الموضوع: الاستعدادات قبل الذهاب لسوق العربيات - دروس وعبر -

المشاركة الأصلية كتبت بواسطة friendship7897

طريقة عرضك للرحلة طريقة جميلة جداً وصحيحة مية في المية علشان أنا نزلت أكثر من مرة لسوق السيارات للبيع والشراء ، وإنتشار التجار صحيح وأغلبيتهم بنفس الجلابية اللي لابسها الراجل المشمئز ، والتجار لما يشترو بيبعدو عن اللي فيها ورق ، ودا مصطلح منتشر هناك أوي يعنى فيها توكيلات كتير ، لكن لما بيبيعوا بيقولوا بكل برود ( دي فيها ورقتين بس ) ، ومنتشر هناك كمان مع التجار (كسر الزيرو) ودي عربية موديل حديث جداً (سنة أو سنتين ) 2009 أو 2010 وعاملة 5000ك فقط أو أقل قليلاً أو أكثر بتكون فارقة عن الزيرو من 10000 إلى 15000 ج ، وبيكون التاجر اللي بيبعها مشخبط عليها بقلم أصفر على كل زرايرها كأنها لم تستخدم خااالص ، أنا أعجبت بأكثر من عربية بالشكل دا لكن خوفت من صاحبها ( صاحب الجلابية ) وقلقت من طريقته ، لكن الحمد لله بعت عربيتي هناك وبالسعر اللي أنا عرضته وكمان لواحد بجلبية ( أقصد تاجر ) بعد ما أقعد يهت لي فيها _ دي مش فبريكة - دي رشة - دي موديل قديم ، قولت له لو مش عجباك ليه كل شئ نصيب - مشى لكن رجع تاني وإشترها .لكن فيه نصائح عامة للبيع :
1) روح السوق بدري على أد ما تقدر .
2) أركن في مكان مميز ( لو يوم الجمعة ففي الربع الأول من السوق ، لو الأحد يكون في الثلث الأول من السوق ) .
3) لا تخرج من السوق قبل ما تاخد عربون ولو صغير جداً ( علشان فيه ناس أو تجار ) يخرجوك من السوق ، وبره السوق لو تجار يغيروا كلامهم ، ولو ناس عادية تفرج مكانيكي عليها وتخسف بيها الأرض ، وفي الحالتين تكون خسران ( خروجك من السوق وخسارة اليوم كله ومش ممكن تعرف من الزحمة تدخل تاني أو خسارة في الفلوس ) .
4) ما تسبش مبلغ كبير على حس ( التوكيل والمخالفات ) لأن ممكن التاجر يطنش على الباقي أو يغلبك عليه .
5) لو فاتك الشهر العقاري اللي في السوق - يعني بعت بعد مواعيد عمله الرسمية - ما تقولش للتاجر أنت هتعمله التوكيل فين - لأنه ممكن يطلب صورة منه ، ويطنش على الباقي ، لأن التجار هناك ينصحوك بأنك تيجي بكره ( السبت يعني ) وتعمل التوكيل في الشهر العقاري بتاع سوق السيارات .

دا اللي أنا فاكره دلوقتي ، والله الموفق

نصائح قيمة فعلا وجزاك الله خيرا عليها. احب اوضح حاجة ودي معلومة عرفتها من تاجر عربيات ... لو عاوز تشتري عربية روح السوق بعد العصر ، اللي بيبيع بتبقى دماغه ساحت من الشمس وبدل مابيضرب سعر في العلالي وغير واقعي بيبقى نزل لأرض الواقع وبيبقى مستعد للتفاوض كمان علشان مايبقاش يومه انتهى على فشوش وماباعش العربية. مش قصدي بكده استغلال الناس حاشا لله انما دي المعلومة اللي الراجل ده قالهالي.

المشاركة الأصلية كتبت بواسطة friendship7897

جزانا وإياكم ، وموضوع الشرا صح جداً لأن فعلاً الناس بتكون زهقت ، وبعدين دا مش إستغلال ولا حاجة لكن البيع والشرا دي تجارة والتجارة شطارة وبعدين الواحد بيكون حاطط للعربية سعر أولي وسعر نهائي فهو في أخر اليوم بيكون وصح للسعر النهائي ، لكن ما توصلش للمغرب علشان الشرا ما يكون بالليل ، ولو دفعت عربون وكتبت عقد - الناس بتحط شرط جزائي ممكن تخسره لو غيرت رأيك ، وكما ما تدفعش عربون وتسيب العربية - لأ حاول تدفع المبلغ الأكبر للثمن وتستلم العربية وتسيب يا دوب ثمن المخالفات والتوكيل تقريبي -[gdwl] وكمان لو العقد اللي أنت شاريه مفيهوش بند لساعة الإستلام ضيفه إلى العقد بتاريخ وساعة الإستلام[/gdwl] .

مهمة جدا تاريخ وساعة الأستلام دي وفيه ناس كتير بتقع في مشاكل بسبب انهم مش مدركين اهميتها