الاوبترا ألاتوماتيك ينفع نحطلها بنزين 80

**mshehata500** · 15-10-2011 10:49 PM

المشاركة الأصلية كتبت بواسطة hema_lancer

احم احم
انا بحط في الوبترا 80 بقالي بتاع 5 شهور كده :)
فعلا حوار التسقيف ده وهتلاقيه طول ما انت دايس
بس هو الأحسن تحط حوالي 20 لتر 92 وتكمل الباقي 80
انا بقيت بعمل كده

اخيرا لقينا حد مجرب فى الاوبترا وطبعا طلع حبيبنا هيما لانسر
اذيك يا باشا انا متابع مواضيعك من زمان
طيب بعد اذن حضرتك عربيتك اتوماتيك ولا منوال
والتسقيف دوة مع 80 فقط
يعنى لما خلط 20 لتر 92 وكملت الباقى 80 لسه برده فى تسقيف ولا لا واخبار سحب العربيه ايه مع التخليط وشكرا ليك وللمشاركه

**aif** · 15-10-2011 10:54 PM

يا راجل حرام عليك
اوبترا اوتوماتك وعاوز تحطلها 80
ده انت ناقص تحطلها عصير قصب
....
92 طبعا

**mshehata500** · 15-10-2011 11:29 PM

المشاركة الأصلية كتبت بواسطة aif

يا راجل حرام عليك
اوبترا اوتوماتك وعاوز تحطلها 80
ده انت ناقص تحطلها عصير قصب
....
92 طبعا

السلام عليكم ورحمة الله وبركاته
والله يا اخى لو ينفع نحط عصير قصب هنحط انا اتخنقت من استهلاك البنزين فى الاوبترا
ولو عندك طريقة لاحتساب الاستهلاك تكون مضمونه قوللى عليها

**aif** · 15-10-2011 11:40 PM

المشاركة الأصلية كتبت بواسطة mshehata500

السلام عليكم ورحمة الله وبركاته
والله يا اخى لو ينفع نحط عصير قصب هنحط انا اتخنقت من استهلاك البنزين فى الاوبترا
ولو عندك طريقة لاحتساب الاستهلاك تكون مضمونه قوللى عليها

الطريقة الصحيحة كالتالي
فول التانك من محطة معينة لغاية الاوتوماتك بتاع الخرطوم ما يفصل
صفر عداد الرحلات
امشي مشاويرك عادي
مش لازم تنتظر لما التانك يفضى خالص
روح فول تاني ولو تقدر من نفس المحطة ونفس الخرطوم لغاية الاوتوماتك ما يفصل برضه
شوف قراءة العداد بتاع الرحلات واقسم عدد الكيلومترات على عدد اللترات المستهلكة في التفويلة الاخيرة واضرب الناتج × 20 = استهلاك الكيلومترات في الصفيحة
الاوبترا استهلاكها في البلد من 160 الى 180 كيلو بالتكييف حسب مشاويرك وممكن تعمل 200 لو مشاويرك في البلد طوالي ومش في حتت زحمة
وعلى الطريق السريع بسرعة 120 كيلو 260 كيلو في الصفيحة بدون تكييف
لو بسرعة 100 كيلو بتوصل 300 كيلو

**HeMa_LanCeR** · 16-10-2011 12:57 AM

انا عربيتي اوتو
بص هي في الأول هتقرفك لحد ما هي تتعود
واحسن حاجه ليها مشوار طوالي
والتسقيف مش بيظهر غير قليل قوي مع ال 80 بس
لكن لما بخلط مش بيظهر قوووي
وانا فعلا اللي خلاني احط 80 مشاويري كتير
انا تقريبا بفول كل يومين :)

**drmagieed** · 17-10-2011 01:21 AM

المشاركة الأصلية كتبت بواسطة mshehata500

السلام عليكم أخى الكريم
كلامك ياباشا كلام علمى سليم مائه فى المائه وبحيك عل الشرح الجامد دوة والمعلومات القيمه دية
بس المشكله عندى ان انا مشاويرى كلها داخل البلد وسحب البنزين عندى عالى يعنى بفول التنك لحد الزور وصفر العداد
واول ما اللمبه تنور بلاقى العداد عامل 420 أو 450 كيلو يعنى 150 كيلو للصفيحه وطبعا اول ما اللمبه نورت على طول دخلت فولت التنك للزور خد 60 لتر بالضبط فبكده عرفت ان التنك 60 لتر غير الاحتياطى والله واعلم بقى الاحتياطى بيكون 7 لتر ولا 10 لتر
فطبعا فكرة انى اعمل الموضوع دوة عشان لو مافيش مخاطر على الماتور يبقى بدل ما افول بـ 110 جنيه افول بـ 55 جنيه
بس كده انا احترت لان من الواضح اللى هنوفره باليمين هنصرفه بالشمال فى الصيانه
ومع ذلك فى اعضاء كتير بيقولوا ان الصفيحه بتعمل معاهم 180أو 200 كيلو وداخلى كمان مع انى انا مبشوفش الكلام ده غير فى السفر بس يعنى انا التنك بيعمل معايا فى السفر 620 أو 650 كيلو ده فى السفر بس لاكن الداخلى داخل اسكندرريه 420 أو 450كيلو هل دوة طبيعى وللعلم عربيتى أتوماتيك انا عارف ان الاتوماتيك بيستهلك اكتر شويه من المنوال بس مش لدرجة ان الفرق يكون 50 كيلو
طبعا انشاء الله فى صيانة الـ 15000 الف كيلو هخليهم يغيروا فلتر البنزين وينضفوا فلتر الهواء وينضفوا بوابات الهواء واحسبلها تانى معلش انا اسف للاطاله وشكرا ليكم جميعا

أنا كل خوفي إنك توفر بنزين وتحطه في عمرة أو ماتور جديد لا قدر الله ... إصبر شوية وجرب تغيير الفلاتر وتنظيف البوابات ... والكشف علي البوجيهات والرشاشات والموبينة (دورة البنزين كلها) ... لعل وعسي ربنا يكرمك وتقلل هذا الإستهلاك للمعدل الطبيعي ... وربنا يوفقك

**د.محمود صلاح** · 18-10-2011 08:17 PM

كانت لدي اوبترا لمدة شهرين

حطيت بنزين 80 كثير بالذات في السفر الطويل حيث ان التسقيف بيكون قليل وبطريقة قيادة حنينية للإبتعاد عن التسقيف قدر الإمكان

التسقيف كمن يطرق المحرك بآلاف المطارق الصغيرة في وقت واحد