بص يا سيدي
انت لما قولت اسم المنتج انت كده نورت الموضوع
باور بالانس من الاخر موضه اولا واخيرا بغض النظر عن فوايدها -اللي بصراحه مش مثبته معمليا- معظم الناس اللي بتشتري بتشتري علشان موضه
فممكن بعد سنه او سنتين تلاقي بح طلع منتج تاني او خلاص الناس زهقت وبقي الاقبال ضعيف
ده غير كده الفيرست كوبي مغرق الدنيا وباسعار ارخص بكتير من سعر الاصلي
حقولك حاجه اول ما نزل المنتج ده كلو -الامن رحم ربي-كان بيحور ويقول انو اصلي مع ان السعر مش منطقي يعني هي ب 30 دولار من الموقع و بدون اي مصاريف تانيه يعني حوالي 180 جنيه وتلاقي الراجل بيبعها 120 طب ازاي
دلوقتي لان معظم البايعين اكتشفو ان الناس مهتمه بالشكل قبل اي حاجه بقو بيقولو بمنتهي الصراحه انها كوبي وبيبعوها باسعار اقل من 60 جنيه والناس بتشتري علشان هو فعلا يهمو الشكل انو يبقي لابس شبه بيكهام و رونالدو والمشاهير و مفيش حد حيجي يقولو والنبي تعالي اقيسلك الهولوجرام(هي بيقولو ليها تاثير برضو بس اقل من الاصلي)
حتقولي ما انا حاخد توكيلها في الشرق الاوسط كولو يعني معايا برضو دول الخليج (اللي معندهمش مشكله نسبيا في الفلوس وبيموتو في البراندات لزوم المنظره-برضو الا من رحم ربي بردو-) دا غير ان برضو في ناس هنا بتدور علي الاصلي علشان التاثير والقيمه وكده
حقولك الاسوره صغيره وخفيفه جدا ودا بيسهل اوي انها تتجاب من بره مع اي حد لانها مش حتعملو مشكله في الوزن مثلا ويقدر يجيب كميه منها بسهوله بالغه
تاني نقطه بتاعه دول الخليج اولا انت يااما حتفتح فروع وموزعين في الدول دي وده واضح انو بعيد عن امكانياتك حاليا(انا اصلا شاكك انهم بيلبسوك-لامؤاخذه في اللفظ- الكميه دي لانهم علشان يدوك توكيل لازم فروع رئيسيه ومنافذ توزيع زلا يبقو بيهزروا بصراحه) فحنستبعد الطريقه الاولي لضعف الامكانيات الماديه
الطريقه التانيه انك حتبيع اونلاين وطبعا احنا عارفين سهوله الشراء بالنسبه لدول الخليج اونلاين معظم الشركات بتبقي فاتحه الشحن ليهم-معرفش وضع التوكيل ده بصراحه-وهم اصلا معندهمش تعقيدات في الجمارك والتخليص زينا فبالتالي سهل انو يطلب من اي موزع في اي منطقه وحتجيلو
وزي ما قولتلك في الاول الموضوع موضه و فيه رسك عالي وممكن بعد ماتشتري الكميه دي تلاقي نزل نوع تاني زي ما حصل في ال2200 و ال3000 فتضطر تنزل علشان تبيع الستوك اللي عندك
انا بعتذر عن المشاركه الطويله جدا بس انا حبيت ابين الموضوع من كل الجوانب ومستعد لاي نقاش من حضرتك -رغم طول المشاركه لسه في حاجات مقولتهاش برضو-
والقرار طبعا اولا واخيرا لحضرتك
المفضلات