عايزين تقييم نيسان تيدا هاتشباك

**Dr.A.Nabil** · 17-05-2008 12:29 AM

ايه يا شباب
ماحدش عنده تقييم للتيدا هاتشباك؟

اصل انا بافكر فيها

بس عايز حد يشجعني

**dr_3eshoo** · 17-05-2008 01:12 AM

يا عم دوس
كنت بقارن بينها و بين الصني
واسعه جدا شيك جدا من الداخل ياباني ميه في الميه 1600 سي سي 118 حصان
ماسقتهاش معرفش عامله ايه في المشي
عيبها من وجه نظري ابعادها مش واضحه من وجه نظري
عربيه ممتازة من وجه نظري

**Dr.A.Nabil** · 17-05-2008 05:01 AM

يا باشا ربنا يخليك
انا أصلي باقارن بينها وبين دايهاتسو تيريوس

ومحتار

بسش تقصد ايه بان ابعادها مش واضحه؟

**Hassan Khalil** · 17-05-2008 06:06 AM

مش حاقدر اقولك تقييم علشان مركبتهاش كتير .. لكن ممكن اقولك بعض تامعلومات من تجربتي .. و تجربة صاحبها ..
* العربية ماشاء الله واااااااااااسعة .. في الامام و في الخلف مع مساحة محترمة للرأس و الارجل و الاكتاف
* الكنبة الخلفية قابلة للطي .. كذلك مسند الكنبة الخلفية يتحرك للامام و الخلف مثل الكرسي الامامي .. و الكنبة الخلفية ككل تتحرك للامام و الخلف مثل الكراسي الامامية مما يساهم في تكبير مساحة الشنطة .
*الشنطة ضيقة نوعا ما في الهاتشباك مقارنة بالسيدان .. لكن يمكن التغلب علي ذلك بتحريك الكنبة الخلفية كما اسلفت .
*العربية سحبها غاية في النعومة و محل تقدير لاصحاب القيادةالمعتدلة و الهادئة .. اما اصحاب القيادة ( المتعفرطة ) فالعربية حتضايقهم شوية .
* صوت المحرك غير مسموع علي الاطلاق و انت داخل الكابينة
* وضعية القيادة مرتفعة الي حد ما ..
* مش حتشوف الكابوت
* تكييف السيارة رائع
* الخامات المستخدمة في الصالون للتابلوه و الكراسي ممتازة .. و التقفيل ممتاز .. و يوجد بها اماكن تخزين عديدة (كونسول و مخدع للذراع بين الكرسيين الاماميين / درج التابلوه حجمه محترم جدا / درج تخزين اسفل زرايرالتكييف تعلوه لمبة ذات اضاءة خافتة / مساحة تخزين صغيرة اسفل الكاسيت مباشرة / مساحات التخزين بالابواب كبيرة )
* استهلاك البنزين عادي .. لا جيد و لا وحش .. الاستهلاك العادي لفئة 1600 .
* عفشة كويسة جدا .. تمتص المطبات باقتدار و تدعم الراحة قليلا مقابل الثبات
* الثبات .. : انا شخصيا ما زودتش عن 100 .. لكن صاحبها بيقول ان ثباتها بيقل بشكل ملحوظ بعد 120 او 130 .
* مفتاحها مش ريموت .. و معاها ريموت منفصل
......................
اتمني اني اكون افدتك علي قدر الاستطاعة
تحياتي

**mahamedaraby** · 17-05-2008 06:15 AM

انا معايا التيدا السيدان

الصراحه كلام الاستاذ حسن وصفها فعلا احسن وصف

وهى عربيه محترمه جدا وكمان الهتش باك شكلها فيه تحفه

وابعدها فعلا مش واضحه يعنى مش هتشوف الكبوت مهما حصل وكمان العربيه واسعه من جوه جدا وسقفها عالى موتور قوى ثبات عالى

وكمان العربيه عاليه على الارض يعنى نادر جدا انك تسمع صوت مضب حك فى العربيه وانت بتاخده

وفيها 2 اير باج وفرامل abs + كل كلام الاستاذ حسن بالظبط

**Dr.A.Nabil** · 17-05-2008 12:54 PM

جزاكم الله خيرا

هي فعلا جميله جدا
وفخمه جدا من جوه
انا روحت نيسان اللي في شارع سوريا في المهندسين واتفرجت عليها من جوه

غايه في الجمال والشياكه

وحكايه ان ابعادها مش واضحه فدي انا متعود عليها لأن كان معايا بونتو وفيها نفس الموضوع

ان شاء الله نيسان تيدا

**Hassan Khalil** · 17-05-2008 01:29 PM

بالتوفيق ان شاء الله ... و نبارك لك قريبا

**dr_3eshoo** · 17-05-2008 05:10 PM

مبروك مقدما يا باشا

**hesham2004** · 18-05-2008 12:25 AM

انا لسه عامل صيانة ال 5000 كم انهارده ، و العربية الى معايا هاتشباك اوتوماتيك
ادائها ممتاز و ناعمة جدا و عفشتها كويسة و صوت الموتور هادى جدا ( و على فكرة المواتير اليابانى بتنعم كل ما العربية تمشى اكتر ) ، الصالون فخم و مواد تصنيعه ممتازة و على فكرة لاحظت ان الصالون مابيسخنش من ركن العربية فى الشمس ، يعنى عزل السقف ممتاز .
استهلاك البنزين عادى ، و العربية متزنة لغاية 160 ، و صالونها واسع جدا ومريح .
من عيوبها ان السيدان من ورا مش حلو اقوى ، و صوت قفل الباب عالى شويه , شنطتها ( الهاتشباك ) صغيرة نوعا ما و لاكن عاليه .
بصفة عامة العربية كويسة و لاكن سعرها عالى شوية .

**Dr.A.Nabil** · 18-05-2008 12:42 AM

مستر هشام
ربنا يخليك
انت شجعتني جدا جدا

بس هي ماتعتبرش غاليه مقارنة بمثيلاتها زي السيتروين سي ثري والبيجو 307

وأعتقد انها تعتبر سعرها رخيص بالمقارنه بمثيلاتها