الموضوع: نفسي سواقين الميكروباصات يبقوا رجالة

انا شغال في شركة من حوالي 7 سنين مقرها الرئيسي في الدقي عند ميدان الجلاء وتقريبا يوميا بروح هذا الفرع مرة بالعربية ومرة بالميكروباص
ودائما كما تعودت وكالعرف السائد ان الميكروباص يا اما يروح التحرير يا أما في اوقاات الذروة يكتفي بالدقي (ميكروباص فيصل - تحرير) وايضا العرف السائد ان الدقي تنتهي عند ميدان الجلاء
وبالتالي لما بركب يا أما بقوله جلاء يا أما بقوله دقي يا أما هو الي بينادي دقي وعلي هذا بركب الميكروباص دون ان اكترث بنهاية رحلته

النهاردة ولأسباب أمنية في ميدان التحرير ، تحديدا ماسبيرو والأحداث الجارية هناك لم اجد ميكروباص واحد يوحد ربنا رايح تحرير
وبالتالي كان الحل البديل امامي اني اتوجه الي المريوطية واركب الميكروباصات المتجهة الي الكوبري الخشب (مقار) واركب تاني من هناك اي حاجة رايحة الدقي (رايحة فين ؟ الدقي)
وبالفعل لحسن حظي بمجرد نزولي من الميكروباص الأول وجدت ميكروباص اخر
قولتله دقي قالي دقي
قفزت مسرعا داخله وكان عدد الركاب لحظة ركوبي 3 ركاب - شاب بالكنبة الخلفية ورجل اخر وبنت محجبة مؤدبة وجميلة قاعدة في الكرسي الأمامي بجوار السائق
نزل اول راجل وبعده الشاب وتبقي انا والفتاة
البنت عند ميدان الدقي بالظبط قالتله نزلني مستشفي 6 اكتوبر
بعدها بلحظات لقيت السائق الجميل بيقولي يا باشا انت نازل فين ؟
قولتله نازل الجلاء
قالي احنا اخرنا ملف السينما (تقريبا اتكسف يقولي مستشفي 6 اكتوبر)
قولتله يا اسطي مين قال كدة
قالي ما انا قايلك قبل ما تركب اني رايح الدقي
قولتله وهو ميدان الجلاء دة فين ؟؟ مش في الدقي ؟
قالي لاااا ميدان الجلاء في الشيراتون (اي كلام فأي حاجة)
قوتله يا اسطي طول عمرنا بنركب دقي لحد الجلاء
قالي لا ياباشا
قولتله نزلني هنا مش عايز اركب معاك
قالي يا باشا استني وانزل الأخر (يقصد مستشفي 6 اكتوبر - قصدي ملف السينما)
قولتله لا انا هنزل هنا ومش عايز اركب معاك انتوا هتذلونا نزلني وروحت فاتح الباب وناطط بالظبط عند السبكي

انت تفسر دة بأيه ؟؟؟؟؟؟؟؟؟؟

يعني انت يا اسطي يا راجل يا محترم أخر رحلتك مكان ما هتنزل البنت الي جامبك (لا اقصد تماما اانه علي اي علاقة بهذه البنت فهي راكبة عادية ومؤدبة ولكن عيبها الوحيد انها جميلة)

انا دلوقتي بقالي حوالي شهرين بسبب حادث عربيتي بركب ميكروباصات واكتشفت اكتشافات خطيرة في سلوكيات وانماط سواقين الميكروباصات

1- يعمل حركة واطية زي الي حصلتلي النهاردة ويقرر نهاية خطه مع نزول اخر فتاة من الميكروباص
2- مايرضاش يفتح الباب الأمامي بتاع الكرسي الي جامبه لأي حد ويسيبه للأخر لعل وعسي بنت جميلة تركب بجواره (علي اساس انه مصطفي شعبان)
3- ودي قليلة شوية انه اساسا مايرضاش يقف غير للبنات وقليلا جدا من الرجال لا يتعدوا 3 او 4 رجالة
4- يستهين بالركاب لو عددهم اقل من 4 وينزلهم عشان يلف ويرجع تاني واحيانا يديلهم اجرتهم ويقولهم اركبوا انتوا
5-
6-
7-

اكمل الفراغ في الجمل السابقة

نفسي سواقين الميكروباصات يبقوا رجالة

والله المستعان
،
،