الموضوع: يا بنات و سايقين عربيات أسمعوا الشتيمه ليكم بودنكم و أبتسموا و دوسوا بنزين

كتير طبعا من الناس بيحصلها مواقف منيله بسبب سواقة البنات أة معاكم أن فيه بنات كتيرة جدا مش بتعرف تسوق أو للأسف مش بتهتم بالميكانيكا فتلاقيها على أى مطلع ولا بتاع نازلة تانى و أنت متضطر ترجع و ممكن يكون وراك أتوبيس ولا بتاع فتلاقى نفسك بتهرب بأى طريقة و الموضوع يبقى مستفز و كأن واحد فى طابور مدرسه أتفقع مقص و وقع على زمايله و كله بيقع ورا


بس برضه زى مافيه بنات مش بتعرف تسوق فيه بنات بتعرف جدا
أبسط حوار حصل لما جيت أمشى فى الحارة إلى فى الشمال و ماشية فى أمان الله لقيت مشروع أو ميكروباص عشان الناس تفهمنى معدى جمبى زى الطيارة لدرجة أننا أتفجعت قولت عادى يعنى و أول ماعدى جمبى بيضرب كلاكس كدة جامد جدا و هوب بدون مقدمات لقيته جه أدامى و بيبقى بطئ قولت دا غبى دة ولا أية أنا ماشيه شمال هوا جه ليه شمال وبيبقى بطئ كمان دى الحارة بتاعة العربيات السريعة دا على حسب ماتعملت و مرة واحدة جه يمين تانى و أنا طلعت أدام لقيته ماشى جمبى بنفس السريعة و بيقولى ماتحاسبى يا أمورة و فاصل شتايم حلو اوى مكملتوش لأن أنا أول ماقالى كدة طيرت أساسا و قولت لحسن يطلعوا حراميه ولا بتاع و بلاش أعيش دور الفيلم الأكشن دلوقتى



حوار تانى و أنا برضة ماشية فى أمان الله المفروض لما بيبقى فيه دوران فى طريق دة مثلا العربيات إلى أخده شمالها فى الطريق التانى مهما كملت فى الحارة دى مش هتدخل على الحاره إلى جايه من الدوران و انا بلف الدوران و ماشية فى الحارة بتاعتى و لسه بنضم للطريق دة ومركزة مع العربيات إلى ورايا جدااااا و لقيت عربيه ملاكى معرفش ليه ساب مكانه و جة يجرى عليا و داخل فيا شمال وبيدينى كلاكس طويـــــــــــــــل و فرمل كدة ببص لقيت العربيه بتاعته من كتر ماهو عايز يفجعنى بيحود عليا طيب مانت كنت ماشى فى حارتك ليه تحود عليا يعنى لدرجة أنه لما جه وقف بقى واقف الكاوتش بتاعة كله بيحود بيه عليا و مشى كدة و جالى و قالى هوا أنتى كويسة ؟ يعنى هوا عامل كل دة عشان يقولى أنتى كويسة ؟ يا حنانك يا أخى



مرة من المرات برضة و الأشارة مفتوحه عند المعمورة و أنا ماشيه و لقيت عربيه راكب فيها عيال سيس كدة و دخلت ادامى برضة فأنا من كتر الفجعة والله مكانش قصدى ضغطت على الكلاكس راح واحد طالع من شباك العربيه بحجمه كله كدة و هيا ماشيه و يقولى يلا يا ........... طبعا النقط دى كانت شتايم بالهبل



نفسى أعرف بقى ليه دايما التعامل معانا بيبقى بطريقة أستفزازية كدة يعنى و المطلوب أننا نعمل أية على فكرة أنا لما بسمع الكلام دة بيتحرق دمى بس دايما بحاول أحافظ على الأبتسامة كدة على سبيل أن محدش يزود فى الكلام دة معايا و أنا أساسا طبيعتى لما بكون مزنوقة فى كارثة ببتسم فياريت ياجماعة والنبى لو حد فيكم بيشتم يبطل الحاجات دى لأن فى الأول وفى الأخر دى ثقافة و عيب لما يكون واحد ثقافتة أنه يغلط أو يعمل حاجة غلط و يحس أنه مش غلطان و يشوف كل إلى حواليه غلطان وبالأخص لو بنت و يا ريت تبطلوا كلمة تلاقى أمك إلى جايباهالك دى عشان ممكن تلاقوا واحدة زيى أمها متوفية ولا حاجة فعيب خليكم مؤدبين