يا جماعه أنا شفت النهارده منظر بشع ... من كتر الغل اللي جوايا حبيت أقوله
السلام عليكم ...
النهارده أنا شفت منظر بشع علي الأقل من وجهة نظري قطع قلبي و خلاني أخرج عن شعوري و أشخط في الناس ...
العماره اللي قدامنا يظهر كان فيها كلبه والده كلاب كتير صغيرين و يظهر ان الكلاب دي كانت مصدر ازعاج للسكان ...
المهم يظهر برده ان أحد سكان العماره تطوع و قرر انه يخلص من الكلاب الصغيره ( أوي ) اللي لا حول لها و لا قوه و لكن بطريقه في منتهي الوحشيه ...
طلع لم الكلاب الصغيره دي في جردل كبير و تخيلوا عمل ايه .. رماهم من الدور السادس علي الأرض و لك أن تتخيل صوت الكلاب و هي بتأن و بتطلع في الروح لحد ما ماتت ...
متهيألي كان ممكن يخدهم يوديهم أي حته و يسبهم ياكلوا ويشربوا حتي من الزباله و يبقي نصيبهم علي ربنا ...
ناس كتير ممكن تقول يا عم ده البني أدم في بلدنا رخيص اشمعنا يعني الكلاب ...
بس هو احنا لو شعب محترم ما كانش البني أدم الوحشي السادي ده عمل ف الكلاب دي كده ... و البني أدم ده يستحق يتعمل فيه أكتر من كده و يستحق انه يبقي رخيص لانه مش محترم و مش متخيل هو عمل ايه في روح ربنا خلقها ..
المشكله ان كان بيبصلي و هو بيرميهم و هو بيبتسم و كأن انه مش بيعمل حاجه غلط ولا حاجه ....
معلش اعذروني يمكن ألفاظي كانت قويه شويه بس اصلي محروق و باتخنق من كل اللي بيئذي حيوان بريء و خصوصا يعني الكلاب الصغيره دي يعني مش مفترسه و هاتاكل الناس في الشارع ..
أنا الحقيقه قلتله في وشه حرام عليك و حسبي الله و نعم الوكيل ...
هو أنا يا جماعه غلط ؟ هو الحكايه دي انتوا شايفين انها عادي و ما كنش المفروض أقول له كده ؟ دا أنا يا جماعه جسمي بيقشعر لما باشوف أصحاب الكارو بيعملوا ايه في الحمير بتاعتهم و طبعا حدث ولا حرج ...
ما هو يا جماعه صاحب الكارو ده أو البني أدم اللي أنا شفته النهارده ده النهارده بيعمل كده في كلب وللا حمار ... بكره لو مسك منصب مهم هايعمل أكتر من كده في الناس ...
و بعدين الغرب اللي بينادي برعاية الحيوان و بيدعوا ان عندهم قيم و مباديء أكتر مننا في الموضوع ده لو احنا عرفنا ان الاسلام بيؤمرنا برعاية الحيوان أكتر من أي قم دنيويه تانيه ما بتقول و عملنا بكده هانبقي أحسن منهم كتير ...
عارف ان في ردود كتير هاتيجي تقول كل ده عشان الكلاب و ناس ممكن تتهمني بالتفاهه بس بجد أنا متغاظ أوي و كان نفسي أحكي لحد و ما لقتش أحسن منكم أحكيله ...
و أكيد عطشان ان أسمع ردودك عشان نقدر نعرف احنا بنفكر ازاي ...
أسف اني طولت عليكم ...