الموضوع: بلا جواز بلا هم

يبقي أنتا أكيد ... بتتجوز في مصر

- لما يكون العريس محتاج لكل قرش عشان يبدأ حياته وغالبا بيكون عليه ديون ... ومع ذلك يكون جاهز يدفع في يوم واحد أو يومين - ملهمش عازة - من 6000 جنيه لغاية 20000 جنيه ويمكن اكتر من كده وده عشان يعمل فرح وخطوبة ... وفي الاخر بيطلع من الليلة كلها بشريط فيديو 3 ساعات أراهنك لو بص في الشريط ده بعد أول 3 شهور من الجواز (معلش أصل السكينة .. كانت سرقاه)

- لما يكون العريس من أهل الارياف أو من الصعيد ويدبح عجلين ويعمل أكل للمعازيم ويدفع 9500 جنيه ويمكن أكتر ... وده عشان مستني النقوط بتاع الفرح اللي مش بيكمل 7000 جنيه , ومع ذلك العريس بيكون فرحان جدا لأن جاله مبلغ زي ده علي بعضيه (قال يعني مش هيسدد النقوط ده تاني ... ناصح)

- لما العروسة تتذوق عند الكوافير ومعاها أخواتها البنات يتذوقوا وبنات اعمامها وعماتها وبنات خلانها وخالاتها ويلبسوا فساتين سواريه من عند نفس الكوافير...علي العموم كل دول مش بيتذوقوا عشان العروسة ... بس بيتذقوا لزووم ان الفرح فيه معازيم شباب وعائلات يمكن السنارة تغمز.... والحقيقة ان أي شاب عايز يتجوز بجد بيحاول يدور في الفرح علي البنت اللي تكون في حالها ومحترمة نفسها ياريت البنات تفهم ده ... أما الشباب الهلاس ومفيش أكتر منه مش بيقول غير جملة واحدة ( الفرح ده فيه مزززززز كتييييييير )

- لما تكون عربية الزفة من نوع تويوتا أو متسوبيشي موديل 2008 ومتأجرة من معرض تأجير سيارات ... خلي بالك لو أخو العريس بيعرف يسوق هتلاقيه هوا اللي متدبس في الموضوع ده وهيمضي علي نفسه وصل أمانة (عشان كده انا بنصح أي حد يتحط في الموقف ده بأنه يلبس وش العبيط ومايعدش يعمل نفسه فيه "شوماخر")... ولو محدش في البيت بيعرف يسوق هتلاقي واحد من أصحاب العريس هوا اللي هيتبرع بالسواقة وفي الحالة ديه العريس هوا اللي يمضي علي نفسه وصل الامانة (قال يعني هوا ناقص وصلات أمانة تاني ... علي العموم ربنا معاه)

- لما تلاقي زفة العربيات خلصت وتفاجأ بأن العريس والعروسة راكبين في عربية نوعها شاهين مش متذوقة بتاع واحد من قرايب العروسة ... ولما تلاقي أخو العريس مخنوق علي الاخر وقاعد زعلان وواخد جنب طول الفرح (والسؤال اللي هيتسأل حد يسيب العربية الـ تويوتا موديل 2008 ويتزف في العربية اللي لو اخدت وش دهان من عــ الجنب ممكن تتعمل تاكسي ؟) بس اللي محدش يعرفه ان العربيه الـ تويوتا في وسط الزفة أتخبطت في عربيه تانيه ادى اخرت الفشخره

- لما تلاقي الراجل بتاع الـدي جي بيقول اللي يحب العريس يسقف بالأوي واللي يحب العروسة يسقف أوي ... وطبعا لو محدش سقف هتلاقي الراجل بتاع الدي جي بيقول جملة من أصل جملتين : يأما يقول : ياااه العروسة حبايبها كتير أوي كده – حتي لو محدش سقف – أو اللي مش هيسقف يارب يخش النار

- لو لقيت مجموعة من المعازيم قاعدين صف واحد وبصين في حتة واحدة ومصدرين الوش الجبس ساعتها بتكون كاميرة الفيديو بتصورهم ... وعلي فكرة محدش فيهم بيبص ناحية الكاميرا ... بس بيبصوا ناحية التليفزيون اللي محطوط في القاعة عشان كل واحد يشوف نفسه (قال يعني طلع عــ القناة الاولي)... أو تلاقي مجموعة ساكتة ومحدش بيتكلم وأول مالكاميرا تيجي عندهم يعملوا فيها قرود ويتنططوا ويصقفوا ... ويجيبوا عيل صغير غتت ويحطوه علي الترابيزة ويفضلوا يعملوا شويةرقص اهبل

- لو لقيت الراجل بتاع كاميرة الفيديو مركز علي تصوير العروسة لوحدها وكأن مفيش واحد مرزوع جنبها أسمه العريس

- لما يكون الفرح مليان علي الاخر وفيه معازيم مش لاقيين أماكن ويفضلوا قاعدين للفجر - حتي لو العريس والعروسة ميعرفوش نصهم - عشان فيه رقاصة.

- لما المعازيم تبدأ تمشي من الفرح بعد ما أكلوا الساندويتشين وحتة الجاتوة وشربوا وراها الحاجة الساقعة

- لما تلاقي البنات مستنين يتفرجوا علي العروسة وهي بترقص الرقصة السلو (معذورين أصلهم بيتفرجوا كتير علي فيلم تيتانك)

- لما العريس ممكن يدفع من 5000 جنية لغاية 12000 جنية ويمكن اكتر عشان يشتري السفرة والنيش ... وفي الاخر يسيب السفرة وياكل علي الارض (ده عبيط ده ولا أيه ؟

- لما العروسة تشتري أطقم صيني واركوبال وبيركس واطقم كاسات بـ 4000 ج ويمكن اكتر عشان تملا النيش وبعد كده ماتستعملش غير طقم واحد غالبا بيكون ميلامين (ابو صرصار من عـــ الجنب) عشان بيستحمل .... وفي النهاية بيكون مصير باقي الاطقم يأما الكسر علي مر الزمن أو النظافة الدورية كل أسبوعين لأنها علي طول بتلم تراب لأنها كدة كدة مرمية في النيش وبتتساب للورثة
(ناس غاوية تعب ومرمطه)

- لما العريس يمضي وصل أمانة علي نفسه بـ 20 ألف لأهل العروسة عشان ميعرفش يطلق بنتهم ويوفروا أجرة المأذون ..(ماشاء الله نبيه جدا)

- لما تلاقي العريس قبل الجواز كان بيشتغل فترتين لمدة سنتين أو ثلاثة عشان يحوش تمن الشبكة ... ولما تلاقي العروسة أتجوزت وعندها 27 سنة لانها كانت مستنية العريس لما يحوش تمن الشبكة ... وبعد 6 شهور من الجواز العريس يتزنق بسبب ديون الجواز ومصاريفه وفي الاخر يطلب شبكة مراته عشان يتصرف فيها ويبعها بيعة خسرانة ومخصوم منها تمن المصنعية عشان يسدد ديونه (طاب وليه اللفة دي من الاول ... ماكنا أستغنينا عن الشبكة من الاول بدل وجع القلب)

اهاااااااا وجع قلب من الاخر يا جدع فكك

بلا جواز بلا هم