الموضوع: بتمسك الدريكسيون ازاي ؟؟؟

كل واحد فينا ليه مسكة معينة للدريكسيون بتريحه بس يا تري المسكة دي صح ؟؟
يعني علي سبيل المثال انا شخصيا بمسك الدريسكيون بأكثر من طريقة منها الي بيريحني لو بسوق وانا راجع من الشغل ومرهق ودي بتبقي غالبا ماسكه من تحت بأيدي اليمين ولما بحب أغير بسند بالشمال وبرجع تاني امسكه باليمين وفي مسكة بمسكها لو ماشي في وسط البلد او اقصد يعني لو الطريق فيها مفاجئات وناس رايحة وناس جاية وعربيات بترمي عليك وعربيات بتلف واخري بتقف فجأة ودي غالبا بتبقي مسكة جدي وجدك وبكون ماسك الطارة بأيدي الأتنين من الجنبين اليمين والشمال
وفي مسكة بمسكها لو انا مسافر والطريق طويل ودي مش بتفرق كتير عن مسكة وسط البلد (مسكة جدي)

بشوف ناس كتير (شباب طبعا) بتمسك الدريكسيون بتناكة غير عادية وبيكون تقريبا نايم علي الكرسي الي جمبه ورافع ياقة البولو شيرت ولابس سلسلة ومشغل الكاسيت وعمال يهز في دماغه او في رقبته تحديدا (قفاه واجعة من الي بيشوفه)
وفي واحد تاني بردو أليط اوي وماسك الدريكسيون بطرف ايده وبردو مميل بس المرادي علي فرش الباب (تقريبا بيلمعه) وغالبا يا أما ماسك دقنه (بيشوفها طلعت قصدي طولت ولا لسة؟) يا أما بيقرقض في ضوافره او حاطط صباعه في بقه زي الأطفال (غالبا بيبقي نسي يلبس البامبرز وهو نازل) ويا سلام لو حب يطلع من واحد او يلف بتلاقي الباور لذيذ اوي فايده – علي رأي واحد صاحبي كان بيقولي نفسي أشوف شاب عادي –
المهم

انا طبعا مش هتكلم دلوقتي من فراغ او من دماغي ، انا هتكلم بناء علي دراسات وابحاث ناس أجانب الي احنا بنسميهم الخواجة وهو نفسه الراجل الي اخترع العربية وهو الي قرر ازاي تمسك الدريكسيون

مبدئيا شبهوا عجلة القيادة بالساعة
ووضع ايدك علي الطارة زي العقارب (عقارب الساعة)
في وضع اسمه 10-2 ودة انسب وضع للقيادة الأمنة ودة المطبق حاليا في مدارس تعليم القيادة في أمريكا
ولكن جمعية السيارات الأمريكية The American Automobile Associationبتفضل وضعية 9-3 علي طرق كاليفورنيا السريعة
والأدارة الوطنية لسلامة الطرق السريعة National Highway Traffic Safety Administration واخدة موقف محايد من وضعية اليدين علي الدريكسيون سواء 9-3 او 10-2
وضعية 10-2 اكثر الوضعيات انتشارا ولكن في وجود ال Air Bags الموقف اختلف لأنهم اعتبروا اي وضعية للأيدي فوق الطارة هتتسبب في أصابة في حالة لا قدر الله حدوث حادث لأن عند فتح الأكياس الهوائية ستصتدم الأيدي في الوجه وتعتبر انسب وضعية في وجود ال Air-Bags هي 8-4 وموؤسسات اخري تفضل وضعية 7-5
وفي النهاية افضل وضعية للقيادة الأمنة هي 10-2

بعد التقرير الجميل جدا دة الي لقيته علي النت مالقتش ولا وضع بيتكلم عن القيادة بأيد واحدة زي شبابنا الحلوين ما بيعملوا وبيتسببوا في حوادث لا قدر الله

كمان واحنا مسافرين بشوف ناس بتريح الكرسي وبتمسك الدريكسيون بأيد واحدة
هسالك سؤال : لو لا قدر الله كاوتش ضرب هتتحكم ازاي في الطارة

انا شخصيا بمسك الدريكسيون بوضعية 9-3 وعلي الطرق السريعة بوضعية 10-2 واكتشفت ان دوول فعلا انسب وضعيات للتحكم الكامل في الطارة وفي العربية
ولاحظت ان مصنعي السيارات عاملين الدريكسيون بتصميم يسمحلك بمسكة الطارة بشكل أمن ولو لاحظت في الطارات بتاعة عربيات السباق مش هتلاقي مكان غير لوضعية 9-3 لأنها انسب وضعية للطرق السريعة

وفي نهاية موضوعي بسألك
بتمسك الدريكسيون ازاي؟؟؟
والله المستعان
،
،
المراجع
http://www.smartmotorist.com/traffic-and-safety-guideline/safe-driving-position.html
http://www.smartmotorist.com/driving-guideline/proper-driving-position.html
http://www.smartmotorist.com/driving-guideline/hands-on-the-steering-wheel.html