الموضوع: عايز أكمل دراستى برا ..

شكرا للجميع على المعلومات

المشاركة الأصلية كتبت بواسطة amatoallah

و لما يهاجر هيروح يعمل ايه هناك...................

السلام عليكم و رحمة الله و بركاته

يعنى هوا هيجيب منحة و هو أجنبى من دولة عالم تالت و مش هيعرف يجيبها و هو حامل للجرين كارد ؟؟؟!!!!

فرصته فى الحصول على منحة أو فرصة للدراسة بتتضاعف جدا جدا لما يكون واحد معاه جرين كارد عن واحد من العالم التالت و عاوز يروح يدرس هناك على حسابهم.

و ايه المشكلة فى أنه يشتغل و يدرس فى نفس الوقت, ما الأميركان نفسهم بيعملوا كده.

لا تحسبن المجد تمرا أنت آكله......... لن تبلغ التمر حتى تلعق الصبرا

السلام عليكم و رحمة الله و بركاته

طبعا حرية الرأى فى النهاية مكفولة للجميع و بكل احترام.

بس, أميركا و الغرب عموما بتفضل فى المنح, أنها تكون للناس اللى هتقدر تستفيد منهم بعد كده, مش اللى هيخلص المنحة و يرجع بلده و ده بيخلى أن الGreen card holder ليه أولوية فى الحصول على فرص الدراسة أكتر من الأجنبى اللى داخل بفيزا دراسة و بعد مايخلص هيرجع بلده.

أما موضوع أن الطالب العربى يجد مشكلة فى أنه يدرس فى أميركا و أنها أصعب من مصر, فدى أنا ماشوفتهاش عن نفسى فى أى طالب مصرى فى كندا مثلا لأنى رحت كندا لكن مارحتش أميركا و مايتهيأليش أن الفرق كبير بين الاتنين, ده بالعكس, كانوا بيقولوا أن الدراسة هناك ممتعة, آى و الله.

و حكاية أنه يشتغل و هو بيدرس, اذا كان هنا فى مصر, اللى الظروف و التعليم فيها زبااااااااااااااالة, فيه طلبة كانت بتشتغل و هى بتدرس, أنا كنت بشتغل فى أجزخانة والدتى من و أنا فى تانية ثانوى و أخدت الثانوية العامة دى و أنا بذاكر فى الأجزخانة, اللى أنا شفته فى كندا, أنه عادى جدا الطالب يكون بيدرس و بيشتغله شغلانة Part time و لا حاجة, يجيب بيها مصاريفه على الأقل.

و لتانى مرة يا جماعة, التقديم ببلاش و الفرصة لحد 5 نوفمبر 2011, أنا عن نفسى قدمت استخسار بس, رغم أنى معايا PRC , الا أنى قدمت برضه, هو يعنى أنا خسران ايه ؟؟!!!

المشاركة الأصلية كتبت بواسطة AmatoALLAH

مين قال لحضرتك ان المصريين اللي بياخدوا منح دراسيه مش بيستفيدوا منها

انا اعرف 5 واخدين منح دراسيه و 3 منهم كملوا هناك بعد ما خلصوا دراسه و اشتغلوا علي طول و في اماكن محترمه جدا

الفكره اللي عايزه اوصلها انه لما يكون طالع تبع منحه مش هيكون شايل هم الفلوس و هيركز في دراسته بس

و فعلا ادراسه صعبه هناك مش مستحيله لكن صعبه و محتاجه مجهود مضاعف

و زي ما حضرتك قلت كل واحد اكيد له رايه

انا بس حبيت اوضح ليه انا بفضل انه يشوف المنح

السلام عليكم و رحمة الله و بركاته

أنا ماقصدش أن الطالب هوا اللى يستفيد من المنحة, أنا أقصد أن الدولة المانحة هى اللى تستفيد من الطالب اللى راح و أخد المنحة و ده بيكون مضمون أكتر للى رايح هجرة من الأساس, لأن ده بيبقى معناه أن الانسان ده قاعد قاعد و مش راجع بلده تانى على الأقل فى المستقبل القريب, أخد منحة و لا ماخدش, فهو قاعد و بعدين ايه المشكلة أن اللى مهاجر ده ياخد منحة, فرصة حصول المهاجر اللى معاه جرين كارد على منحة دراسة أعلى من اللى مش معاه جرين كارد, اللى بيدور على منحة و هو فى مصر و لما يقبل فى منحة هيبقى يروح السفارة عشان تديله تأشيرة دراسة و يا تديهاله يا اما لأ, لأن المعروف جليا جدا جدا, أن القبول فى منحة دراسة فى أكيركا مثلا و لا فى أى بلد غربى Does not guarantee أنه هياخد التأشيرة من السفارة, يعنى مش معنى أن الواحد يقبل فى منحة فى أميركا مثلا, يبقى لما يروح السفارة, هياخد التأشيرة أكيد أكيد.

اللى أنا أقصده أن لما يكون وضع الانسان فى البلد مهاجر و معاه جرين كارد بتكون الظروف أفضل بكتير من أنه يكون وضعه فى البلد طالب بتأشيرة دراسة مؤقتة, الكلام ده من حيث الدعم اللى الدولة بتقدمه للمهاجرين الجدد و اللى مابتقدمهوش للطالب اللى رايح على منحة, سواء بأه اذا كان الدعم ده مادى و لا فى الوظايف و لا فى دراسة لغة.

مش شرط أن اللى يخلص المنحة يلاقى الظروف مواتية أنه يقعد و يكمل هناك, ده مكن يجيله شغل بعد مايخلص المنحة و يروح ادارة الهجرة و الأجانب عشان يغير التأشيرة اللى معاه فى الباسبور, يا اما يغيروها, يا اما يرفضوا, يا اما يقولوله, روح اعمل Shift من السفارة بتاعتنا فى بلدك زى ما أميركا بتعمل, لكن اللى معاه الجرين كارد, مافيش الكلام ده طبعا, ده واحد معاه كارت اقامة دايمة و الوقت عمال يعد, و بعد مايكمل 5 سنين, يقوم مقدم عالجنسية الأميركية و ياخدها زى البرنس.

و ربنا ييسر الأحوال لينا و لكل المسلمين.

المشاركة الأصلية كتبت بواسطة shrifelmasry

شوف يا عمـــنا

لو أنت بتفكر بجد تكمل دراستك برة .... دة قرار ممتاز و أنصحك تتمسك به

لكن لازم يبقى عندك رؤية للوضع ككل ، بمعنى :

أولاً : موقف أمكانياتك المادية ؟؟؟
ثانياً : هدفك الحقيقى من السفر ؟؟؟
ثالثاً : جهه السفر ؟؟؟

أولاً : موقف أمكانياتك المادية ؟؟؟

* - ميزانية للمعيشة : مثلاً امريكا فى حالة سكن بالمشاركة / مأكل / مواصلات ( 8000 $ سنوي)
* - ميزانية للدراسة : حسب الدراسة ( بكالوريوس / ماجستير / دكتوراة ) وتقدر توصل لها من موقع الجامعه
و بصرف النظر كلا الميزانتين تقدر تجيبها من منتديات الدراسة على النت و سؤال الناس ، و الموضوع بسيط

- ملاحظات حول موضوع العمل و الدراسة :
* دراسة + عمل = مدة طويلة للحصول على الدرجة العلمية لانك أغلب الوقت دراستك جزئية part time .
* ممنوع العمل أذا كنت طالب الا بساعات محددة ... عادة لا تكفي تمويل الدراسة / معيشتك .
* الكلام اللي بتسمعة عن أقل ساعة عمل بـ 10 $ فى 10 ساعات بـ = 100 $ يومياً بـ 3000$ سنوي : أحلام يقظة .... لان أنت معاك تأشيرة دراسة ليس عمل فتستغل اسوء استغلال ، و إذا وجدت 4$ تبقي جدع ، و كل واحد و ظروفة .

# مفيش حل ، لأ في حلول :

أولاً : زى ما الاصدقاء قالوا المنح بتاع فولبرايت / ساويرس / .... لأخرة .

ثانياً : الجرين كارد ، انت بقيت مواطن امريكي و يحق لك منحة سنوية أعتقد حوالى 5252 دولار + قرض تعليم بتقدمة من خلال الجامعة اللى بتدرس فيها عشان الجامعة هى اللى تنجزلك فى الموضوع وفائدة القرض تكون منخفضة جداً جداً لانة قرض دراسة + و نسيناة اهم حاجة انت بقيت مواطن امريكي الا حتة ( ^ _^) من حقك تشتغل زى ما انت عايز من غير لا دائرة الهجرة الغير شرعية / البوليس يطاردك ، او حد يستغلك قوى .

ثالثاً : أذا كنت راجل كفائة علمية ، و قدرت تجيب فى مادتين / ثلاثة أمتياز ، تقدر بقلب جامد تروح تطلب وظيفة مساعد بروفسير ، و بتشتغل و تاخد مرتب معقول و كمان تدرس فى نفس الجامعه ، بالاضافة انك ممكن تطلب فرص الوظائف فى الجامعه بـ ( المكتبات / الكافتيريا / ..... لاخرة ) .

ثانياً : هدفك الحقيقى من السفر ؟؟؟

* خليك صريح مع نفسك لانك أنت اللى ها تشيل الليلة ، و عشان تعرف تحاسب نفسك و تصحح مسارك و انت بتنفذ قرارك .

* مسافر تدرس : انا معاك و دة قرار ممتاز و اوع تسيبة لغاية ما هو يزهق منك .
* مسافر سياحة : و نبقى تدرس .... و مسيرها تخلص ، دة هزار بفلوس و دمة تقيل .
* مسافر للعمل : يعنى الدراسة و تكسر الفيزا عشان تشتغل ، و ادينا بندرس ( كدة المدة مضاعفة و قد يحدث المكروة و ترحل ، فلا درست و لا اشتغلت )

ثالثاً : جهه الســــفر ؟؟؟

- ناس ها تقولك : كندا ، لا أمريكا ، لا أستراليا ، لا أتحاد اوربي

يا عمنا الخلاصة : ميزانيتك قد اية ، و ها تقدر تمول تكاليف دراستك و معايشتك ازاى ... و بناءً علية حدد البلد مع العلم تكلفة الدكتوراة بامريكا لادارة الاعمال مثلا : حوالى 98.000 دولار يعنى بتاع س س س ستمايية مصري و سكن بالمشاركة و حياة ضنك ، لو اخدت سكن خاص /متوسط = تس تس تسعمايية مصري يا كبير .

النصيحة

الموضوع طويل و عايز وجع دماغ
من : تويفل / وثائق رسمية / لجوابات توصية

لكن يستاااااااااااااااااااااا هل و نتجتة كويســـة

أخـــــــر حاجة

شوف الدراســـة فى ماليزيا

جامعتها محترمة ، و تخصصتها متنوعة
تكلفة المعيشة رخيصة
تكلفة الدراسة لا مقارنة مع الامريكتين و الاتحاد الاوربي
الاحوال الجوية أفضل منهم

و أعتقد ان احد الاعضاء فى المنتدى كان عامل موضوع عن الدراسة فى جامعه مالتميديا بماليزيا و بيشكر فيها جامد جداً
، انا حاولت اجيب لك وصلة الموضوع لكن للاسف ما وصلت مع انى انا نفسي كنت مهتم أنى أقرأة تانى

لا تؤجل حلمك .... حلمك مشروع
لكن ماذا ستفعل لتجعلة ملموس

معلومات قيمة جدا و وجهة نظر تحترم .. شكرا جزيلا على الرد