عايز اغير نص الموتور السفلي للكريستاله بنص 1500 او اغيره كله

السلام عليكم

انا معايا لانسر كريستاله 99 و الموتور ابتدي ياكل زيت بغباوه بعد ال 420 الف المهم اني رحت التوكيل القديم عشان اعمل عمره قالولي احنا ممكن نعملك عمره و كل حاجة بس الافضل ليك انك تغير نص الموتور علي بعضة بنص بتاع موتور 1500 و بيركب علي نفس وش السلندر و الكاربراتير و كل حاجة

انا فضلت ادور لحت ما لقيت واحد عمل كده فعلا و قالي ان العربية بقت ممتازة و سحبها بقي احسن


دلوقتي اللي محيرني جدا : هل اجيب نص موتور فعلا ولا اغير الموتور كله بواحد استيراد 1500 كامة واحده لان الاتنين كامة الكاتينة بتاعته مختلفة عن كاتينة الواحد كامة و كاتينة الواحد كامة هي هي بتاعت الموتور اللي عندي فمتوافرة في التوكيل و السوق

و فيه نقطة تانيه : الموتور الاستيراد ده انا عايز اجيبة بفتيسة اوتومتيك و بالتالي هغير الضفيرة و العدادات و هدخل في موال كبير

انا محتار جدا و ياريت تساعدوني لاني زهقت من العربية جدا

حضرتك انا مغير الموتور بواحد 4g15 كامه واحده وانصحك انك تسقطه موتور جميل وهادي هو مش مفتري زي الاتنين كامه طبعا بس قطع غياره منتشره زي السيور الفلاتر اغلبها تنفع بتاعت ال 1300 الموتور هو بيطلع حوالي 93 هورس باور موتور لذيذ وشكله احسن من الاتنين كامه سقطه ومتقلقش ان شاء الله يعجبك

غيره كله طبعا
بس لو هتركب اوتو يبقي الأفضل 2 كامة
والتسقيط سهل جدا وكل حاجه متوافره
وبالنسبه للتغيير من منوال لأوتو فا الأمر سهل
ولو وقفت في حاجه قولي انا الحمد لله مسقط كذا مره :)

اقتباس:

---

المشاركة الأصلية كتبت بواسطة hema_lancer

غيره كله طبعا
بس لو هتركب اوتو يبقي الأفضل 2 كامة
والتسقيط سهل جدا وكل حاجه متوافره
وبالنسبه للتغيير من منوال لأوتو فا الأمر سهل
ولو وقفت في حاجه قولي انا الحمد لله مسقط كذا مره :)

---

طيب ممكن طلب انا الى عاوز اعرف ايه هى الحاجات المطلوبة الجديدة و الى هتحتاج تتعدل علشان احول من مانيوال لـــاوتو و تقريباا بتبقى بكام على العلم انى الى عندى موتور ستوك 1300

اللي هتحتاجه زياده
عدادات
ودواسه فرامل
وطبه لدواسه الدبرياج
ودراع فتيس بالتيش بتاعه
وطبعا رداتير
دي الحاجات اللي بتبقي زياده
لكن التكلفه لازم تقول ناويت علي انهي موتور

انا نويت علي موتور 1500 كامه واحدة عشان قطع الغيار و يكون بفتيسة اوتوماتيك التكلفه هتكون كام تقريبا و الوقت و انا ناوي ابدل الموتور يعني ادفع فرق هيبقي الفرق كام تقريبا ؟

الف شكر مقدما

تقريبا 4500 بالتركيب

لا كده شكلي هجيب نص موتور بس كده غالي اوي عليا

بلاش نص موتور هتندم
انت ممكن تجيب 1500 وتخليه مانوال عادي
كده ممكن يعمل 2500 تقريبا

هندم في ايه ؟ و 2500 بالتركيب و بالبدل و كل حاجة ؟ و هغير الفتيس بواحد مانيوال تاني ولا نفس الفتيس ؟ و الموتور كده هيبقي انجكشن و هغير الضفيرة و العدادات ؟

معلشي انا بسأل كتير بس انا عايز ابقي مطمئن

اقتباس:

---

المشاركة الأصلية كتبت بواسطة mitsukero

هندم في ايه ؟ و 2500 بالتركيب و بالبدل و كل حاجة ؟ و هغير الفتيس بواحد مانيوال تاني ولا نفس الفتيس ؟ و الموتور كده هيبقي انجكشن و هغير الضفيرة و العدادات ؟

معلشي انا بسأل كتير بس انا عايز ابقي مطمئن

---

هتندم علشان انت كده كده هتروح المرور وهتغير بصمة يبقي هات موتور اكبر بقي وعلي فكره لو جبت نص موتور هتصرف باردو قد اللي هتصرفو في التغيير
و 2500 بالتركيب والبدل وكل حاجه
والفتيس هيفضل زي ما هو مفيش مشكله
والموتور هيبقي انجيكشن وبييجي بالضفيره
ومش هتغير عداد هيفضل زي ما هو