الموضوع: واحد زميلنا فى الشغل اتثبت فى مدينة العبور

الاسبوع اللى فات واحد زميلنا فى الشغل مستنى الباص فى مدينة العبور الساعة 06:30 .. لقى عربية لانوس وقفت جنبه و بيسألوه على الطريق .. و هو بيوصف له نزل منها 2 بمطاوى و ثبتوه و خدوا منه المحفظه و الموبايل و اللابتوب و الفلوس و كل حاجه .. و اتحايل عليهم فسابوا له البطاقة و الرخصة (فيهم الخير) .. و الراجل مجاش الشركة من ساعتها.

بجد موقف صعب جدا .. الراجل بقاله شهر بس ساكن فى العبور .. من اسبوعين مينى باص نقل عام خبط له العربية و جرى و راح عمل له محضر و العربية فى التوكيل دلوقتى.

أنا كنت الأول بقول لو حد ثبتنى هسيب له الحاجه .. بس بجد دلوقتى لو حصل لى الموقف ده .. أنا مش هسيب لحد حاجه و ان شالله أموت .. الموبايل و اللابتوب و الحاجات دى أحيانا بيبقى عليها حاجات خاصه الواحد ممكن يموت من الحسرة لو حس انها مع حد تانى.

و نصيحه يا جماعة كلنا نعمل باك أب دورى للبيانات المهمة على الكمبيوتر و الموبايل و نشيلها فى مكان أمين .. عشان فى حاجات لما بتضيع .. مستحيل ترجعها تانى.

بجد شعور وحش جدا .. ربنا ما يوريها لحد .. و حسبى الله و نعم الوكيل فيهم.

المشاركة الأصلية كتبت بواسطة kareemz

أنا فعلا اخدت قرار لو حصل اللى الموقف ده مش هدى لبلطجى حاجة من حاجاتى .. حتى لو هموت فيها.

ماهي المشكلة مش فى إنه يقتلك ، لأنه مش حيقتلك .... بس ممكن يعورك فى وشك بالمطواة مثلا فتفضل معلمة فى وشك طول عمرك ... ودي مش بينفع معاها إي جراحات تجميل إلا نادرا جدا!

ربنا يبعد عننا كل شر والأفضل التعامل بحكمة فى المواضيع اللى زي دي! الحاجات بتروح وبتيجي ، لكن الانسان لأ.........

تحياتي.