تجديد ترخيص الماروتى ل 3 سنوات قادمة

**sab3aawy** · 12-10-2011 02:18 PM

هذة الأيام تكمل الماروتى معى 3 سنوات من عمرها المديد (ثانى سيارة -من اصل 17 سيارة-فى حياتى كلها تصل معى لهذا الرقم، ربنا يديها الصحة وطولة العمر، بحبهاالعفريتة دى) وقد استلزم هذا زيارة ودية لاصدقائنا فى مرور مدينة نصر(عشرة عمر، بتعامل معاهم من 16 سنة واللى كان بيناول الملفات لما كنت برخص أول عربية ديلوقتى رئيس قلم )، المهم دخلت عامل فيها اسد على نيابة المرور(ركبى كانت بتخبط فى بعض، بس جوة البنطلون الحمد لله محدش شايف) وبعد ساعة ونصف من الرعب دعمها الأرقام المهولة اللى عمال اسمعها فى الميكروفون والناس اللى بتعيط بالدموع على الشباك، تم نداء اسمى متبوعا برقم 5 جنيه (خمسة جنيهات فقط لا غير)نظير اداء الخدمة( هيييييييييييييييه براءة، تقريبا رادار المحور والدايرى مكانوش مستنضفين يصورونى او مش مصدقين عينيهم او العربية مش بتبان فى الصورة ) ، انا بصراحة كنت ناوى اجيب شهادة المخالفات بس النهاردة لكن لما لقيت العملية خلصت بدرى بدرى قلت نكمل شوية، فحص وطفاية وتأمين الخ، لقيتها مشيت قلت طب نخش للشباك اتاذ رفيق حبيبى قاعد وبعرف ألاغيه، وبقدرة قادر لاقيت نفسى خارج وفى يدى رخصة سارية حتى أواخر 2014، ربنا يدينا ويديكم طولة العمر

المهم نيجى للأرقام:
45 جنيه نماذج
235 جنيه تأمين اجبارى ضد اصابة الأشخاص لمدة 3 سنوات
440 جنيه ضريبة ل 3 سنوات
5 جنيه نظير استخراج شهادة مخالفات
115 جنيه محبة واكراميات وبدل ما اصلح خدشين او تلاتة فى جوانب السيارة ولزوم تسريع الاجراءات :)
5 جنيه انتظار فى جراج برة المرور بعد الفحص
2 جنيه قلم جاف + ملف
2 جنيه كباية شاى من بوفيه المرور

المجموع:849 جنيه
الزمن المستغرق: ساعة ونص شهادة مخالفات،نص ساعة فحص وتأمين،نص ساعة شباك، ساعة انتظار الرخصة المجموع 3 ساعات ونص
الرخصة صالحة لتسيير السيارة مدة 1096 يوم (2012 كبيسة فيها يوم زيادة :) )
يعنى الحكومة واخدة منى عن كل يوم استعمال للسيارة 77 قرش شاملة الاكراميات ، والله يا بلاش، برضه مصر ام الدنيا :)

**hamaza81** · 12-10-2011 02:24 PM

مبروك يا سبعاوي
وسبحان مين عدى اليوم دا عليك

**egyptiandiver** · 12-10-2011 08:59 PM

مبروك

**إبراهيم المصرى** · 12-10-2011 09:49 PM

مبرووووووك من الاعماق والى الامام وبالتوفيق يارب

**Amr Axel** · 13-10-2011 12:42 AM

الف مبروك يا م\ سبعاوي

**dr.hazem** · 13-10-2011 02:37 AM

انا رخصت في تلات ايام بسبب ان العربية كانت معايا بتوكيل وعلى ما كتبتها باسمي وثم نقلتها تبع مرور مصر الجديده من مدينة نصر وفحصتها والذي منه
بس انا مديتش لولا واحد اي اكراميات ولا حتى نص جنيه
هههههههههههههههههه

ألف مبروك ياسبعاوي وعقبال اما نتطور ونبقى نرخص من اي مكان ونرتاح من هم المرورات ونقل الملكيات والقرف ده

**sarah5** · 13-10-2011 04:59 PM

الف مبروك لحضرتك
انا المفروض رخصة عربيتي تخلص اول الشهر الجاي وخايفة من مشوار تجديد الرخصة ده ومسترخماه بصراحة هو انا لازم اجددها اول ما تخلص ولا ممكن استني شوية وايه الاوراق بالظبط اللي اخدها معايا عشان اول مرة اجدد رخصة في حياتي