هو المفروض الواحد يكون عمل ايه فى حياته قبل بلوغ سن الاربيعين
عشان يكون حاسس برضا عن نفسه
عرض للطباعة
هو المفروض الواحد يكون عمل ايه فى حياته قبل بلوغ سن الاربيعين
عشان يكون حاسس برضا عن نفسه
كل واحد و ليه تطلعاته و آماله و أحلامه المختلفة عن غيره ....
عن نفسي :
على مستوى العمل :
1-حلم اتحقق :
كنت بدرس مشروعات مختلفة و بنشرها على النت و زمايلي كانوا بيضحكوا عليا و شايفيني مجنون و بالمقابل انا كنت شايفهم موظفين أقصى آمالهم 7% زيادة و المنحة يا ريس و دخلت لعبة قمار في يناير و سبت الشغل كمهندس وردية في مصنع كبير و مستقر و بقيت مدير مصنع تحت الانشاء ( المشروع اللي انا عملتله دراسة جدوى و الممول اقتنع بيه ) , و بعد 10 شهور من العمل ....
بكل فخر و اعتزاز أقدر أقول اني حققت أول هدف ليا و هوه تركيب و تشغيل و ادارة مصنع قمت بدراسته و حاليا انا في مرحلة تجارب التشغيل الأخيرة و ان شاء الله الانتاج الفعلي بعد العيد الكبير ...
طبعا زمايلي اللي كانوا بيتريقوا عليا السنة اللي فاتت , السنة دي فرحانين ليا و دول الأغلب و شوية بيفكروا انهم ممكن يعملوا زيي بس قلقانين .. طبعا انا موظف في المصنع مش شريك و لا ليا نسبة فيه , لكن فرق كبير بين مهندس وردية و بين مدير الشركة أو المصنع ...
2- حلم لم يتحقق بعد :
امتلاك حصة في المصنع و ان شاء الله خلال سنة يتحقق
3- حلم لم يتحقق بعد :
استصلاح أرض صحراوية و عمل مزرعة دواجن و رومي و عجول و خرفان و ماعز و صناعة جبنة و بعض الصناعات القائمة على الانتاج الزراعي و الحيواني زي المربى و الخضار المجمد حاجة زي مزارع دينا كده ... و ده ان شاء الله خلال 3 الى 5 سنوات هبدأ فيه .
على المستوى الأسري :
1- حلم اتحقق :
الزواج من زوجة على مستوى خلقي و ديني و اجتماعي مناسب و الحمدلله
2- حلم لم يتحقق بعد :
عدد 12 من الأولاد و البنات ... اللي اتحقق حتى الآن بنتين و ولد و ربنا يسهل و البقية تأتي ...
على مستوى العائلة الأكبر :
1- حلم لم يتحقق :
عمل جمعية للعيلة و يكون هدفها تشغيل و تعليم و مساعدة شباب و بنات العيلة المحتاجين .... للأسف كلهم زي زمايلي في الشغل الأولاني محبطين .... لكن ربنا يسهل و أقدر أبدأ لوحدي زي ما عملت المصنع لوحدي على الورق و ربنا رزقني باللي يحوله لمبنى و معدات و شركة متوسطة الحجم ...
على مستوى البلد :
حلم لم يتحقق :
1- ان يكون الشاب المصري على مستوى مهني و علمي و نفسي يؤهله للعمل بكفاءة عالية زي العامل الأوروبي , كمان أحلم انه ياخد مرتب من وظيفة واحدة بس يكفيه و يحوش منه و يعيش حياة كريمة . و ده أتوقع حصوله خلال 5 سنوات بالكتير لأن القطر بيسخن و طالع من المحطة
2- بحلم اننا نحتاج نجيب عمالة من أفريقيا لأن العمالة المصرية مش مكفية و عندنا عجز كبير في اليد العاملة ... و ده هيتحقق خلال 10 الى 15 سنة ...
انت مثال جميل جدا لشباب مصر
مجرتش ورا المكسب السريع وفعلا عرفت معنى التنميه الحقيقيه للفرض والمجتمع
لما اوصل التمانين اقولك عملت ايه في الاربعين الاولي علشان هاخد اربعين سنه افكر في اللي عملته في الاربعين الاولي
اوعي تعتبرني بتريق انا اصلي حاسس اني مش مطول في الدنيا دي
لما انا لسه 30 سنه وجالي كلسترول وضغط
امال في الاربعين هيكون عندي ايه شلل رعاش (اللهم احفظنا)
اهم اعمالي قبل الاربعين؟؟؟ياخبر دا خلاص قربوا يخلصوا ونا معملتش حاجة