تقييم و تجربيتي مع الfsv بعد 30.000 كيلو !

**bassem.kamal** · 23-10-2011 09:47 AM

اولا كل سنة و انتم طيبيين و يارب تكونوا بخير دايماً و سلامي لاحسن ناس هنا عشاق البريليانس

ندخل في الموضوع علطول بقي و نقول المهم

1- غير نادم علي شراء هذه السيارة والله .. والحمدلله

2- التسارع اصبح فوق الممتاز بعد التليين المظبوط و جرايا جدا جدا و صوتها يسخنك اكتر و الحمدلله ياما جبت ناس بيها مع عربيات محترمة جداً و سحبها ممتاز جدا جدا و تجيب معاك زي ما انت عايز ..

3- الثبات ممتاز جداً .. الكشف علي الاطارات و الزواية امر مهم عشان الثبات يبان اكتر طبعاً

4- الصالون محترم جدا جدا و كنت فاكر انها ضيقة في الاول بس مع الوقت في جميع الاتجاهات مرتاح جدا جدا

5- الشنطة دي بقي ( الحكاية ) فوق الممتاز و بتشيل و مش بتقول لاً .. و ياما حملت كتير جدا جدا و فتحت التكييف كمان و التسارع كان ممتاز الحمدلله ... يمكن الملحوظة في الحتة دي ان العفشة في التحميل الكتير اوي بتنشف اكتر و اكتر ما هي ناشفة

6- العفشة كتير ممكن يختلفوا عليها .. تقديري الشخصي انها نشفة حبتين لكن تستحمل اوي اوي اوي و قوية عن اي عفشة تانية في عربية تانية .. في حالات بتبقي ملبن و ناعمة جدا جدا جدا و حالات خاصة كدة بتبقي نشفة طبعاً ..

7- استهلاك البنزين كويس جدا رغم انها اتوماتيك .. ال full tank عملت معايا في حدود 530 ل 520 كيلو ..

8- عوامل الامان معمرة و الحمدلله زي ما هي شغالة كويس جدا

9- العربية دي يا جماعة بالوصف كدة عملة زي شاشة الموبايل بتاعك .. لازم تحافظ عليها اوي اوي اول ب اول علطول .. ( في المطبات - الحفر - النقر - الزلط و الطوب ) الحاجات دي تتاخد علي سرعة 1 يادووب ... حفاظاً علي عفشة العربية طبعاً و نور الفوج !! اكتر حاجة بتتأثر في العربية دي هي لمبات الفوج و المطبات الكتير او الحفر الكتير تخليها تتحرق بس كدة كدة سعرها الحمدلله في اللذيذ ب 15 جنية .. المهم

10- شكلها محترم اوي اوي و لحد دلوقتي لسة شايفها عروسة الحمدلله الحمدلله زي ما استلمتها ( انا بتكلم علي ان ساعات الواحد بيزهق من شكل عربيتو ) مش انها بتلمع يعني و الكلام دة

11- الاضاءة فيها قوية جدا .. كتير كنت بفكر في زينون بس برجع في كلامي كتير و اهي ماشية تمام و شايف الدنيا قدامي .. و اي حد من بعيد دايما يرعشلي بنورة عشان النور عندي الواطي بتاعة زي النور العالي في اي عربية تانية ( كتير هنا عارفين الموضوع دة )

12- التكييف هايل هايل هايل .. يستحق 10/10 .. يمكن بتاخد وقت شوية عقبال اللي ورا يحس بي عشان فعلاً العربية واسعة من جوا .. مش زي الفيرنا مثلاً .. بس هقول 4 دقائق و اللي ورا يبتدي يحس بس علطول ( درجة البرود ) و مفيش تأثير علي سحب العربية خالص و هو شغال

13- الكاسيت كويس بس محتاج سماعات ورا في الشنطة طبعا عشان تحس ب امكانياتة صح

14- المشاوير الكتير بتخلي العربية تسخن .. بس سخونية مش ضارة خالص .. و لكن صهض فقط لا غير

15- المرايات الجنب ممتازة بردو .. و الرؤية فيها واضحة جدا مع الحظر جدا جدا عليها عشان هي واخدة طرف علي برة شوية ... الخوف بس علي قطعة الزجاج اللي فيها بتاعت الاشارة (الفبرة)

16- الفرامل ( حكاية ) 10/10 والله .. و فراملها قوية جدا و تساعد في الطوارئ المفاجأة بس بحس ان ليها استخدام معين كدة عشان تعرف تتحكم فيها صح .. مش مجرد رزع فيها و خلاص و اعتقد ملاكها فاهمين بقول اية

17- طبعاً السنسور كي و وحدة الرفع و مرايات الكهرباء و الجنوط و الكلام دة الحمدلله معمرين و تمام لحد دلوقتي و مفيش مشاكل في اي حاجة فيهم ..

**amaboubakr** · 23-10-2011 11:08 AM

ربنا يباركلك فيها وعقبالنا لما نستلم

**CryptonX** · 23-10-2011 11:29 AM

عقبال ال 100 الف كم ان شاء الله يا باشا.

بس لا قدر الله مفيش اي عيوب او اعطال حصلت ؟ يعني مفيش حاجة اتصلحت في الضمان او كدة ؟

و اخبار التوكيل ايه في المعاملة و المواعيد و قطع الغيار ؟

**midosalah** · 23-10-2011 04:45 PM

بسم الله ما شاء الله ربنا يباركلك فيها
ممكن تشرحلنا موضوع الفرامل ده بالتفصيل ؟

**ahmed_oth** · 24-10-2011 03:44 PM

ماشاء الله ربنا يباركلك فيها ,,,وحاول تتدبحلها حاجه عشان العين
الحاجه التانيه ايه المقصود ب في حالات بتبقي ملبن و ناعمة جدا جدا جدا و حالات خاصة كدة بتبقي نشفة طبعاً .؟؟.

انا حاجزها بس للاسف على يناير ان شاء الله الاستلام
بس كلامك ده زوت اشتياقى لها

**akramesg** · 25-10-2011 02:47 PM

بعد مقريت كلامك افتكرت اعلان قديم فيه نونو بيقول " كنت هقولها "

ربنا يباركلك ويباركلى

**limo81** · 26-10-2011 12:36 PM

عقبال ال100000 يا عم باسم وربنا يباركلك فيها
وعقبالى وعقبال الرجاله لما نستلم....بس انت بقالك فتره مش باين...لعل المانع خيراُ

**bassem.kamal** · 26-10-2011 09:37 PM

اولاً انا بشكر كل واحد قال كلمة من قلبة .. و ربنا يخليكوا :) و اكرم بية واحشتني والله و ردودك الجامدة هههه و عقبال الناس كلها تستلم و البريليانس تعمل شغلها بقي في الشوارع
انا بس كان ورايا حاجات كتير بعملها عشان كدة اسف علي التأخير بجد في الرد عليكو

بالنسبة للأعطال فالحمدلله الحمدلله دي محصلتش او معتقدش كمان انها تحصل اصلا في اي عربية زيرو .. دة نادر اوي لما يحصل كدة ..
لكن العربية جابت مني ( بلي عجل ) عشان كتير اوي كنت بركن فوق الرصيف .. و التوكيل قاللي حاول تخف الموضوع دة ... بس انا كنت بستغل ارتفاع العربية و كدة و مقاس الكاوتش العريض ... و دخلت الضمان في ثواني و كلة كان في التمام يعني مفيش اي مشكلة و الكل يحاول ميطلعش فوق اي رصيف كتير ... بس

بالنسبة للتوكيل بقي
في 3 توكيل ( القطامية - جسر السويس - ابو رواش (الرئيسي) ) و ال3 محترمين جدا جدا جدا جدا
الفرق بس في الزحمة و كبسة العربيات .. جسر السويس رايق جدا جدا عن القطامية و ابو رواش
جسر السويس احسن في الاسعار في المصنعيات
القطامية الشغل فيها جامد و العمال هناك كفاءة جدا جدا علي فكرة بس بتاخد وقت كتير شوية
ابو رواش مجربتوش و يارب مجربو طبعا و ربنا يحفطنا من اي حاجة تحصل

و حوار صوت تزييق من تحت دة اعتقد دة عشان ثقل العربية جامد جدا جدا ... عشان انا لما بخف العربية خالص من كل حاجة مش بسمع اي اي اي حاجة خااااالص ..... لكن لما احمل الشنطة علي الاخر و ركاب علي الاخر انا معاك بسمع الصوت دة من ورا من تحت كدة ( shiko_sla) ؟؟ صح ؟؟ بس مفيش قلق من حاجة ممكن مع الصيانات و دوريات الزيت و كدة تروح الله اعلم لكن هي مش عاملة مشكلة في حاجة بس هو مجرد صوت عشان الحمل الكتير ...

و موضوع الفرامل دة لازم ساعت الفرملة المفاجأة تدوس جامد جدا جدا عشان ال ABS يعمل معاك الشغل الصح و تقف مكانك او متعومش منك ... دة ساعت الفرملة المفاجأة بــــــس طبعاً .. عشان الفرامل المفاجأة بحس انها بترد تاني برا .. فلازم تدوس عليها جامد و انت بتفرمل بيها عشان تقف

العفشة في الطرق النظيفة و المطبات الناعمة و الطرق المتسفلتة كويس بتبان طبعا ناعمة جدا جدا و حلوة
لكن في الطرق اللي مش ممهدة (مدقات) بتبقي ناشفة شوية

و اعتقد اعتقد في رأيي المتواضع بعد تغيير الكاوتش بعد 60.000 كيلو العملية هتفرق اوي .. خصوصاً الكاوتش اللي هيركب هيكون احسن من اللي نازل معاها عشان الكاوتش اللي راكب made in china و اي كاوتش هايتجاب بعد كدة بيكون صناعة تانية ف ممكن ممكن العملية تفرق في موضوع الناشفة دي و النعومة تتحس اكتر