكي جديد يمكن يظبطلي الدنيا ويعمل الي في دماغي
المهم بص على الفتيس و غيرلي الجلدة وقالي روح زود زيت الفتيس بس عايز اقولك على حاجة
قولتله خير
قالي علبة المزيكا مقطوعة - او جلدة مش فاكر - وعلبة الدركسيون عايزة تتحشي و العربية عايزة ترصيص وجلب مش عارف ايه عايزة تتغير وتيل الفرامل قرب يخلص
بيني وبينكو انا فرحت وقولت تمام اوي كدا الراجل دا عنده ضمير ومبيحبش يشوف حاجة بايظة ويسكت و هو دا الي كنت عايزه من الاول
المهم روحت جبت الي قالي عليه وقالي عليك وعلى بتاع العافشة يحشيلك علبة الدركسيون ويغيرلك البارات
وبالفعل روحت فبتاع العفشة بقى قالي يا باشا بدل ما تحشي و شوية وهتغير ما تغير على طول وتريح دماغك
قولتله غير يا عم علبة الدركسيون كلها ولا يهزك المهم رحت اشتريت علبة جديدة وبارات جديدة ورجعت وراح مظبط الدنيا كلها

رجعت للميكانيكي قالي روح رصص فرحت رصصت والعربية بقت زي الفل وحسيت اني جددتها بالكامل وقعدت المرة دي فترة كبيييييييرة جدا بدون مشاكل تقريبا 20 يوم مثلا

بعديها الحمد لله وانا بلف خيشت في ميكروباص زي الفل و طبقلي الباب الوراني وشالي الدهان وبقى شكل العربية عار
فروحت لسمكري يرده وبعدين نظبط الدهان وهنا بقى السمكري قالي المعلومة التي جعلتني سعيدا جدا
وهي ان العربية ضارباها البارومة ولازم تتشد كاملة سمكرة والا البارومة هتسحف على الاساسيات والعربية كدا تبقى خلااااص
ومتفهمش ايه الي حصل السمكري نيمني تنويم مغناطيسي ولا ايه فقولتله شد يا عم العربية وخليها فابريقة
قالي لك هذا - محدش يفهم غلط بلك هذا -

المهم في الاخر برضو اداني هذا برضو في المصنعية بس قولت برضو مش مهم
المهم فيفي يبقى شكلها حلو كدا وتشرفنا

وبعدين البوهياجي قالي هترشها عادة ولا هتوديها الفرن ؟
قولتله بخفة دم فرن ايه يا عم احنا هنعملها صينية هه هه هه بس لقيته باصصلي باكتئاب صنايعية كدا بتنحنحت احم احم وقوتله ايه الاحسن
قالي الفرن
قولته اتكل

المهم العربية طلعت بعد السمكرة والرشة اييييه بسم الله ما شاء الله تحفة لدرجة ان واحد من الواقفين قالي هات ارنب وادبحه عليها !!!

مفهمش اوي هو يقصد ايه في الاول بس بعد كدا فهمت انه عايز مصلحتي من العين و الحسد وكدا فقولتله يا عم دي حجات شركيات و الي مقدره ربنا هيكون وبعدين دي 128 يعني مش املة اوي

وبعدين انا مبشغلش فيها غير قرأن او اناشيد او راديو لاني مبحبش الاغاني اصلا

وطبعا جالي زبون وقالي تبيع يا باشمهندس
وغلطة عمري قولتله لا دا انا لسه عاملها ومفرحتش بيها

بداية النهاية :
بعد سنة وكام شهر من شراء السيارة والتي كان محدد ليها سنة واحدة لاتقان القيادة حصل الاتي :
طبعا كلنا بنسوق في شوارع مصر المحروسة واكيد اكيد بنشوف فنانين في السواقة و اكيد الناس كلها بتعرف تسوق ومحدش بيرمي على حد ولا اي حاجة
وفي يوم والعربية ماشية فوق كوبري الجامعة واذ بسواق ماهر جنبي تقريبا نملة قرصته فاتخض راح رامي عليا وان على شمالة فعلشان العربية متتخبطش جنحت على الرصيف ويا دوب الكاوتش لمسه بس و بعد اعتذارات السواق المقروص قررت اسامحة خصوصا ان الحمد لله مفيش اي حاجة ومشيت عادي وبعدين هوووووووووووب
بخ بخ طاخ فشششش
العربية حلفت ما تدور
و بعد يوم عصيب بجد و ركنتها في جراش هناك بالعافية وجبت ميكانيكي تاني يوم راح شافها قالي العلب فكت

انا افتكرتها كلمة سر مثلا وانه يقصد ان البضاعة اتقفشت في المينا او حاجة زي كدا بس هو لما لقاني باصصله وانا مضيق عيني و مش فاهم حاجة قالي
علب الشاسية فكت من الحكة في الرصيف ودا عادي جدا لان ال 128 على علب مش شاسية وحكالي قصة تصنيع الفيات !!
قولتله يا عم دي حكة مفيش دا انا بشوف ناس بتركب الرصيف وتنزل تجري عادي بعربيتها في ايه
قالي الجديد غير القديم يا باشا
قولتله المهم هنعمل ايه
قالي هنقطرها ونعملها في الورشة
وبعد مشوار عصيب من القطر لحم العلب والعربية بقت زي الفل لمدة 15 يوم تقريبا

وانا بدورها سمعت صوت غريب زي تزيق كدا ومش عارف جاي منين والمهم اكتشفت في الاخر ان العربية جابت وش سلندر وهنا بس قررت القرار الي كان لازم اخده من زمان
ابيع العربية على عيبها و عوضي على الله في كل الي اتدفع فيها ونزلت اعلانها على النت وجالي اتصالات بالعبيط لكن كل الي كلمني فقع مرارتي والي يقولي طب انت مصلحتهاش ليه والي تقولي هبعتلك جوزي بس هاوده في السعر علشان ميزعلقيش انا والي قولي هاتها لغاية هنا اشوفها هتعجبني ولا لأ

ودي قصتي مع العربية المستعملة
وطبعا دا كان ملخص سريع لان كان في مشاكل كهربا و ريداتير و ميكانيكا و سيور وحاجات بالعبيط تقريبا كل اسبوع كنت بروح عند صنايعي شكل
بس انا ذكرت اهم المشاكل الي قابلتني و الحمد لله الواحد مبيتعلمش ببلاش و انصح اي حد بيفكر يجيب عربية لو معاه امكانيات يجيب زيرو حتى لو قسط احسن 100 مرة من المستعمل

او لو هيجيب مستعمل ياخد معاه ميكانيكي بيفهم وسمكري عندهم ضمير وامااانه واشدد على هذا وميجبش موديل اقل من 2000 الا لو ضامن العربية تمام .

ودي مميزات العربيات المستعملة :

بتعلمك الصبر
بتعلمك السب واللعن
بتعرفك على ناس كتير وصنايعية
بتوريك جدعنه ولاد البلد
ساونا في الصيف و تخسسيس ببلاش
قوة بدنية ورياضة في الزق
معلومات ميكانيكية مهمة
نظرات احتقار الاخرين بتعلمك التواضع
التفكير في مستقبل افضل
اكل عيش للتاكسي وانت عطلان ودا بيحصل كتير
اكل عيش للصنايعية الي من غيرك هيقفلوا
..................................
عيوب العربيات الجديدة :

الخوف من حقد اصحاب العربيات القديمة
الرفاهية الكتير بتعلمك الكسل
و عكس جميع ما سبق من مميزات العربيات القديمة

وشكرا

................*
لقد حصلت علي انذار مع وقف اسبوع لمخالفه القاعده12 من قواعد المنتدي
رجاء مراجعه قواعد المنتدي

4.55ص
7/10/2011

مشرف 14 ب