الموضوع: هل كبرت على المكان إللي بتشتغل فيه؟

المشاركة الأصلية كتبت بواسطة Migo123

التغييرات اللي بتحصل في سوق العمل اليومين تغييرات كبيره جدا وجوهرية ومحدش ها يقدر يستفيد منها الا اللي هغير مكانه لان طول ما انت قاعد في مكانك ومستقر التغيير بيكون بسيط جدا يعني كبيرك ها يزودك 10- 20 قوووووول 30%

بس اللي بيحصل النهارده ان الاسعار (اسعار العمالة المتخصصة)بتزيد فوق ال 100% .... وده لان في ندره في العماله المدربه فعلا في مصر
وعمر ما شركتك ها تديلك نسبة الزياده لو انت بتعمل ايه

عشان كده النشاط اللي حاصل في سوق العمل لن يستفيد منه غير اللي يعرف ينقل من شركته ويلاقي مكان في حته تانيه وفرصته الوحيده انه يخش من الاول على سعر صح وشروط صح لان ي دي مرحله التفاوض ..... بعد كده شكرا ها تاخد اللي ها يطلع من ذمتهم وبس

عشان كده انا بشجعك جامد وانا شخصيا بدأت ادور بجد على فرصه في مكان جديد
واي نقله او خطوه جديده لازم يكون فيها بعض المخاطره
ولازم لما تروح مكان جديد تتعب شويه على ما تظبط امورك
بس في الاخر المزايا اللي ها تاخدها هتعوض التعب ده باذن الله

وربنا يوفقنا جميعا لما في الخير

كلام مظبوط جدا و دا إللى أنا بعمله دلوقتى

انا بأة عندى 33 سنة و امضيت 12 سنة فى منظمة عربية فى مصر و باشتغل فى مجال نظم المعلومات
و بقالى فترة كبيرة ناوى على التغيير بس ماخدتش القرار ، لغاية لما قررت التقديم فعليا فى اماكن اخرى و تم قبولى السنة الماضية فى احد الاماكن بمرتب اكبر قليلا من المرتب الحالى ، رحت رفضت و قلت لنفسى انا قاعد وسط ناس باحبهم و بيحبونى و مكتب واسع مريح و مبنى كبير و شوية حاجات تانية مريحانى ليها تمنها برضه ، و قولت لا خلينى ، جاتلى فرصة اخرى من حوالى 4 شهور خارج القاهرة فى مجال الاتصالات فى قوات حفظ السلام فى العريش و قولت لا خلينى ، لحد ما قولت لأ بأة ، انا قاعد محلك سر التدريب محدود جدا و المرتب اصبح لا يلائمنى و لا يوجد ترقى من اساسه . الصراحة زهقت و قررت انى اقبل بالعروض القادمة اذا كانت مناسبة ، و الحمدالله جاتلى فرصة للعمل فى احد شركات البترول الاجنبية بمصر فى مجال جديد عن مجال عملى الحالى و قلت احتمال كبير الواحد يقدر يستفيد من مهاراته فى ممارسة اعمال اخرى حتى يشعر الواحد بحماس فى العمل كما كان فى الماضى و المرتب اعلى قليلاً و هناك فرص للترقى و التدريب

بس الصراحة حاسس انا باقوم بخطوة فاصلة فى حياتى ، و متوقع طبعا ان فيه حاجات كثير حتتغير مثل المكتب و الناس و ظروف الشغل و المعاملة بين الاشخاص فى العمل سوف تكون مختلفة عن الحالى .
و احتمال يكون ما سبق اقل بعض الدرجات من العمل القديم الى العمل الجديد

بس طبعا اكيد الواحد لازم كان يترجم تطلعه لوضع احسن بخطوات حقيقية تساعده على ذلك بغض النظر عن اشياء اخرى
و ان شاء الله الشهر القادم ابتدى

المشاركة الأصلية كتبت بواسطة NaderNabil

علي فكرة يا م\ محمد....الكلام ده مش كويس..كثرة التنقل بين الوظائف غير صحي علي الاطلاق...لانه بيثير الشك للشركة اللي انت رايح تقدم فيها...ايه اللي يخليك تنتقل بالسرعة ديه؟ هل بسبب مشاكل انت بتعملها؟؟هل بسبب انك مابتحبش الشغل؟؟؟كل ديه اسألة بتظهر لما يلاقوا في الCV كمية التنقلات ديه في فترة زمنية صغيرة

الواحد ممكن يتنقل كتير في بداية حياتة...أي أول سنتين تلاتة لكن بعد كده الواحد بيهدى و يبتدي يستقر في مكان واحد و مايفكرش ينقل قبل 7-10 سنين

انا بعمل زي الاستاذ Casper بس الفرق ان انا عارف انا بعمل كده ليه.
انا تخصصي في مصر نادر جدا او تقريبا مش موجود غير في شركتين اتنين.

المهم ان اي شركة بتعين موظف جديد بيكون لسببين ملهمش تالت. يا اما يسد نقص في مشروع قديم او عندو مشروع جديد.

انا دايما بنقي العمل في الشركات اللي عايزة ناس لمشاريع جديدة و ابدأ معاهم و بعد سنة او سنة و نص لما المشروع يشتغل و يطلع قماش زي ما بيقولو هوب اقول انا يا فكيك علي شركة تانية بمشروع جديد لحد موصلت اني بقيت برة مصر دلوقتي (و دي حاجة مزعلاني جدا)

الموضوع ده ليه مزايا و عيوب احب اذكرهالكم بالتفصيل

المزايا:
- زيادة عدد المشاريع اللي انجزتها في ال CV افيد 10000 مرة من اسماء الشركات.
- مبتحسش بالملل
-بيتاخد عنك فكرة ايجابية انك متخصص في انشاء مشاريع جديدة و ده طبعا زائد ان المشاريع الجديدة دايما خبرتها اكتر
- دايما في الانتقال مرتبك بيعلي و عمره ما نقص الحمدلله. علي سبيل المثال اتنين بدأوا العمل في نفس الوقت واحد بلط في الشركة و التاني بيطنطط. بعد خمس سنين اللي بيطنطط هيكون مرتبو اعلي من الاول مع ان الخبرة واحدة.
- موضوع اثارة الشك ده بيختفي لما الشركة الجديدة بتفهم ان انت بتدور علي مصلحتك في المشاريع الجديدة بل بالعكس ده بيديهم انطباع انك جامد و قد المسؤولية. بس لاحظت انهم بيبدئوا يفاوضوني تاني قبل المشروع ما يخلص و من قبل حتي ما ابدء افكر اني همشي.
- في ميزة جامدة جدا و هي ان ممكن شركات قديمة كنت بتشتغل فيها تكلمك تاني لمشاريع جديدة عندهم.
- الاستنتاج انك بتفضل في دايرة مغلقة من المشاريع الجديدة بغض النظر عن اس الشركة.
- خبرتك بتزيد بسرعة الصاروخ بأذن الله الاول طبعا
- علاقاتك بتبقي كبيرة جدا لأنك في وقت قصير قابلت ناس اكتر و كمان الناس دي انت اثبت جدارتك و مهارتك قدامهم لما ربنا وفقت و انتهيت من المشروع معاهم.
- بتحسن طريقة معاملاتك مع الناس كنتيجة طبيعية للعمل في ظروف و اجواء مختلفة في وقت قصير و بالتالي بتتعود برضو علي الاجواء و الظروف الصعبة.

العيوب:
- كل سنة ولا سنتين ليك نظام حياة مختلف تبعا لنظام شغلك الجديد (النقطة دي ممكن تبقي ميزة كبيرة لبيتك خصوصا لو وظفتها صح سشاعتها عمر مراتك ما هتتهمك انك زوج روتيني :))) )
- الموضوع ده ادمان لدرجة انك لو اشتغلت مرة في شركة مالهاش حل من جميع الجوانب و العقل يقول هي دي الشركة اللي هسبت فيها عشان انا كبرت و بتاع هتلاقي الادمان بيخليك تمشي
- التنطيط ده بيغرز في شخصيتك ان مصلحتك اولا و بيلغي الانتماء جواك (ده في الشغل بس طبعا مش في البيت كمان)

انا عندي نفس المشكله واتكلمت عنها كتير
الشغل ممتاز
اقامه في فندق 4 نجوم
مرتب بيعدي ساعات 700يورو
شركه اجنبيه
قاعد في اجمل اماكن في مصر
مصاريف عربيتك وسكنك علي حساب الشركه
الترقي ممكن بس مش عايزه
لسه سني 25 سنه
يعني قشطه من كله بس مش عايزه مش طايقه مش مجال تخصصي الاصلي(اللي للاسف ملوش مكان في مصر) وعشان كده اخذت القرار من حوالي 6 شهور
الهجره ثم الهجره زز بلد جديد مكان جديد شئ هينضم لخبراتك الشخصيه واكيد هتغيير مجال العمل ... بس هتسافر وتشوف الدنيا. يعني هو الشغل ممتاز بس مش بتاعي تماااااااااما
اما للاخوه خصوصا حديثي التخرج اللي عايزين يشتغلوا بمرتب حلو في شرم
شركتي محتاجه حوالي 100 مندوب بلغات مختلفه ابتداء من شهر 8 الجاي
وربنا يوفق الجميع

نفس الموضوع إللى أنا بفكر فيه دلوقتى و مش عارف أخد فيه قرار اليومين دول

و برده أسيب المكان إللى قعدت فيه من أول ما أتخرجت لحد دلوقتى يعنى 7 سنوات و لا أتنقل مكان جديد بمخاطرة جديدة ؟؟؟