اية المشكلة فى العربية الى فيها قوائم و سقف ؟

**beast2004** · 24-10-2011 05:17 PM

واحد صاحبى ورانى عربيتة فيها حادثة قائم يمين معوج و سقف و عفشة شمال (الظاهر انها مقلوبة)
طبعا تجار الحوادث عايزين يخدوها برخص التراب
وهو طمعان انى اشتريها منه بثمن ازيد شوية منهم و لو حتى الفين جنية

اية المشكلة لما اصلحها و اصرف عليها شوية و تبقى ركوبتى
و لما اجى ابيعها حابيعها على انها عاملة حادثة و مش حخصر كتير يعنى

حد يفدنى فى الموضوع ده

و مشكورين مقدما

**eng.m7md.ali** · 24-10-2011 05:36 PM

بلاش احسن
خليك في عربية سليمة

**omarkhaled55** · 24-10-2011 07:25 PM

المشاركة الأصلية كتبت بواسطة eng f3lix

بلاش احسن
خليك في عربية سليمة

لية بنقول على طوووول بلاش احسن ؟؟؟؟
يا باشا على الاقل لما تبقى العربية مفتوحة وانا الى اقفلها
هبقى عارف كل شبر فيها
متهيلى انها لو اتعملت صح هتبقى احسن من المستعملة السليمة

وبرضو القرار فى الاخر ليك يا باشا ؟

بس هيى عربية اية وكانت عاملة كام كيلو ؟
ومتهانة ولا نضيفة .؟؟؟؟

**Amr Axel** · 24-10-2011 07:48 PM

بص انا هقولك نصيحة بدون ما اعرف نوع العربية او سعرها حتي لو هتاخدها بألف جنيه

طالما العربية عملت حادثة و جت في القوايم او الشاسيه او اتقلبت منصحكش انك تاخدها
اولا العربية خلاص مش هترجع مظبوطة تاني حتي لو مين صلحها و الله اعلم فيها ايه تاني
و حتي لو افترضنا انك هتاخدها شوف هتصرف عليها الالافات اد ايه صاج و رش و عفشة و ميكانيكا و اكيد كهربا و ع حسب ايه اللي فيها تاني و بعد الصرف ده متحلمش انك تبيعها بسهولة الا لو بسعر قليل لتاجر

التاجر اللي بياخدها عنده الصنايعية و كله تبعه من ميكانيكي لعفشجي لسمكرة لدوكو , يلصمها بالفين تلاتة و تشوفها تقول انها عروسة و اللي هيشتريها هيدعي ع التاجر ليوم الدين , عشان كده هتلاقي التجار بيشتروها عادي و لا كأن فيها حاجة لأنه عارف هيعمل ايه و يقلبها تاني يوممن الفرن ع السوق عدل

لو العربية كانت نافعة كان صاحبك صلحها و مشي بيها مش شاف تجار الحوادث و دلوقتي جيلك عشان تكون ازيد منهم شوية

و في الأول و في الاخر حضرتك حر

شوف تفضل ايه ؟ تاخد حتة حديدة مصبوبة بدون ما يكون فيها حتة لحام و لا تاخد حتة حديدة كلها ملحومة

بس اسأل اي حد ملوش مصلحة و بيقولك الصح هيقولك نفس كلامي انا و eng f3lix

و بالتوفيق ان شاء الله

**zocor742** · 26-10-2011 01:42 AM

انا ياجماعة معنديش خبرة فى الموضوع دة اوى لانى مسوقتش عربية كانت قالبة ممكن اكون ركب لاكن مسوقتش
بس انا بشوف عربيات قلبت واتصلحت وبقت كنب وفى نفس الوقت عربيات قلبت ورجعت زيرو
هل هى رجعت كاشكل فقط ولا شكل واداء اقل من الفابريكة يعنى اية التأثير على العربية وهيا ماشية خصوصا على السرعات
وهل نفس الكلام على عربية مغيرة ربع امامى او خلفى او عربية اخدت خبطة عفية فى القايم والقايم اتعوج

يعنى كلة واحد طالما العربية قطعت ولحمت او استعدلت من مكان حساس زى القايم او شاية اتعوج ولا كل حاجة على حسب الحالة
الموضوع دة مهم عشان واحد صحبى معروض عالية النترا 2007 مغيرة ربع امامى كامل كل حاجة قبل الكابينة

**Eng_Mostafa_89** · 26-10-2011 05:33 AM

اى جزء بيتعرض لاجهادات بيضعف وحتى لو شكلة رجع زى الاول بيبقى ضعيف ومش امان
رائ ابعد عنها احسن

**Mohamedtefa82** · 26-10-2011 02:56 PM

الموضوع دة برضة فى حاجة تانية بتحكمة
أنت هاتصرف على العربية قد أية عشان ترجع عربية تانى و تقارنها بسعرها مستعملة و ساعتها أنت هاتعرف تقرر أذا كنت هاتاخدها ولا لأ

**eng.m7md.ali** · 26-10-2011 07:50 PM

بص حضرتك لفت نظري لحاجة مهمة
في عربيات كتير انصاص ولما تتلحم وتترش وتمشي في الشارع بتبان انها نصين اوي
وفي عربيات تانية انصاص بردو بس تشوفها تقول فبريكا ولو كشفت عليها الف مرة هتلاقيها فبريكا
وده بق سر المهنة دي وفي فعلا ناس ايدها تتلف في حرير وعفاريت بيلحمو كل حاجة وترجع فبريكا
اما بالنسبة للاداء سواء نصيين باحتراف او نصين كنب هو هو ومتحلمش انك تاخد اداء الفبريكا
وخلي بالك لحام الانصاص بيتعمل على جهاز مطابقة مواصفات خاص ومفيش منه في مصر غير كام واحد