القيادة في مصر ( فتي - زنق - اختلاف )
السلام عليكم
اكيد قيادة السيارة متعة بتتفاوت من شخص لشخص ، و على حسب التصنيف الامريكي للقائد بيتصنف لنوعين ، قائد هجومي وقائد دفاعي
والهجومي هو الي مثلا بنطلق عليه هنا قلبه جامد
والدفاعي الي بنقول عليه رزين في سواقته وهادي
ولكل نوع مميزاته وعيوبه
لكن يا ترى في مصر نفس التصنيف ولا ظروف شوارع مصر ممكن تغير التصنيف دا ؟
على العموم من منطلق خبرتي في القيادة و بما اني من سكان محافظة الجيزة فطبعا احتكيت بكل انواع الطرق و الكباري وانواع قائدي السيارات وظروف القيادة
يلا نبحر سويا في بحر القيادة في مصر الغويط اوي وملوش مرسى !
نبتدي بالقيادة النهارية من 7 صبحا الى3 عصرا مثلا :
دا موعد الذهاب للعمل لمعظم الموظفين و الحقيقة في الوقت دا لو عرفت تروح شغلك في معادك تبقى بتتوهم ، ومن كتر الزحمة والحر ممكن حالتك النفسية تهيألك انك وصلت ومضيت او بصمت في الشركة الي شغال فيها وانت لسه مثلا في ش الجامعة
انت اصلا لو عرفت تجيب اكتر من التاني يبقى انجاز
بينتشر في الوقت دا برضو مخلوقات ميكانيكية تسمى " ميكروباص " والناس بتقول جمعها ميكروباصات بدل ميكروباصز - بالظبط زي ما بنقول كانز بيبسي بدلا من" كان بيبسي " والجمع كانز - لكن المصريين مبيحبوش " إس الجمع اقصد زين الجمع " لاسباب مجهولة مش موضوعنا
نرجع للميكروباصات وهي ايضا تنقسم الى انواع
1 - الميكروباص المصفح وله اسماء عديدة مثل
العشة - الترامكو
وهو ميكروباص وشه شبه قفاة يعني وهو ماشي متعرفش هو رايح ولا جاي شبة الصندوق باربع عجلات ومصنوع من مخلفات الدبابات الحربية وصاجه غير قابل للثني او الكسر .
ويعمل بالجاز
2 - ميكروباص الجميعة او الميني باص
ولا اعلم لماذا يقال عليه جمعية ؟!
ومما هو جدير بالذكر ان هذا النوع لا يملك مرايات و بيسوق تحت شعار الي "خايف على نفسه يبعد "
وهو ضخم الجثة عريض المنكبين يقف على بابه شاب واقف على رجل واحدة طول النهار ورجله التانية مدلدلة من الباب وبيقعد ينده على الناس برغم ان الناس بتكون مبظبظة من الشبابيك ومدلدلة من الباب وقاعدة على حجر السواق و برضو يقف لكل الي يشاورله والشاب ابو رجل واحدة بيقول بمنتهى الرقي والتحضر ، للناس الي واقفة جوة " خطوة لجوة يا استاذ "
وبيسموا الراكب الي عايز يركب بنفس اسم الاجرة يعني مثلا لما يكون حد عايز يركب السواق يقول للشاب هات النص جنية الي واقف على الارض دا ، او 75 قرش او جنية هو ونصيبه بقى .
3 - الميكروباص الفولكس " الكبسولة " نظرا لانه شبة كبسولة المضاد الحيوي وعادة بيكون ابيض اللون
وهو بيكون على خط الهرم او فيصل وبعض الشوارع الجانبية مثل العشريني والثلاثيني ... الخ
وبيتميز دائما بالكاسيت وسماعات الافراح الي مركبها في الشنطة وصوت الاغاني طالع يهز العربيات ويطبل على طبلة ودن الركاب .
4 - الميكروباص التويتا
ودا برغم ان معظم دول العالم وقفت استخدامه عندها لانه بيسبب تلوث لكن مصر لسه بخير وميهونش عليها يتوقف حال المصانع المصنعه له
ودا للسفر وهو ارقى انواع الميكروباصات لاحتوائه على تكييف - احيانا - وبيروح اسكندرية والمحافظات
برغم اختلاف انواع الميكروباصات لكن بيشتركوا في حاجة مهمة وهي نفسية قائديه
حيث الذوق والاخلاق والتربية والرقي والاحترام للراكبين و لقواعد المرور وقائدي السيارات الاخرى .
تنتشر ايضا في هذا الوقت كائنات طفيلية تسمى " فزب وموتسيكلات "
ودول مبيبانوش في المريات تلاقيهم زي الميكروب الخبيث جنبك او قدامك
- انا مرة لقيت موتسيكل على الكبوت بتاعي - متستغربش انا فعلا كنت باخد ملف و لقيت الموتوسيكل دا جاي من الاتجاه التاني وهووووب لبس في جنب العربية واترمى على الكبوت و مما هو لذيذ اني كملت اللفة وانا حاملة على كفوف الراحة - كبوتي - لغاية الرصيف بس الحمد لله خلصت على خير .
في هذا الوقت من اليوم تكتشف حقيقة مهمة جدا وان شوارع مصر مصممة من ايام السبعينات والروقان وان الي كان معاه عربية في الوقت دا يبقى فل من فلول الحزب الناصري مثلا
لكن دلوقت الناس كلها فلول فالكل معاه عربيات والشوارع مصممة يتمشي فيها بحنتور .
باقي اليوم ميختلفش كتير عن اوله الا في ان مفيش شمس ودا بيقلل من مخاطر التهيؤات شوية .
المطبات :
المطبات في مصر ملهاش مثيل في الكون كله .
المطب في مصر يعرف على انه عقاب وليس رادع للسرعة
ففي العالم كله المطب بيكون بمواصفات معينة في اماكن محسوبة وله اشارات قبله بعدة امتار علشان تعرف ان في مطب فتهدي السرعة علشان تلتزم بالسرعة في المكان او اسباب اخرى .
في مصر المطب لهدف واحد وهو لتشغيل توكيل السيارة او الصنايعية وعقابك انك متعرفش ان في هنا مطب .
والمطب انت وحظك بقى يا العربية تكمل بيك المشوار يا تركن على جنب يا اما تكمل المشوار بنص العربية وتسيب النص التاني عند المطب و تبقى ترجع تاخده بعدين .
وتلاقي المطب الخبيث المستخبي في الضلمة والمطب الي عبارة عن فحت لتحت والمطب المطبب يعني مطب طالعله مطبات فوقه ، دا غير المطب صناعة الاهالي والي بتلاقيه في الشوارع الجانبية ودا لوحده حوار .
ومهما كنت قائد ناجح فهتلبس يعني هتلبس ودا شعار ادارة المرور .
دا حتى الكباري عليها مطبات !!! والي بيمشي على كوبري اكتوبر اكيد فاهم كلامي
القيادة بالجي بي اس :
حاولت تسوق بالجي بي اس قبل كدا ؟
انا حاولت مرة او مرتين ووصلت لنتيجة مهمة جدا وهي وماله لما تسأل سواق التاكسي الي جنبك او الناس في الشارع ؟ كفروا ؟؟
الجي بي اس الي كان معايا لما يقولك يمين يعني شمال والعكس
بيدخلك في شوارع عكس خصوصا بقى يا معلم لو ماشي في شوارع عشوائية او جانبية .
وفي الاخر هتسأل يعني هتسأل
معرفش اذا كان جي بي اسي بس الي كدا ولا حد جرب ونجح انه يوصل .
دا غير البطء الشنيع في الحسابات و التداخلات وكتير كنت بحس ان صوت الكمبيوتر بتاع الجي بي اس هيقولي بصوته " ا ق ف لني يا ابن ال ت ي ت "
سواقة الستات :
ودي بقى لوحدها محتاجة موضوع مستقل وسهل جدا جدا تميز الي سايق قدامك دا راجل ولا ست من طريقة سواقته واكيد الناس كلها عارفة ليه ، بس دي مش مشكلة في مصر بس دي مشكلة عالمية ههههههههههههههه
واخيرا :
معرفش ليه الناس في مصر اخلاقها في السواقة عاملة كدا ؟ و ليه لو حد حك في حد بس ينزل يسبله ويلعن برغم انه ممكن ياخد حقه بالذوق والتفاهم
ومعرفش ليه برضو الي بيخبط حد مبينزلش يعتذر او يعترف بغلطه ويحاول يصلحه
رسولنا الكريم قال " من اتلف شئ فعليه اصلاحه " صلى الله عليه وسلم
و التسامح صفة المسلمين الي فتحوا بيها بلاد اسيا كلها بالتسامح والامانة والابتسامة
يعني لو حد ضايق حد وبعدين اعتذرله والتاني سامحه والله الحال هيتغير كتير
تفسيري المتواضع للموضوع دا هو انتشار السواقين الجهلاء علميا ودينيا واخلاقيا بنطلق عليهم " العربجية "
وانتشار ايضا مفاهيم " حقي بدراعي " و " الصوت الاعلى يكسب " و " متسبش حقك " الي رسخها الاعلام المصري بافلامة و مسلسلاته في سنوات الضياع الماضية علشان ينشر سوء الاخلاق و الجهل بين الناس فيستبد بالسلطة لانه سهل جدا تقود مجموعة من الهمج بالكرباك على عكس المتدينين او المتعلمين
طبعا كلامي دا ليس باطلاق لاني قابلت ناس في منتهى الذوق حقيقي والاخلاق و كتير شوفت مواقف ناس محترمة وناس كتير بتسامح وناس كتير بتعتذر حتى من سواقين الميكروباصت الي بنعيب عليهم فيهم ناس قمة في الذوق .
لكن بتكلم على الغالب او الصورة الغالبة وليس الاطلاق .
شكرا وتمنياتي باخلاق اسلامية والي هي موجودة في نفس كل واحد فينا . وننسى الي علمهولنا الاعلام المنحط على مدى السنين الفائتة وحتى الان .
شكرا .
................................
اللون الاحمر مخصص للماخلات الاشرافيه والاداريه فقط
9.06م
18/10/2011
مشرف 14 ب