الموضوع: أتسرقت ورجعت المسروقات بس زعلان

قدر الله و ما شاء فعل
و علي قد ما هي حاجه تزعل إن خلاص مافيش حد بقي يتدخل مع و لا حد بيساعد حد حتي في مواجهة الحراميه
إلا أني فرحان إن حاجة حضرتك رجعت و بمجودك و بإيدك
و مت من الضحك من سرد الحكايه

قدر و لطف .. و ربنا يسترها معنا أجمعين

المشاركة الأصلية كتبت بواسطة حماده عزو

الحكايه أنى أمس تقريبا كانت الساعه 2.30 بعد الظهر كنت راكب سيارتى وواقف فى شارع عندنا فى طنطا أسمه شارع سعيد قريبا من فتح الله ماركت
وفاتح الزجاج الأمامى يمين وشمال غلى الأخر وبعدين لقيت ولد جى من شمالى سنه فى حدود 19 او 20 سنه بيكلمنى وهوا بيتحرك سنه بسنه للأمام وبيسألنى أروح شارع البحر أزاى وده شارع رئيسى موازى للشارع الى كنت فيه
وصفتلو أنو يخش يمين من الناصيه الى ورايه عكس أتجاه السيارات كل ده فى حدود 5 ثوانى وأن دائما بحط موبايلينى فى البوكس الى تحت فرامل اليد ( عربيتى بومه يعنى البوكس ده علشان أوصل للى جواه لازم أدخل نصى كله جوا العربيه ) وسابنى الى كان بيسئل على الطريق ومشى بس أنا مسبتوش تابعتو فى المرايه لاقيتو أتجه عكس مانا وصفتلو شكيت ببص على الموبايلات ملقتهمش
فى لمح البصر نزلت من العربيه وضغط على اللوك فى المفتاح وأنا بطير ورا الولد ( أنا وزنى فى حدود 140 كيلو )الى كان بيسئلنى هوا كان ساعتها بيعدى التقاطع فى الأشاره وجيبتو من ظهرو ووقعتو على الأرض وجلست على صدرو وأبتديت أضربو فى وشو بأيدى وأشتمو بأوسخ شتايم وأقولو فين الموبايلات بتاعتى يا أبن ال ..................... وهوا طبعا مش قادر ياخد نفسو من الجبل الجاثم على صدرو وأنا بضربو بغل أوى
والناس أبتدت تتلم بس محدش بيساعدنى ؟؟؟؟؟؟؟؟؟؟؟
وفى لحظه لقيت واحد سنو 35-40 سنه وكمان بلحيه خفيفه (الله ينتقم منو بيتخفى فيها وبيشوه سمعه الناس الملتزمه ) جاي يقولى موبايلاتك أهه يا أستاذ ببص لقيت موبايلاتى فى أيدو فعلا زى مشالهم من العربيه بالظبط أخدتهم من أيدو حطتهم فى جيبى ومسكت فى أيد ابو لحيه وعملت نفسى با قوم من على الحرامى زميله ورحت واقف وماسك فى خناق الأثنين (كل ده والناس واقفه تتفرج ومحدش مد أيدو ولا فى عسكرى مرور فى الأشاره ؟؟؟؟؟؟؟ )
وفضلت أنفضهم فى بعض وهما يشتمو وأنا أضرب بغل رهيب ومصمم أنى أسلمهم للنجده بس محدش راضى يمسكهم معايا ولا يطلب النجده فضلت على كده يجى عشر ثوانى وبعدين مش لاقى نجده ولا حد يساعنى رحت سايبهم وماشى (زعلان جدا من نفسى والله وحاسس انى غلطان غلط كبير أوى لكن كنت لوحدى ) ومكنتش هعرف أعملهم حاجه ولا حد بيساعدنى من الجمهور
ربنا يسترها معانا جميعا ويا رب متحصلش معا حد خالص
ملحوظه
يا ريت محدش يحط موبايلات أو حاجه مغريه بطريقه ظاهره أو فى العربيه

قد الله وماشاء فعل والحركة دى بتتعمل من زمان بس انت ليه حاسس بالذنب انت كان المفروض تركز مع واحد بس ومشمهم مساعدة الناس لان ده بقى العادى بتاعنا نقف نتفرج ويمكن انت منبهتش الناس انهم حرامية علشان كده ممكن يكون فاكرينها خناقة عادية والمفروض انك قبل ما تسلمهم للنجدة انك تفضل تضرب فيهم انت عارف رغم ان هوة روح بشرية انما مش حرام ابدا لانهم بيروعوا الناس دى ولما بيتقنوا الحرفة دى ممكن يقتل شخص تانى علشان يسرق انا على فكرة مش همجى والا حاجة بس الواحد متعصب جدا ومشدود على الاخر حتى لو كنت انت اللى غلطان بس مبيقاش ده جزائك انك فاتح الشباك انت حر فى عربيتك والشرطة وحصل موقف قدامى بيمشوهم تانى بحجة انه معهوش مسروقات تانية وربما يستر علينا وعايز اقولك الناس دى بتبقى جبناء مش زى مانت فاهم ده غير انك على حق سامحنى انى بقولك كده مش بلومك بس انا لو مكانك مش هاسيبهم لغاية ما انا اتعب من الضرب فيهم تقبل مرورى

انت كده عملت الصح و يا سلام بقي لو كنت كسرت للواد كوع , فك, بوظتله وشه
كده يعني !
لو ضربته بالنار فحلال فيه !
بخصوص الناس السلبيه فده واضح ملوش حل, الطبع غلاب
ثوره مش ثوره مش فارقه !
بس ربك يسترها ....

الحمد لله انك قدرت ترجع الحاجة بتاعتك