مساعدة فى طابعة hp deskjet 845 بعد اعادة ملأ الالوان.... لون قاطع

السلام عليكم ورحمة الله وبركاته

تحية كبيرة لجميع اعضاء أحلى منتدى

و طبعى لما بيكون عندى استفسار و حاجة مدوخانى أكيد هلاقى الحل عندكم باذن الله


عندى طابعة hp deskjet 845 و مستخدمتهاش من حوالى 5 اشهر

و كارتريدج الحبر تقريبا نشف( الاسود و الالوان ) ..... فرحت التهاردة علشان املاه قوم ايه ......

الاسود اتملى و الحمد لله اما الالوان فتم ملؤه و لكن اللون الاحمر قاطع !!! هما قالولى كده و قالو برده ان كده الكارتريدج اتكل على الله ....و يعوض عليا ربنا

و لما بجرب الكارتريدج على منديل بتعمل خطين اصفر و ازرق و الاحمر فعلا غير موجود على الرغم من انه تم ملؤه


فهل من مساعدة ؟؟ و هنيالك يا فاعل الخير

حاول طيب تبل المنديل بأي سبرتو (برفان مثلا)
وامسح بيه الحباره مكان ما بينزل الحبر
لو مجبش باردو يبقي خلاص نشفت

عموما مع تجارب عديدة جدا مع مختلف الانواع الالوان مبتتمليش ولو اتملت ياما تشتغل ياما لا وغالب بنسه 80% مش هتشتغل الاسود ممكن تتملى الالوان اشترى مكانها

الالوان ملتها قبل كدة و اشتغلت !!

انا علي طول بملي الوان واسود
وانا عندي في الشركة 5 برنترات وبملاهم كلهم

انا على طول نتيجه ملى الالوان بتطلع مش نافعه او بتبوظ

بص دي حركة انا بعملها بنفسي جربها وقولي على النتيجة هات كنكة وحط فيها مية وحطها على النار واستنى عليها لما تشد حيلها على النار شوية وبعدين غطس الشريحة بتاعت الكاتريج في المياه المغلية عشان تذيب الحبر المتراكم وبعدين جرب لو اشتغلت كان بها لم يكن يبقى انا لله وانا اليه لراجعون بس خلي المياه تسخن شوية ..

هات براد شاي وحط فيه حبة مية قليلة

البخار حيطلع من بوز البراد

حط الكاردتردج امام البخار وامسحها بمنديل كل شوية

المفروض الطريقة دي تلين الحبر

بلاش تحطها في ميا

طي سؤال انا الكرتج عندى على طول بيبوظ الكلام دة يمشى مع ال d2500

اقتباس:

---

المشاركة الأصلية كتبت بواسطة sayed911

بص دي حركة انا بعملها بنفسي جربها وقولي على النتيجة هات كنكة وحط فيها مية وحطها على النار واستنى عليها لما تشد حيلها على النار شوية وبعدين غطس الشريحة بتاعت الكاتريج في المياه المغلية عشان تذيب الحبر المتراكم وبعدين جرب لو اشتغلت كان بها لم يكن يبقى انا لله وانا اليه لراجعون بس خلي المياه تسخن شوية ..

---

+1

كنت داخل اقول كده بس حطها الاول في كيس بلاستيك وسيبها حبه

جربتها قبل كده في كارتيدج اسود واللي بيملو الحبر قالولي خلاص ده انتهى وجربتها ورجع اشتغل زي الاول

جزاكم الله خيرا جميعا
هجرب و ارد عليكم

رحت بالحبارة لمركز صيانة طابعات
قاللى هننضف الحبارة ... و نقع الحبارة تقريبا فى محلول مش عارف هو ايه ( مكنتش موجود معاه ) و يمكن سر الصنعة
و الحمد لله اللون جه .... يعنى بقى 3 الوان ... بس المشكلة ان الالوان بتطبع مش مضبوط

يعنى الاحمر اللى كان فيه المشكلة بيطلع لون غريب مرة اخضر مرة بنى لكن الاصفر و الازرق مضبوطين

الغريب ان الحبارة كلها كانت منقوعة فى المحلول ... اشمعنىالاحمر هو اللى مهيس كدة

و شكرا لاهتمام حضراتكم

بص انا ليا وجهة نظر عمر الكاتريج ما بتحتفظ بالكوالتي بتاعتها يا دكتور عشان كده انا بفضل في الطابعات الكانون افضل دقة بجد ! افضل من اتش بي بكتير بأمانة ولكن هوة شوفتهم قبل كده بيكون معاهم حقنة 6 سيسي بيبقى فيها محلول شفاف كثيف بيحقن بيه الشريحة المعدينة برضه يمكن نفس الفكرة