الموضوع: استشاره قانونيه في عقد بيع

انا اشتريت قطعه ارض من فتره بموجب عقد بيع ابتدائي و لان كان هناك مبلغ باقي من تمن الارض فكتبنا ده في العقد و نصينا علي ان باقي مبلغ كذا يدفع في و قت كذا

الحمد لله ربنا قدرني اسدد المبلغ ده في ميعاده

وزي ما المفروض يتم اخدت المحامي من طرفي علشان نكتب العقد النهائي وهناك البايع طلب اننا منكتبش سعر الارض الحقيقي في العقد ونكتب مبلغ اقل بكتير تقريبا الربع بحجه ان ده العرف في المنطقه علشان الضرايب و كلام زي كده

كان ساعتها المحامي مجهز العقد اللي هنمضيه فعلا و طابعه بالسعر الحقيقي و الراجل مضاه علي اساس انه يبقي معايا بس مش هنعمل بيه صحه توقيع و اننا هنعمل عقد تاني فيه السعر اللي هو طالبه و ده اللي يتعمل بيه صحه توقيع و المحامي وافق علي الكلام ده و قالي مفيش مشكله


انا الحقيقه مليش خبره في حاجه زي كده و سألت ناس في المنطقه صدقوا كلام البايع انه محدش بيكتب السعر الحقيقي في العقد وقالوا لي انت تفرق معاك ايه انت اشتريت وخلاص؟

انا مقتنع بأن العقد اللي معاي ملوش لازمه بمجرد ما امضي العقد اللي بالقيمه القليله و اخد عليه صحه توقيع كمان مستحرم الموضوع و حاولت اقنع البايع بشتي الطرق ان ده فيه حرمانيه بس مفيش فايده هو مصّر علي طلبه و الحقيقه هو راجل كبير في السن و تعبان و مش تاجر و لاحاجه بس المعلومه دي في دماغه فمصّر عليها و انا مش عايز اخسره باني مثلا اعمل صحه توقيع علي العقد اللي معايا لانه راجل كويس و محترم وتعامله كويس جدا معايا

انا بقا تخوفي القانوني من نقطه كاتبها المحامي في العقد عباره عن شرط جزائي

نصها :-
اتفق الطرفان علي انه في حاله اخلال اي طرف ببنود هذا لاعقد يكون ملزم بسداد مبلغ ؟؟؟؟ للطرف الاخر كشرط جزائي مع سريان بنود العقد في حقه

هل معني النقطه دي ان ممكن الراجل يفسخ العقد بدفع التمن المكتوب (القليل) بالاضافه للشرط الجزائي و لا الافضل اني اخلي المحامي يشيل الفقره دي خالص من العقد ويبقي عقد بيع بدون شرط جزائي

وكمان معلش استفسار هو عقد البيع ده المفروض يتسمي عقد ابتدائي برضه و لاعقد نهائي

وشكرا

انا مش محامى بس ما عرفش ان فى حاجة اسمها يرجع فى البيع فما فيش قلق، وبعدين مش حضرتك حاطط ايدك على الارض؟ ده لازم وضرورى
انا اعرف اللى بيعملوا تقليل التمن ده لتقليل مصاريف التسجيل لكن حكاية الضرايب دى ما سمعتهاش
ما تسال المحامى اللى كتبلك العقد اضمن