تجهيز الشقة بالخشب ولا الفرفروجيه ؟
يا جماعة أنا ليا واحد قريبى بيجهز شقته اليومين دول ولما نزلنا المناصرة نتتفرج على اوض النوم والسفرة والانتريه وسمعنا ارقام فوق طاقته يعنى عرف النوم بتبدأ من 8500 ووقت الجد ممكن توصل ل 7000 مثلا ومش عايز اقولكم التقفيل بشع والخشب شكله يخوف والموضة اليومين دول ان ابواب الدولاب تبقى جرار وحاسس ان الاختراع ده مش معمر زى الباب العادى والحاجات الكويسة اللى تقفيلها حلو بتبدأ من 11000 والله اعلم الخشب كويس ولا لأ وبصراحة المناصرة دى حسيت ان الواحد لو مش فاهم ممكن يطلع منصوب عليه نصب السنين
المهم بعد الاسعار دى جه على بالى واحد صاحبى عندهم مصنع فيرفروجيه افتكرت انه كان عايزنى اجهز شقتى من عنده بس ماحصلش نصيب قلت نطلع نتفرج عنده فلقينا حاجات شكلها حلو وسعرها مناسب جدا يعنى غرف النوم الكويسة تعمل من 3000 ولغاية 4500 على حسب التصميم وشغل الحديد اللى معمول وده من غير الدولاب اللى لازم تعمله خشب وبعدين بيطعموه بالفرفروجيه وعندهم برضو الانتريهات والسفرة شكلها حلو وسعرها اقل من الخشب والاهم ان الخامة امتن وممكن تديلها كذا لون وسهل فكها وتركيبها زى الخشب بالظبط بصراحة نظرتى اتغيرت وقريبى كمان حتى انه ناوى يحجز على أول الاسبوع بس أنا حبيت قبل ما يقدم على الخطوة دى انى اسأل أهل نايل موتورز واستفيد من خبراتهم فى الموضوع ده
هل الراجل يسحل نفسه ويجيب الخشب المتعارف عليه ولا يجرب الفرفروجيه الجديد ؟