الموضوع: تجربة تغيير الزيت Valvoline انهارده

السلام عليكم يا رجالة

أنا انهارده الحمد لله غيرت الزيت بـ Valvoline و لسة الزيت نفسه مجربتوش قوي عشان أحكم على كفاءته إنما الصراحة خدمة التغير نفسها عجبتني قوي كمستوى الشغل و اسلوب التعامل..

هو أنا كنت اتصلت بيهم امبارح عالخط الساخن و ردت عليَّ واحدة خدت البيانات و سألتني أنا عرفتهم منين قلتلها من نايل موتورز و كنت متفق معاهم يجولي انهارده الساعة 2 ظهرا عشان عندي جيش الصبح بس لقيت نفسي هتاخر فكلمتهم و أجلت المعاد للساعة 4 و ردوا عليَّ بكل احترام ..

و فعلا عالساعة 4 لقيت الموبايل بيرن رديت لقيته الراجل بتاع الشركة بيتأكد من الشارع و لما وصل كلمني قال لي إنه تحت و قلتله نزلك و قال لي على مهلك وكده يعني اسلوبه مهذب قوي في الكلام وده عامة يعني كان واضح في كلامه معايا طول الوقت ...

المهم و نزلتله و لقيت فعلا العربية زي اللي في الإعلان و لقيته بيديني ظرف عليه اسمي و فيه فواحة و كارت العضوية المؤقت عشان لسة الكارت الأساسي بيتبعت بالبريد و 2 brochures كده عن الشركة والزيت ال synPower و بتاعة كده على شكل العربية بتاعتهم أنا مش عارف إيه فايدتها بالضبط بس لطيفة يعني و عامة الحركة دي ادتني انطباع اولي حلو عن المستوى بتاع الشركة .

وديته عند العربية و فتح عربيته و طلع منها جهاز الشفط و أول ما طلعه أنا قلقت لاني لقيته بيتوصل بـبطارية العربية و خفت ليخلص البطارية بتاعة العربية بس لقيته طلع بطارية من معاه و وصل عليها و بيفرش زي سجادة جلد كده عالحتة اللي هيحط عليها الجهاز عشان مايوسخش حاجة (حركة بسيطة بس عجبتني برده ) و سألني أنا سمعت عنهم منين فقلتله برده من منتدى نايل موتورز ...

بعد ماخلص شفط طلع الزيت من الكراتين من عربيته MaxLife 10w40 ده اللي أنا حطيته و وراهولي الأول اتأكدت إنه متبرشم و أصلا الجراكن شكلها محترم مش أي كلام و حطينا تقريبا 4 لتر و نص و بعد ما خلصنا قاس الزيت و دورت العربية شوية كده ملحقتش فيهم طبعا أحكم عالزيت نهائي بس أظن إن الموتور بقى أنعم سِنة ...

و بعدها قال لي هتدفع كاش ولا فيزا قلتله لأ كاش بس كويس إنه جاهز يعني لو حد عايز يدفع فيزا و قال لي ثانية أطبعلك الفاتورة أنا استغربت و قلت هيطبعلي فين ده لقيته ماسك زي PDA كده و بيعمل عليه و لقيته طبع فاتورة صغيرة كده فعلا على مكنة صغيرة زي بتاعت الفيزا دي إن ماكانش هي والحساب كان 240 جنيه 190 الجركن ال 4 لتر و 50 الجركن ال 1 لتر ...

و اديتله 250 جنيه و قولت اسبله الباقي الصراحة لإنه كان ولد محترم قوي و كويس اسمه فتحي بس قال لي ممنوع ناخد tips وده برده حسسني إنها شركة محترمة بس أنا اصريت يعني و بعدها قال لي استأذنك بس 5 دقائق الم فيهم حاجتي قلتله خد راحتك يعني ده الشارع :D و طلعت أنا بقى ...

هو بس الحاجة الوحيدة اللي يمكن مكانتش كويسة إنه ماكانش عارف يحط الزيت منين في عربيتي قال لي معلش أنا أصْلي متعملتش مع العربية دي قبل كده و قعد يدور شوية بس ماكانش عارف وانا اللي قولتله اكمني كنت فاكر بالتقريب كده من لما كنت بغير الزيت قبل كده ...

في النهاية أنا صحيح لسة مجربتش الزيت و لسة معرفش كفاءته إيه بس انبسط قوي من مستوى الخدمة والتعامل فعلا و ربنا يسهل ويطلع الزيت كويس واكمل معاهم إن شاء الله ...

السلام عليكم يا رجالة معلش النت عندي كان بايظ
أولا ألف شكر يا رجالة و الله يبارك فيكم و هو فعلا زي مابتقولوا المعاملة الكويسة والمحترمة بتفرق كتير فعلا و ربنا يسهل ويفضلوا كده على طول إن شاء الله ...
و أنا عربيتي بيجو 405 موديل 98 و عاملة 130 ألف و كنت بحط شل الأصفر اللي بيعد 5000 و لما حطيت فالفولين حسيت يمكن الموتور بقى أنعم شوية يمكن خصوصا و هي العربية بارده في الأول بس هو يكفي إنه تقريبا قريب من شل عامة و هو طبعا أنا برده هأقدر أحكم عليه أكتر لما أعمل به 5000 كيلو ولا حاجة ...
إنما ده واقف ارخص كا سعر بنسبة للكيلومترات اللي بيعدها و كمان ده مستورد و فيه شوية تخليقي ماهوش معدني تماما و بيتغير تحت البيت فهو لو كمل ال 10 الاف كويس يبقى إن شاء الله الواحد يكمل به لإن كده شل هيبقى مفيهوش أي ميزة زيادة من ناحية السعر أو الكفاءة ...
و بنسبة لهما بيحاسبك بالجراكن عادي زي أي نوع زيت فيه جركن 4 لتر و فيه 1 لتر و حسب بقى عربيتك بتاخد قد إيه