ياترى كنا بنذاكر ازاى فى الثانوية

بما ان انا فى 2 ثانوى وعلمى فكنت عايز اعرف الأعضاء كانوا بيذكروا ازاى فحالتى دى:majd(4): وربنا يستر علينا هههههههه

سيبك من الناس اللي هتقولك اسهر طول الليل ذاكر والناس نايم وابقي نام بالنهار, بجد بتخليك مش مستريح وساعة الامتحان بتبقي مش مركز لان دة بقي ميعاد نومك

اللي انا مجربة وكنت بعمله فعلا, انام بدري( بعد العشاء بساعة كدة ولا حاجة) و اصحي علي الفجر اصلي واذاكر, بجد في ساعتين تلاتة هتحصل اكتر بكتير من 10 ساعات مذاكرة بسهر بالليل

دى كانت أيام ما يعلم بيها إلا ربنا ....
اللة يكون فى عونك وعون كل اللى بيدرسوا كل المناهج اللى ملهاش أى 30 لازمة دى ....

انا كنت بزاكر بطريقه غبيه بس ...
ممكن تتجنن فى الاخر بسببها ...بس بتخلص بسرعه اوى
يعنى الى هتزكره فى 5 سعات ممكن تزكره فى ساعه وحده

كنت بقطع الكتب ابواب
وافرش الاوضه كلها بلورق فى كل المواد
واقعد فى نص الاوضه وعيش
زاكر فى كذا باب فى وقت واحد وممكن فى ثانيه تقلب على ماده تانيه خالص

نصيحه اوعى تجربها هتندم

الله يرحم ايام زما ن
انا كنت النموذج قبل الاخير من الثانويه العامه القديمه 89 90
ثانيه ثانوي ادبي
السنه الوحيده الموجود فيها اعلي نسبه من الملاحق بين الطلبه لماذا
لاندرس شيء
عربي انجليزي فرنساوي
مشتركين مع علمي فيها
تاريخ جغرافيا اقتصاد
بس كده مفيش حاجه تاني
كل الطلبه كانوا مقضينها زوغان وسينمات
معدش الكلام ده موجود الان
دلوقتي عقدوا الطلبه مفيش حد فاهم علمي من ادبي
ربنا يكون في عونكم

أمنية حياتي بجد اعمل زي اللي كانوا بيقولوا انهم طول الليل بيزاكروا...او بيطبقوا

بجد مبعرفش...ولاعمري زاكرت اكتر من ساعتين الا وقت الامتحانات

كنت ببقي طول اليوم دروس ورحلات وازاكر بظبط من 7 ل 9

عمري ف حياتي ما زاكرت بعد الساعه 9 ابتاااااااااااااا

وكانت كلمة ديما ماما تقولهالي حكمة....آدي دقني لو فلحتي بقي دي مزاكرة ثانوية عامة دي؟؟

بس فعلا كنت بزاكر كدا وبس...ومكنتش تحلالي المزاكرة غير ع الارض والله كنت شايفة المكتب دا وظيفته يتحط عليه الكتب وبس ولما دخلت الجامعة اترقيت شوية وبقيت ازاكر علسرير

ف تانية جبت 96 %

وف تالتة جبت 99.5% تقريبا كان التوتال حوالي 97.8%

مقدرش افيدك لاني مكنتش بذاكر اصلا
والى الان مش عارفين انا دخلت جامعه واتخرجت منها ازاي :)
يا بركه دعاء الوالدين
بس انا عندي مكتب حاطط عليه الكتب
يمكن هو ده السر :))

مكنتش اعرف اذاكر الصبح ابدااااا احلص الدروس وارجع انااام ساعه ولا اتنين واذاكر مثلا من 10 ل 2 كده ولو مفيش دروس من 8 اخري الساعة 2 والمواد النظري لازم كنت اعد الف على رجلية ههه

اول حاجة دى ترجع لطبيعتك يعنى انت من النوعية اللى بتكون مركزة بالنهار ولا باليل انا عن نفسى كنت بحب مزاكرة باليل هدؤ ولا ضيوف داخلين ولا صوت تلفيزيون عالى ولا صوت عالى ولاغيره كنت ابتدى المزاكرة بعد مااريح وكنت مخلية مواعيد الدروس بتاعتى محصورة فى ايام محددة مش طول الاسبوع ولانى كنت علمى رياضة والحمد لله كنت بحب المواد العلمية المحتاجة فهم كانت معظم ساعات المزاكرة بتاعتى بركز على المواد الادبية المحتاجة حفظ العربى & الانجليزى & الفرنساوى .... لان الحاجات دى بتاخد وقت
وكان لازم اخد مش حاقولك كل اسبوع لا كل اسبوعين يوم راحة اخرج مع العايلة فى اى خروجة لطيفة يوم كامل
اغير جو وارجع اكمل المزاكرة لانك بتكون جددت النشاط بتاعك

أنا لحد دلوقتي بحلم بمستر اسامة بتاع الانجلش انه بيراجعلي قبل الامتحان ونا مش مزاكرة وخيفة ليقول ل ماما

مش عارفة ليه بقالي 5 سنين بحلم بالحلم المنيل دا

:d تقريبا يآحمد إن مشكلتنا زى بعض ,, ولا بذآكر ولا حاجه :s و حاسس إنى هضيع :d

شكرا على النصايح يا رجالة

انا لغاية دلوقتي بحلم ان عندي امتحان الفيزياء ومش مذاكر والأمتحان قرب اوي وانا مش عارف ليه مكنتش بذاكر. بالمناسبة انا ثانوية عامة دفعة 1990

كنت ادبى سنه 98 مش هاقدر افيدك

السلام عليكم و رحمة الله و بركاته

اللى أنا فاكره, أن أيامنا كانت الثانوية العامة سنة واحدة بس, اللى هى سنة تالتة و أنا فاكر أنى بدأت أذاكرلها من قبل مانتيجة تانية ثانوى ماتظهر, أصل أنا كنت بذاكر كده مع نفسى, كنا مسجلين البرامج التعليمية من التيلفزيون السنة اللى قبلها على شرايط فيديو طبعا, لأن أيامى (سنة 1994) ماكنشى فيه لا سيديهات و لا ديفيديهات و لا الدموع.

كنت أتفرج على الدرس من دول على الفيديو و أقوم أذاكره و هالما جرة, أنا فاكر أنى فى الصيف, اللى هو أجازة تانية ثانوى, خلصت الفيزيا و الكيميا و الرياضيات كلها و الانجليزى و الألمانى, أنا فاكر أنى خلصت الرياضيات بدرى, بحيث أن أختى اللى أكبر منى بسنة -اللى كانت فى ثانوية عامة وقتها- و كانت بتمتحن امتحان آخر السنة, كنت بقعد أستناها و هى راجعة من امتحانات الرياضيات و أخد الامتحان أحله.

المهم, على بداية الدراسة فى 15-9-1993, مسكت المناهج كووووووووووووولها و قسمتها على عدد الأيام, بحيث أنى أكون مخلصها كووووووووووولها على أول فبراير-1994 و قد كان فعلا -أصل أنا فى الثانوية العامة ماخدتش دروس خصوصية خاااااااااااالص, شوف بأه وفرت لأهلى فلوس أد ايه- و من أول فبراير, بدأت أراجع كل المواد و أحل أسئلة من الكتب الخارجية كووووووووولها و نماذج الوزارة كوووووووووولها, لحااااااااااااااااااااد, ماجه الامتحان !!!!!!!!!!!!:majd(4)::majd(4):.

كانت أيام, كان الواحد فيها لسه متفاءل بالحياة و كان فاكر أنه اذا عدى الثانوية العامة و دخل الكلية اللى عاوزها, يبقى الحياة, ماعدش فيها مشاكل, سذاجة فعلا جدا آخر حاجة.

انا عمرى ما ذكرت ولا اعرف يعنى ايه مذكره
اه الواحد يفتح الكتاب ويحفظ شوية كلام ويجى يراجع هعليهم قبل الامتحان وتانى يوم الصبح يخش يكتب اى حاجه وخلاص
وايام وعدت

انااكترواحد فى مصر ذاكر فى كافيهات ههههههههههههههه
ربنا يعينك

إنسي إنك تسأل حد بيعمل ‘يه و تعمل زيه
كل واحد قدراته مختلفة .. و بعدين هل نجح ولا لأ؟

عموما أنا عن نفسي .. لم أذاكر أي شيء إلا الرياضيات حتي شهر فبراير بدأت بالمذاكرة 6 ساعات يوميا علي 3 شفتات وصلت لـ 8 ساعات أيام الامتحانات .. ولا أشجع السهر و القهوة و المنبهات إطلاقا أو أخذ الدروس الخصوصية و الوقت الضائع منها أكثر من الاستفادة
و حصلت علي أعلي مجموع في أول شريحة و دخلت صيدلة برغبة شخصية
ربنا يوفقك