تحذير هام من طرق سرقات السيارات

عرض للطباعة

10-10-2011, 09:50 PM
magedomran

تحذير هام من طرق سرقات السيارات

دلوقتى فى ناس بتسرق العربيات وانت ماشى على اى طريق ازاى بقا
وانت فى طريق سريع عريبه تخبط فيك من ورا او تخبطك من اى جنب
طبعا انت هتقف علشان تشوف العربيه فيها ايه وتطمن عليها
وهما كمان هيقفوا معاك وينزلو
بس يثبتوك باسلحه وياخدو العربيه منك وكل اللى معاك وكمان تليفوناتك
واللى حصل دة حصل على الطريق الزراعى فعلا وانا بقولها علشان نعرف ونفهم الطرق دى
اللى ادهى من كدة
انهم بعد كدة اتصلوا بيه وقالو لو عايز عربيتك هات 30 الف جنيه
المشكله انه راح فعلا ومعاه اتنين ضربوهم واخدو منهم الفلوس
ربنا يسترها علينا يارب
حسبنا الله ونعم الوكيل
10-10-2011, 09:59 PM
WalidAdel

ياباشا جزاك الله خيرا علي التنبيه
10-10-2011, 10:02 PM
vet mitcho

شكرًا على التنبيه بس الواحد لازم يمشي برشاش في العربية
10-10-2011, 10:09 PM
Lion_Heart

اقتباس:

المشاركة الأصلية كتبت بواسطة magedomran

دلوقتى فى ناس بتسرق العربيات وانت ماشى على اى طريق ازاى بقا
وانت فى طريق سريع عريبه تخبط فيك من ورا او تخبطك من اى جنب
طبعا انت هتقف علشان تشوف العربيه فيها ايه وتطمن عليها
وهما كمان هيقفوا معاك وينزلو
بس يثبتوك باسلحه وياخدو العربيه منك وكل اللى معاك وكمان تليفوناتك
واللى حصل دة حصل على الطريق الزراعى فعلا وانا بقولها علشان نعرف ونفهم الطرق دى
اللى ادهى من كدة
انهم بعد كدة اتصلوا بيه وقالو لو عايز عربيتك هات 30 الف جنيه
المشكله انه راح فعلا ومعاه اتنين ضربوهم واخدو منهم الفلوس
ربنا يسترها علينا يارب
حسبنا الله ونعم الوكيل

فين يا باشا على الزراعى
10-10-2011, 10:42 PM
magedomran

بعد قويسنا فى اتجاه بنها
10-10-2011, 10:50 PM
icehearted girl

طب افرض فعلا ناس خبطت العربية بدون قصد..اسبهم واجري؟؟؟ دول هيقولوا عليا هبلة
10-10-2011, 11:03 PM
mohammedabdallh

اقتباس:

المشاركة الأصلية كتبت بواسطة icehearted girl

طب افرض فعلا ناس خبطت العربية بدون قصد..اسبهم واجري؟؟؟ دول هيقولوا عليا هبلة

كلام مظبوط
بس الواحد يعمل ايه دلوقتى يعنى يشيل ايه فى العربيه
ولا الواحد احسن ميخرجشى من بيته خالص احسن
وبرضه العربيه ممكن تتسرق من تحت البيت
10-10-2011, 11:14 PM
Donzi

اقتباس:

المشاركة الأصلية كتبت بواسطة icehearted girl

طب افرض فعلا ناس خبطت العربية بدون قصد..اسبهم واجري؟؟؟ دول هيقولوا عليا هبلة

في الظروف اللي احنا فيها دي تسيبيهم و تمشي فعلا
10-10-2011, 11:20 PM
gebreel

لو بنت تفضل في عربيتها و تسيبهم و تمشي

لو راجل قبل ما ينزل من العربية يبص على نوعية الي راكبين لو في قلق منهم يشاورلهم خلاص خلاص و يتوكل لو محترمين او عيلة ينزل يبص مفيش مشكلة بس بحذر بردو و في نفس الوقت ينزل و المفتاح في ايديو مش في العربية
10-10-2011, 11:27 PM
icehearted girl

هي ميزة ف حالة واحدة...لو اناللي خبطة العربية..والاقي المخبوط يسبني ويمشي....

تفتكروا هيخاف مني ومش هينزل؟
10-10-2011, 11:30 PM
M.Elgergawy

لا حول ولا قوة الا بالله
10-10-2011, 11:34 PM
ashouhdy

اقتباس:

المشاركة الأصلية كتبت بواسطة icehearted girl

هي ميزة ف حالة واحدة...لو اناللي خبطة العربية..والاقي المخبوط يسبني ويمشي....

تفتكروا هيخاف مني ومش هينزل؟

ههههههههه حلوة
10-10-2011, 11:39 PM
MOUSTAFA_SAAD

جزاك الله خيرا على التحذير
10-10-2011, 11:43 PM
AutoTycoon

هو الزراعي ازاي ممكن يحصل فيه حاجة زي كدا و هو بيبقى زحمة اوييييييييييييي ؟؟ كان فين عالزراعي يا فندم :(:(؟؟
11-10-2011, 12:21 AM
magedomran

يا جماعه انا والله مش مصدق اللى بيحصل دة
القصه اللى انا حكيتها دى حصلت مع واحد قريب واحد صاحبى فى الشغل من اسبوعين تقريبا
بس بصراحه اللى خلانى اعمل الموضوع دة انى قصه تانيه حصلت النهاردة الصبع على الدائرى مع ابن عمتى شخصيا والله
بس انا لسه عارف التفاصيل حالا فقولت اقول للناس علشان انبهم
النهاردة الصبح ابن عمتى رايح شغله الصبح الساعه 9 وهو على الدائرى بين نزله الموئسسه وباسوس فى اتجاه الوراق
عربيتين زنقوا عليه لحد ما وقف وعربيه وقفت قدامه والتانيه وراه ونزلو وهو بمنتهى البراءه بيقول فى ايه لقى واحد طلع رشاش وحطه فى وشه وقاله انزل
راح نازل وغموه وحطوه فى الدواسه وره
ورموه فى حته اسمها اجا
بعد ما اخدوا منه كل حاجه
والحمد لله انه رجع سليم بس الله يكون فى عونه وربنا يصبره
حسبنا الله ونعم الوكيل
11-10-2011, 12:24 AM
magedomran

انا كل يوم بسمع بلاوى بتخلى الواحد يترعب من حالنا
ومش عارف الواحد يعمل ايه يعنى يمشى برشاش ولا ميخرجش بره البيت بقا والحياه تقف
ولا ايه
حسبنا الله ونعم الوكيل
حسبنا الله ونعم الوكيل
11-10-2011, 12:42 AM
hic

انا كمان بحذر علشان الموضوع ده حصل مع واحد قريب زميلى فى الشغل
يوم الخميس اللى فات الساعه 9 بالليل كان ماشى فى شارع نبوى المهندس فى اسكندريه و قدام مستشقى الصدر كان فيه مطب طلع عليه اتنين و صعقوه بالصاعق الكهربائى و خطفوه بالعربيه و سبوه بالملابس الداخليه فى الكنج مريوت العربيه لانسر و الحمد لله انهم لم يصبوه باذى
فعلا العمليه زادت عن حدها و اى حد ماشى ما يقفش لو حد قرب منه حتى لو وصل بيه انه يخبطه
11-10-2011, 12:49 AM
dr_abooody

سمعت ان بيحصل كتير على الدائري لو حد خبطك و لا تقف استعوض ربنا
11-10-2011, 12:58 AM
AutoTycoon

اجا دي تبع دقهلية !!
11-10-2011, 01:00 AM
magedomran

يا جماعه وانا بدور على النت على جهاز تتبع السياره لقيت الموضوع ده عندنا فى نايل موتورز
http://www.nilemotors.net/Nile/193285-a.html
شركه فى مصر بتركبه الجاهز دة بال 1500 جنيه
ايه رايكم فى الموضوع ده حد جربه؟
11-10-2011, 02:07 AM
mmharoun

ربنا يسترها علينا وشكرا على المعلومة
11-10-2011, 02:15 AM
khpopo

لاحول ولا قوة الا بالله العلى العظيم
سبحانك اللهم وبحمدك ، أشهد أن لا إله إلا أنت أستغفرك وأتوب إليك
11-10-2011, 02:42 AM
Nistelrooy

لو الخبطة صغيرة الاحسن الواحد مش ينزل ومش هترجع الخبطة لما تنزل ,, احسن حاجة الواحد يكمل مشي ومش بعيد يفتح علي 200 ويخلع خالص من قدامة ,,

شكرا علي النصايح
11-10-2011, 01:31 PM
Hyper3G

السلام عليكم ،
حصل معايا شخصيا موقف شبه كده اول امبارح فى شارع 9 بالمقطم حوالى الساعة 5 بعد العصر .. جه جنبى ميكروباص سوزوكى فان لونه ابيض .. انا ماشى عادى عالشمال وهو جنبى خبط فى مرايه الباب اللى عاليمين .. المرايه اتقفلت شويه .. مفيش مشكلة بتحصل كتير .. فمشيت وكملت .. لاقيته جه جنبى فبصيت وشاورتله بايدى بما معناه امشى بالراحة وكملت عادى .. وكان راكبه واحد شكله مش مظبوط .. المهم مشيت شويه لاقيته بيجرى بسرعه عشان يحصلنى وبيقولى استنى .. سبته جه قدامى ووقفت وراه بحسن نيه بس منزلتش من العربية وكنت مشغل التكييف .. فتحت نص الشباك اللى عاليمين عشان اسمعه ، لاقيته نزل ومعاه اتنين وجاى يقول انت طبقتلى الجنبين بتوعى! عرفت انه بيستعبط وجاى يرمى بلاه ..طبعا كان المطلوب انى انزل .. فهمت القصة وقولت اسيبه وامشى ، روحت راجع متر لورا عشان اطلع منه وحتى لو وقف هادوس عليه .. راح دخل نفسه من نصف فتحه الشباك اللى مفتوح ومكنتش قفلتها تانى .. مشيت بيه وهوا متعلق على اساس يخرج او هاطلع بيه كده عالقسم مش هاقف طبعا ، المشكله انه كان عايز يوقفى بأى طريقة راح مسك الفتيس عشان يفصله (العربية اوتوماتيك) كملت شويه لحد ما مسك فرامل اليد ورفعها ، العربية لفت حوالين نفسها لفة كامله وحاول يشد المفاتيح منعته ، الموقف كله فى حوالى 2-3 دقيقة والمكان ضيق جوا العربيه وانا بامنعه من ايقاف العربية ومش عارف اخد راحتى انى اسوق او اخبطه فى وشه حتى ، المهم العربية وقفت بعد الدوران ده ، هنا بقا الناس اتلمت والعربيات وقفت ، لحسن الحظ الناس كانت متابعه الموقف وكله جاى احنا شايفين كل حاجه والراجل دا معملكش حاجة (الكلام موجه للراجل بتاع السوزوكى) خرجو الراجل من العربية والواد ابتدى يجيب ورا فى الكلام
ومستنتش ادخل تانى فى حوارات ومشيت.

الحمد لله طبعا ربنا ستر لان لو المكان كان فاضى ومحدش وقف ساعتها كان الموقف هيبقى صعب لانهم تلاته مع بعض ، اكيد كنت هاتثبت تمام

وانصح اى حد واتفق مع كلام الاعضاء اللى بتقول فى الموضوع ده ان الواحد مينزلش من عربيه لما يكون فيه اى شك او قلق او استعباط ، لأن الهدف انه يخليك تنزل من العربية بأى طريقة
طبعا مع عدم ترك الزجاج مفتوح عشان ميحصلش زى اللى حصل معايا
طبعا انا من الاتباك وسرعة الموقف نسيت اخد رقم العربية دى ، اللى ممكن تكون مسروقة طبعا ولكن ده اضعف الايمان ولو الرقم ده معايا كنت هاعمل بيه محضر .
11-10-2011, 01:57 PM
DODICANDY

‫×گ×™×ڑ ×’×•×.×‘×™×. ×¨×›×‘×™×. ظƒظٹظپظٹظ‡ ط³ط±ظ‚ظ‡ ط§ظ„ط³ظٹط§ط±ط§طھ‬&lrm; - YouTube
11-10-2011, 01:57 PM
magedomran

اقتباس:

المشاركة الأصلية كتبت بواسطة magedomran

يا جماعه وانا بدور على النت على جهاز تتبع السياره لقيت الموضوع ده عندنا فى نايل موتورز
http://www.nilemotors.net/nile/193285-a.html
شركه فى مصر بتركبه الجاهز دة بال 1500 جنيه
ايه رايكم فى الموضوع ده حد جربه؟

محدش رد على الموضوع دة؟ بتاع جهاز التتبع ايه رايكم؟
13-10-2011, 12:48 AM
alladinad

جزاك الله خيرا
13-10-2011, 12:52 AM
pharonicking

دى مصيبة كبيرة
13-10-2011, 05:34 AM
magyver

اجاااااااااااا دة عندنااااااااااا لا اله الا الله