الموضوع: عطل مفاجىء بالتكييف

السلام عليكم ورحمة الله يا صقور
النهاردة حصلى موقف بايخ كده مع التكييف
نزلت زى كل يوم الصبح الشغل ودورت وسخنت العربية وبعدين شغلت التكييف عادى تمام التمام
وفجآة بعد الظهر نزلت اجيب حاجة وركبت تانى بادور واشغل التكييف
لقيته ما بيشتغلش وبيطلع هوا المروحة سخن واللمبة بتاعت زرار التكييف مش منورة زى ما يكون الكهرباء فاصلة عنها
محاولات يمين وشمال وفتحت علبة الفيوزات تحت التابلوه لقيت كل الفيوزات شكلها سليم ومفيش حرق ولا غيره
ومحتار يكون السبب ايه؟
مرة حصلت قبل كده كان السينسور فصل لما خدت نفق الازهر مرة ع الاول والعربية سخنة الكومبريسور فصل واشتغل مروحة بس ساعتها كانت اللمبة منورة !!!
المرة دى مختلفة خالص واول مرة تحصل معايا
واخيرا استعمالى للتكييف خفيف جدا واغلب سواقتى على طرق سريعة وفى الفترة الاخيرة باشغله على 1 وساعات كتير باليل باقلل مؤشر الحرارة كمان من شدة البرودة وجوة البلد مشاويرى قصيرة وقليل اوى لما باشغله وامشى ع الاول كتير لو فى زحمة او وقفة فى اشارات وعمرى من اول الزيرو ما سيبت الزرار مفتوح ودايما باشغل المروحة الاول على 1 او 2 واسيبها ثوانى وبعدين ادوس على زرار الA/C ولا عمرى دورت والتكييف شغال زى ما باشوف البعض بيعمل

وشكلى كده مضطر اخبط مشوار للسبع بكرة باذن الله عشان اشوف ايه حكايته