لحظات الكبرياء والانكسار بس تفتكر معاهم الندم ؟؟؟؟؟؟؟؟؟؟؟

**Ashraf_Ashraf** · 13-10-2011 04:14 PM

هى قصه حصلت لى وحبيت انقلها لكم
على مااعتقد انكم اكيد اتعرضتم او شوفتم بعض الناس اللى بتسوق سيارات حديثه وبتيقى مليانه غرور وكبرياء بسبب حداثه العربيه او كبرها او موديلها ومش عارف ليه
المهم فى شارع نهرو انا راكب عربيتى القديمه 132 وكان امامى مرسيدس 300 اعتقد كده لسه زيرو (ربنا يبارك له فيها ) وماشين ورا بعض والفرق بينى وبينه مايعديش 2 متر
على الشمال فى يوترن ظاهر منه وش عربيه باسات 2012 وبيكمل دخول فى الشارع معانا شاف المرسيدس هدى لما عدها طبعا انا جاى وراها ومعتقد انه اكيد هيقف لما اعدى لان دى الاصول لقيته بمجرد ماعدت المرسيدس راح بصص بمنتهى القرف للعربيه ويمكن لى كانى مثلا استحق الاعدام لانى بشاركه الشارع ومش معقول هيقف يعدى العربيه الزباله دى وراح غامز عربيته ودخل قدامى وضربت فرامل شديده قبل مااخبطه
مافيش ثوانى وراحت عربيه سيات طالعه من ركنتها على اليمين وراح بعزم مافيه داخل فى الباسات ( اللهم اعفو عنا )
خلى الباب اللى ورا بقى فى نص الكنبه وخد معاها الرفرف اللى ورا ( هموت واعرف اذا على السرعه البطيئه دى حته سيات عملت فى الباسات كده اومال لو عربيه ناشفه هتعمل ايه )
طبعا وقفت والشارع كله وقف والخناقه بدأت بس مهما اقولكم على وش الراجل اللى كان سايق الباسات ونظرت عنيه والأسى والانكسار اللى كان فيهم مش هقدر اوصف ليكم مهما اوتيت من بلاغه وسالت نفسى اذا فى لحظات ممكن تخسر كل شئ يبقى ليه من الاصل التكبر والتعالى
حكايتى مش للشماته فى الراجل ( اعوذ بالله من ارتكابى لهذا الذنب ) لكن للاننا احيانا جميعا ممكن تنتابنا لحظات غرور او تكبر ( ربنا يعفو عنا جميعا ) فدايما نتذكر قول الله تعالى
(وَلَا تَمْشِ فِي الْأَرْضِ مَرَحًا إِنَّكَ لَنْ تَخْرِقَ الْأَرْضَ وَلَنْ تَبْلُغَ الْجِبَالَ طُولًا * كُلُّ ذَلِكَ كَانَ سَيِّئُهُ عِنْدَ رَبِّكَ مَكْرُوهًا ) صدق الله العظيم

وتقبلوا تحياتى

برجاء تحرى الدقة عند كتابة أيات من القرآن الكريم.
مشرف عام 3

**فادى محمد** · 13-10-2011 04:32 PM

ربنا يباركلك ياااشرف فعلا عبره وعظه لنا كلنا ,تحياتي..

**mido51eg** · 13-10-2011 04:45 PM

فيه ناس من كتر شعورها بالنقص بعتبر ان مجرد ركوبها عربية حديثة وغالية ممكن يخليها فوق البشر.
افتكرت مقولة الإمام علي كرم الله وجهه "لا تطلبوا الخير من بطون جاعت ثم شبعت لان الشح فيها موجود وأطلبو الخير من بطون شبعت ثم جاعت لان الخير فيها موجود"

**Ashraf_Ashraf** · 13-10-2011 05:30 PM

المشاركة الأصلية كتبت بواسطة mido51eg

فيه ناس من كتر شعورها بالنقص بعتبر ان مجرد ركوبها عربية حديثة وغالية ممكن يخليها فوق البشر.
افتكرت مقولة الإمام علي كرم الله وجهه "لا تطلبوا الخير من بطون جاعت ثم شبعت لان الشح فيها موجود وأطلبو الخير من بطون شبعت ثم جاعت لان الخير فيها موجود"

اللهم نعوذ بك من شح الانفس
هو المشكله فعلا ليه الغرور ماهو كلنا ماشين على هوا مش اكتر

المشاركة الأصلية كتبت بواسطة hellboy

ربنا يباركلك ياااشرف فعلا عبره وعظه لنا كلنا ,تحياتي..

كل التحيه والتقدير ليك

المشاركة الأصلية كتبت بواسطة lion_heart

شكل حضرتك راجل محترم و بينك و بين ربنا عمار
و ربنا يكفينا جميعا شر الكبر و الغرور
و شكرا لنقل ما حدث للتذكرة و الاتعاظ

ربنا يخليك دا من ذوق وكرم اخلاق حضرتك وربنا يحفظنا جميعا

**AutoTycoon** · 13-10-2011 05:40 PM

احتمال يكون الراجل مكنش مغرور ولا حاجة بس حس ان فيه مسافة و حب يعدي قبلك مش اكتر... ساعات الواحد لما يبقى مستعجل بيغلط و ربنا يستر

**ahmed_mido1889** · 13-10-2011 06:22 PM

معظم الناس دي بحس انه بيبقي "شبع بعد جووع"

تلاقيه ماشي بيتمنظروعنده عقده نفص رهيبه

**Ahmed A Rahman** · 13-10-2011 06:52 PM

الف سلامة عليك

بس برجاء ضبط الآية الكريمة

بسم الله الرحمن الرحيم
وَلَا تَمْشِ فِي الْأَرْضِ مَرَحًا إِنَّكَ لَنْ تَخْرِقَ الْأَرْضَ وَلَنْ تَبْلُغَ الْجِبَالَ طُولًا * كُلُّ ذَلِكَ كَانَ سَيِّئُهُ عِنْدَ رَبِّكَ مَكْرُوهًا
صدق الله العظيم