الموضوع: التاكيه اتكسر فجأه

العربيه كملت 100 ألف اول امبارح و كنت ناوى أعمل صيانه 100 الف فى نهايه الأسبوع لكن للأسف امبارح نزلت الصبح و مشيت بالعربيه 200 متر و لاقيتها بطلت لوحدها

فكيت وش الكاتينه و اتاكدت ان السير سليم و راكب و فكيت خرطوم فلتر البنزين و اتاكدت ان الطلمبه شغاله و راجعت على الفيوزات فى الكبوت و الصالون و كله تمام

حاولت أدور سمعت صوت كركبه فى الموتور و مش عايزه تدور

فكيت وش التاكيهات و كانت المفاجأه انى لاقيت تاكيه و سوسته مكسورين

قطرت العربيه و روحت للميانيكى بتاعى و فكينا النصف العلوى من الموتور (وش تاكيهات و بيت الكامه و وش السلندر) و لقينا التلفيات صباب معوج و قافش فى الدليل و تاكيه و سوسته مكسورين و الحمد لله لاقينا البستم سليم بس فيه نقره سطحيه نتيجه ان الصباب خبط فيه لكن اعتقد انها مش مؤثره

بعتنا وش السلندر للخراط و جبنا طقم صبابات جديد و الخراط ركب دليل جديد (واحد فقط) و عمل نظافه لكل قواعد الصبابات و كمان روديه لكل الصبابات الجديده و غيرت طبعا طقم اويل سيل صباب و ركبت طقم تاكيهات و سوست صبابات استيراد وكمان كان فيه مسمار مقطوم فى فرن الشكمان طلعه بالمره

انا بقى قلت بالمره أعمل كل حاجه و يبقى كله جديد قى جديد فغيرت طلمبه الميه و سير و بليه كاتينه و سيور تكيف و دينامو و غيرت زيت الباور (لأن طلمبه الباور اتفكت) و زيت الفتيس (1.8 لتر) و حطيت مياه خضراء موبيل (7 لتر) و غيرت زيت الفرامل و ثرموستات كوعه المياه و خرطوم فايظ الزيت و بليه بكره شداد التكيف و جوانات وش التاكيهات و وش السلتدر و الفرن و المانفولد و طبعا بوجيهات و كابلات بوجيهات و فلتر هواء و بنزين

اجمالى التكلفه 2200

بعد يومين هأغير زيت الموتور عشان ننزل وساخه الشغل و هوه اصلا معاده قرب يعنى تقفل باكوين و نص

كله جديد ماعدا طقم السوست و التاكيهات

الموتور دار تمام و طلعه شويه دخنه فى الأول و راحت و صوته كان مش قوى فى الأول و بعد تشغيلها ساعه سلانسيه و مشوار 60 كم الصوت اتحسن لكن لسه فيه غلطه مع صوت تكه خفيفه بتحصل كل 10 ثوانى و الموضوع ده مش مريحنى و كمان مخنوقه زى ما تكون البوجيهات بايظه و الميكانيكى بيؤكد ان كل ده هيختفى بعد 500 كم لما الصبابات و الكوستيبانات تطبع ............ ايه رأيكم؟

معلش طولت عليكم بس السؤال اللى مش لاقيله اجابه بقى ايه اللى يخلى التاكيه أو السوسته يتكسر

أها
ألف شكر على ردك واهتمامك ياأحمد باشا
وكويس قوي إن الموضوع ده محصلش وانت على سفر وعلى سرعه
أكيد كانت هاتبقى الخساير أكبر
إحمد ربنا وكويس قوي إنك غيرت كل الحاجات دي
ربنا يحفظك ويحميك