الموضوع: علبة البيئة

من فترة بسمع صوت زنة جاية من الشكمان و كل شوية اقول حروح اكشف علية خصوصا انى لسة مغير العلبة الوسطانية من شهرين تقريبا . المهم و انا ماشى فى الحرفيين النهاردة الأحد و لأجل الحظ المهبب وجدت محل شمكانات شغال قمت داخل علية و حاكيلة حكاية الزنة الى بسمعها . رفع العربية و نزل تحتها و دور العربية و داس بنزين و قالى علبة البيئة هى الى تعبانة ممكن نركب غيرها أو ننظفها انا معجبنيش شكل الى حيغيرها كان باين عليها انها متجددة . قلت له ننظفها احسن . قام فكها و لقيته بيشيل حاجة زى الفلتر منها او شكلها زى الشبكة . انا قلت يا خبر اسود ايه الى بيحصل ده :arghh: و الدم ضرب فى نفوخى و قلت انت بتعمل ايه قلى ماهو الحشو ده باض و احنا بنظفة من جوا العلبة و نحط ماسورة مكانه . انا حسيت انى دخلت فى الحيط و انى بتعامل مع واحد مختل عقليا . و سلمت امرى لله . ما شال الشبكة خلاص و قعدت زى العبيط لحد ما خلص و قالى نطلع نجرب . قلته كفاية كده و حاسبته و خت العربية و روحت . المهم انا ملاحظ ان صوت الشكمان عالى . و لما شغلت التكييف الصوت على اكتر . و حاسس بصداع و سدت نفس من ساعتها . حد يعرف يقولى ايه الى حصلى ده و يا ترى صح و لا غلط و الحل ايه .