نفسي سواقين الميكروباصات يبقوا رجالة

**AutoTycoon** · 11-10-2011 03:21 PM

عاوز اسمع ارائكم ولو كنتم في الموقف ده كنتم هتعملوا ايه.

هتخانق مع واحد معندوش حاجة يخسرها ؟؟؟

**MASERATI** · 11-10-2011 03:43 PM

السلام عليكم و رحمة الله و بركاته

يا باشا, لو كانوا رجالة, ماكانوش اشتغلوا سواقين ميكروباص, دول, هما و سواقين التاكسى و بالذات عندنا هنا فى المنصورة, من أحقر و أوطى فئات المجتمع, المهم, أنهم مفكرين نفسهم ناس فاهمين و ناس كلاس و أنهم أذكيا و كل الناس التانية, مابيفهموش.

عندنا يا باشا فى المنصورة, أغلبهم بيكون من مناطق بييييييييييئة أوى, زى كفر البدماص و شارع الحوار و محمد فتحى و المدير و مناطق تانية و دول بيكوتنوا غالبا, مؤهلات متوسطة و بيكون عندهم حقد طبقى رهييييييييييييييييييييييي يب جدا و ده لأنهم بيشوفوا دايما أبناء الطبقة الميسورة راكبين عربيات ملاكى و ماشيين يتدلعوا بيها و فضلوا على الوضع ده لحااااااااااااااااااد ماحصل حاجتين:
1 - بقى فيه تاكسيات زيرو بالتقسيط, قام كتير منهم دفعوا مقدمات و جابوا تاكسيات عشان يمشوا بيها فى الشوارع و ينقوا الزباين اللى تعجبهم و اللى مايعجبهومش, يسيبوه و يمشوا, بصرف النظر عما اذا كان راجل مسن و لا ست و معاها عيال و تلاقى الواد منهم مظلط شعره و وشه -أستغفر الله العظيم- مصدى من قلة الغسيل, و تلاقى فى ايده السيجارة و فاتح الازاز تلتين فتحة و حاطط دراعه على الازاز و سايق التاكسى بكل اباء و شمم و تناكة, كما لو أنه سايق bmw z8 !!!!!!!!!!!.
2 - انتشار الموتوسيكلات الصينى و اللى مكنت الفئة دى من أنهم يجيبوا موتوسيكلات و يحطوت عليها كاسيت عالى أوى للفت الأنظار و بييجوا يلفوا بيها مخصوص فى الأماكن الراقية فى المنصورة, قال يعنى, احنا كمان بنركب أهوه

.

فكرتنى بواحد كان شغال معانا فى الصيدلية و كان من شارع الحوار من عندنا من المنصورة و بعد ما اشتغل معانا أسبوعين, اكتشفنا أنه بيبرشم و مدمن و بعدين اكتشفنا أنه حرامى كمان, لما جه يمشى, قلتله, أنت ليك عندنا حساب 3 أيام من الشهر الجديد, قاللى بكل تناكة, أنه مش عايزهم و أنه متنازل عنهم و عاوزنى أطلعهم لله, و بعد يومين جه تانى و قاللى, أنه عاوز بقية حسابه, قلتله, مش أنت قلت, نطلعهم لله !!!!!!!, قاللى, أنه ماقالش كده و فضلت وراه لحد ماحلف بالله العظيم أنه ماقال كده !!!!!!!!!!, ساعتها, أنا قلتله, أنه أدام اتنازل عن رجولته و حلف يمين مغلظ بالله العظيم أنه ماقال كده, يبقى حلال عليه الفلوس :b4_388:

هما فئة واحدة, لازم تترش بالبيرسوووووول .

**Abdm** · 11-10-2011 05:27 PM

المشاركة الأصلية كتبت بواسطة elawany13

10- الرعونة فى السواقة وفرد العضلات فى وسط الزحام والشوارع الواقفه وعلى الطرق السريعه
11- تعديل الاكصدامات الفيبر وبيركبوا اكصدامات حديد عمولة وديفندرات وخبط فى عربيات خلق الله (بالذات الميكروباصاتgmc العالية)
12- القذارة وقلة الأدب وسب الدين

إلا من رحم ربى
فيهم ناس محترمة وعلى قدر عالى من اللياقه ولكن قلة قليله جدا

اللى بستغربله فعلا
سلبية الركاب اللى فى الميكروباص
ازاى يسمحوا لفرد واحد او اتنين يمشوا كلمتهم وبدون اى حق على 14 راكب على الأقل
فى زيادة الاجرة او تقسيم المسافة

فى الوقت الحالى ما فيش الآوبشنز دة أصلا . هو من بداية ركوبك بيقولك أنا رايح لغاية نصف الطريق وهارجع عايز تركب أهلا وسهلا مش عايز براحتك شوف حاجة تانية . وبناء علية كل الركاب اللى بيركبوا معاة وموافقين من البداية هو دة طريقهم ومش محتاجين أكتر من كدة وكل واحد بينزل عند مكانة أو بيتة يعنى مش بيكملوا للأخر بناء على بداية الركوب
ازاى يسكتوا على الاهانات والسب والقذف اللى بيحصل لراكب معاهم
وكله قاعد مكبر دماغه ومليش دعوة

دة مش بيحصل ألا لما يكون الراكب فعلا عمل حاجة غلط مش كويسة ويستاهل لكن فى الآخر بردة الناس بتهدى اللعب على الآقل وبتخلص المواضيع

أنا بتنقط من الناس اللى راكبة اكثر من السواق والتباع بتاعه

موضوع السواقين دة ناتج عن ثقافة عصر الفساد السابق المتراكم على مدار السنين من الرشوة والفساد التى تغلغلت فى جميع أجزاء مصر بلدنا الغالى الحبيب ووموضوع السواقين دة فرع من الفروع الكتير اللى عايز علاج مش بتر علشان لو عملنا بتر ليهم كلهم هيتحولوا الى حرامية وبلطجية فى الشوارع وكدة حالهم أحسن وأخف الضررين ... فالحل فى العلاج عن طريق التوعية العامة وأصلاحهم وتعليمهم ثقافة التعامل فى القيادة ... ودة مش هيتم الى عن طريق أدارات المرور الصالحة لما ينصلح حلهم هما الآول وحال البلد يستقر بأذن الله .لآن عن طريق الآفراد مش كفاية وصعب الناس محتاجة دعم من الشرطة والمرور علشان يقدروا يحاكموا السواق لما يغلط دلوقتى أنتم شايفين الوضع أسوء مما سبق كمان
علشان لازم يكون فى تطبيق للقانون صح بدون رشاوى عن طريق ظباط وأمناء وعساكر شرفاء.
لما حال البلد ينصلح بأذن الله

والله الموفق والمستعان

**Astra200** · 11-10-2011 10:03 PM

المشاركة الأصلية كتبت بواسطة mido51eg

متابع الموضوع من اول مابدء. لسه كنت بحكي لزمايلي في المكتب عن واقعة شهدتها في ميكروباص بولاق الدكرور - رمسيس الديهاتسو الـ 14 راكب العالي ده. ركبته من حوالي شهرين من قدام قدورة في شارع جامعة الدول وكان بيحمل اسعاف بـ 75 قرش ورمسيس بـ 1 جنيه. المهم الناس بدأت تبعت الأجرة وحصلت مشاحنات على الربع جنيه الباقي من الركاب والسواق حس انه متلخبط والزباين عاوزه تسرقه في ربع جنيه. راح واقف بالعربية في وسط ميدان سفنكس وراح ساحب سيخ حديد من على التابلوه وراح متدور لنا وقايل :
والله العظيم هنزل اموتكوا بالحديدة !!!!!!!!
حالة من الوجوم سيطرت علينا ، محدش فتح بؤه ولا قاله انت بتقول ايه. مش بسبب تهديده لأ بسبب شكله. والله العظيم مفيش حتة في وشه ودراعاته مش متخيطة. منهم جرح بادئ من تحت ودنه لغاية بؤه. وخياطات تحسوا انها اتعملت عند منجد افرنجي مش عند دكتور. واعتقد ان تصرف السكوت ده كان صواب لأنه لم يكن ليتورع عن ضرب التخين فينا بالحديدة اللي في ايده . عاوز اسمع ارائكم ولو كنتم في الموقف ده كنتم هتعملوا ايه.

هي المشكلة اساسا في الملايكة بتوع الداخلية مش هم اللي بيدو تراخيص لذوي السوابق يسلموهم حياة الركاب ؟ ( وبعد كده يقولك سلوكيات)

وهم برضه اللي بيدوا رخص لقائدي الملاكي بدون ما يكون عنده فكره عن قواعد المرور

ده السواق العام لازم يكون مستواه أحسن من السواق الخاص ( مستوي نفسي و تقني )

انا بركب مع سواق الأتوبيس في المانيا بحس اني راكب مع حكيم -- سواق له هيبه