عرض للطباعة
شباب انا عايز اعرف مميزات وعيوب العربية دي وسعرها كام لو حالتها مش متبهدلة واستهلاك اقل سعة فيها اد اية وقطع غيارها وثباتها وهل ممكن تتوطي ولا عشان تتوطي هتغير عفشة
عايز اعرف كل حاجة عنها
http://images03.olx.com/ui/1/43/40/1714340_1.jpg
http://www.photosmacking.com/images/...p-cherokee.jpg
الاستفسار التاني
هل ممكن يركبلها موتور ديزل تربو 2000 سي سي مثلا ولا مش هينفع
ولو هينفع هتكون التكلفة في حدود كام
شكرا واسف للاطالة
متابع
اية يا جماعة هو محدش عدي من الشارع دا ولا اية؟؟؟؟
فينا يا مينا باشا انت وعتاولة ال سي يو في
متابع
وفى انتظار استاذ مينا هو اللى هيقولك الخبر الاكيد فى الموضوع ده ويقدر يفيدك بكل امانة
اللى هقدر افيد حضرتك فية الاتى
الشكل اللى فى الصورة بدا من 1984 الى 1996
الشيروكى عربية محترمة جدا جدا وعمرها متقول لأ ابدا ولكن فى المقابل محتاجة ان ايدك تكون فى العربية
بمعنى انك تخلى بالك من صيانتها متستناش العطل لما يكبر هتلاقى منها اداء محترم جدا
قطع الغيار الاصلية معمرة جدا جدا واسمها موبار
بالنسبة للمميزات
انك بعد مكنت بتخاف وانت ماشى بالعربية من ان حد يخبطك بقيت انت اللى بتخوف
ويتعملك حساب عالطريق حتى من بتوع الميكروباص
علو العربية اتاح ليك انك تعمل اللى انت عايزة
القوة الجبارة
بالنسبة للموتور ال6 سلندر
4100 سى سى
190 حصان عند 4750 لفة
عزم 305 نيوتن عند 4000 لفة
اما بالنسبة للموتور ال 4 سلندر ودية اقل سعة بالنسبة للى بينزل مصر
2500 سى سى
130 حصان 5250 لفة
203 نيوتن عند 3000 لفة
اما بالنسبة لا ستهلاك البنزين كالاتى
ال6 سلندر
16.8 ليتر لكل 100 كم جوة البلد
13.1 ليتر لكل 100 كم عالطريق السريع
ال4 سلندر
13.8 ليتر لكل 100 كم جوة البلد
11.2 ليتر لكل 100 كم عالطريق السريع
اما بالنسبة لقطع الغيار زى مقولت الاصلية اسمها موبار معمرة جدا جدا
ال4 سلندر قطع غيارها اغلى من ال6 سلندر ولكن مش بفارق كبير
موجود كمان من قطع الغيار الاصلى والصينى والتايوانى وانت وميزانيتك
ولو حضرتك عايز تتاكد من قطع الغيار انزل حضرتك شارع شامبليون والحرفيين
دية الاماكن اللى متوفرة فيها قطع غيار الشيروكى واسال عن الاسعار
اما بالنسبة للعيوب
العفشة نشفة اى حاجة تحت العربية تحس بيها
الكنبة الخلفية ضيقة شوية
الثبات وكعادة سيارات الدفع الرباعى مش اوى مقارنة بالسيدان
لان على اد معلو العربية ميزة الا انة بيقلل من ثبات العربية
ولكن منقدرش نقول ان دة عيب لان دة حال سيارات الدفع الرباعى
ولان اللى جايب عربية دفع رباعى مش جيبها عشان يقفل امبير
ولكن اقدر اقول ان عربيتى على 145 كم مخذلتنيش فى الثبات
ولكن فى النهاية العربية دية مش مصممة عشان تجرى جامد
اما بالنسبة لكون العربية ممكن توطى فانا مقدرش افيد حضرتك فى النقطة دية
النقطة الاخيرة
زى مقولت فى الاول ان اقل سعة عندنا 2500 سى سى
اما فى الخارج فهى بتنزل بثلاث سعات
4100 سى سى
2500 سى سى
ودول عندنا
2000 سى سى تربو ديزل
87 حصان عند 4000 لفة
عزم 188 نيوتن عند 2250 لفة
فبالتالى ممكن يتركبلها موتور تربو ديزل 2000 سى سى
بس هل هو موجود الموتور دة ؟
الله اعلم
واى استفسار انا تحت امر حضرتك
اسف على الاطالة
والله اعلى واعلم فيما قلت
اقتباس:
المشاركة الأصلية كتبت بواسطة ALMAGICO
بجد متشكر جدا يا باشا علي المعلومات الجامدة جدا دي
بس حضرتك مقلتش الاسعار خالص
وكمان هل ممكن يركبلها اي موتور ديزل؟؟؟
يعني هل ممكن يركب فيها موتور التويوتا المكروباص الجديدة
تقريبا 2500 تيربو او 2300 تيربو حاجة كد
اصلة بصراحة جبااااااااااااااار وصوتة واطي جدا بالنسبة للمواتير الديزل زي موتور الدبابة النص نقل مثلاا
ومعلش هو كان في شيروكي قبل الشكل دا؟
لو تسمحلى هذه السياره مينفعش يركبلها موتور ديزل لان الشاسيه بتاعها على علب مش على بار يعنى من المعروف ان موتور الديزل بيبقى قوى جدا و محتاج شاسيه محترم زى الرانجلر مثلا على بار مش علب
يعنى لو اتحط على شيروكى ممكن يشرخلك الشاسيه و يسببلك مشاكل
على حد علمى
لو سمحت ممكن تقولى الضريبة السنوية فى المرور كام بالنسبة ل 6 و 4 سلندر ؟
ممكن يركبلها ماتور ديزل و هي فعلآ فيه منها ديزل لكنه نادر للغايه في مصر و قطع غياره صعب تلقيها ..
لكن مينفعش تركب ماتور عربيه مكروباص و لا نقل .. ده حاجه و الشيروكي حاجه تانيه خالص ...
و تقدر توطي العربيه عادي ..لكن مش هتعجبك و هي واطيه