ايه حكايه اللحمه البلدى اللى ب30جنيه

**Yarisawy** · 19-10-2011 02:52 PM

السلام عليكم

انتشر مؤخرا لحمه رخيصه فى البلد , فمثلا تلاقى كتير خيمه منصوبه والراجل بيبيع اللحمه الكيلو ب 32 او 35 جنيه تسأل الراجل اللى بيبيع واحد يقولك بلدى و واحد يقولك ده بتاعه السخنه وثالث يقولك دى من وزاره الزراعه , وكمان بقى فى ناس كمان تبع الجيش اسمهم الامن الزراعى وبيقولوا برضه انها لحمه بلدى .... بس ازاى بقى سعر اللحمه بقى كده ومحدش برضه بيشترى ؟؟؟

طب بتوع الجيش دول ازاى الناس بتاخد منهم لان جمبنا واحده هى اللى فاتحه وبتبيع وكاتبه انها الامن الزراعى وبتاخد من الجيش !!!!

ثم هى الناس دى اشمعنى منتشره دلوقتى .... ايه اللى كان منعهم انهم يعملوا كده من زمان ؟؟؟ ولا منتشرين دلوقتى عشان الانفلات الامنى

وكنت سمعت ان الريان هايعمل الموضوع ده مع السعد بس مش عارف ده تبعهم ولا ايه

**Dr_Mido** · 19-10-2011 03:14 PM

الجيش مبيديش لحمه لحد بيوزعها هو فى شوادر بيعملها او عن طريق مراكز التوزيع بتاعته ولو تكرمت تقلى مكان الفرع اللى بيقلك انه بياخد من الجيش دة

**mido51eg** · 19-10-2011 03:20 PM

فيه اتنين فاتحين جنب محطة مترو عين شمس وفيه كشك كبير فاتح على ناصية شارع ابراهيم عبدالرازق في عين شمس. الملاحظ ان فعلا اللحمة شكلها كويس ولونها فاتح والكشك بتاع ابراهيم عبدالرازق معلق الذبائح كاملة وواضح انها بتلو او كندوز صغير ونسبة الدهن فيها قليلة والسعر تقريبا 35 جنيه . لو حد جربها يفيدنا ياجماعة

**Dr_Mido** · 19-10-2011 04:36 PM

تصحيح لكلامى انا سئلت عن الحوار دة اة فى منافذ بتبع لحمه وشارينها من الجيش فعلا بياخدو تصاريح من جهه اسمها على مااظن الخدمه الوطنيه ودى بتدى تصاريح بشوادر وتوزيع وفى الخدمات العامه بتوفر سلع فى منافذها اى الشوادر بتاعتها ومبتديش لحد وفى منافذ تابعه لوزارعه الزراعه برضه بتبيع منتجات متنوعه

**mailo** · 19-10-2011 05:01 PM

طب إيه حكاية الأمن الغذائي ده عشان ده فالمعادي وحلوان وعين شمس ومايو

**walidmhafeez** · 19-10-2011 07:08 PM

علي فكرة لحوم السخنة مش مجمد ولا منتهية الصلاحية زي ما ناس كتير بتقول, دي لحوم عجول حية بتيجي تدخل ميناء السخنة تتدبح فيه وتتوزع, وعلي الفكرة الختم بيكون ازرق, وتقريبا 90% من فروع فاميلي بتبيعها من 38 الي 40 جنيه

**pro_samir** · 19-10-2011 09:17 PM

علي فكره المنافذ اللي بتبيع لحمة الجيش مش مقيدة بيها فقط ممكن يبيعو لحمة مجمده كمان ومحدش بيسأل طبعا فا كله داخل في بعضه ، عدا منافذ الجيش نفسه

وفي اللحمه السوداني موجوده من رمضان وجميله جدا شغالين بيها من ساعة ما ابتدت تنزل ب39 أو 40 مش فاكر .. في جزارين بيشتروها ويبيعوها بالأسعار العاديه بتاعتهم

**SYD** · 19-10-2011 11:45 PM

المشاركة الأصلية كتبت بواسطة mido51eg

فيه اتنين فاتحين جنب محطة مترو عين شمس وفيه كشك كبير فاتح على ناصية شارع ابراهيم عبدالرازق في عين شمس. الملاحظ ان فعلا اللحمة شكلها كويس ولونها فاتح والكشك بتاع ابراهيم عبدالرازق معلق الذبائح كاملة وواضح انها بتلو او كندوز صغير ونسبة الدهن فيها قليلة والسعر تقريبا 35 جنيه . لو حد جربها يفيدنا ياجماعة

اولا اهلا بيك جاري العزيز

الموضوع دة منتشر جدا كمان في شارع فيصل علي النواصي وشارعي الوفاء والأكل قصدي الأمل وشارع سهل حمزة فيهم بتوع الأمن الغذائي بتاع الجيش باليافطة الخضراء بتاعته

والله المستعان
،
،