سلسلة تنوير ....... تكلفة الفساد Cost of Corruption

تكلفة الفساد cost of corruption

فاكر ان الفساد مش بيأثر عليك ؟؟ فاكر ان لما المسئول أو الوزير يسرق مادام بعيد عنك خلاص ؟؟؟؟ عندك شغلك الخاص و مالكش دعوة بحد تانى ؟؟؟ مرتاح و معاك فلوس و مش فارق معاك فساد النظام ؟؟؟ انت مع اللى شايف ان مصر تقول عمرها بتتسرق و كنا عايشين بس الثورة خربت بيتنا ؟؟؟؟

لو انت أى حد .... أى حد ...... فاكر ان الفساد و النهب الحكومى ...... زاد أو قل ...... مش حيأثر عليك شخصيا

يبقى الموضوع ده عشانك

فيه مؤشر عالمى للفساد اسمه CPI او Corruption Perception Index المؤشر ده عبارة عن جدول بتترتب فيه الدول من الأقل فسادا الى الأكثر فسادا

التصنيف ده بيصدر عن مؤسسة الشفافية العالمية Transparency International اللى بتعرف الفساد انه سوء استخدام السلطة المخولة لتحقيق مصالح شخصية ....... خاصة فى القطاع العام أو الحكومى

طب ما تيجو نشوف ترتيب مصر فى أخر تقرير كان ايه
http://www.nileup.com//uploads/image...5d26eb85db.jpg

http://www.nileup.com//uploads/image...7c7cc16bc4.jpg

مصر فى المركز 98 عالميا على 178 دولة ........ يعنى بتصنف Highly Corrupted أو دولة فاسدة الى حد كبير

ماشى يا عم ماهى فاسدة و احنا عارفين ايه الجديد

الجديد انك ماتعرفش ده بيأثر عليك ازاى ...... خليك معايا

خلينا ناخد مثال مشروع بناء محطة توليد كهرباء جديدة ...... و لنفرض أنى أنا بشتغل فى وزارة الكهرباء مهمتى ادارة المشروع

فى البداية بيتم تقسيم الشغل فى المحطة لأجزاء ...... يعنى جزء الأعمال المدنية و جزء الأعمال الميكانيكية و هكذا

وقبل ما يتم طرح الأعمال دى على شكل مناقصات عالمية ....... تقدر كل شركات العالم تقدم فيها وزارة الكهرباء بتطلب منى estimation أو تقدير مبدأى المشروع ده تكلفته حتبقى كام

باجى أنا بقى أحسب و حلل و أجمع و أطرح و أستعرض أسعار السوق الرسمية سواء المصرى أو العالمى للخامات و المعدات و الأجهزة و التقنية أسعار العملة و أسعار الأيد العاملة و كل حاجة و كل ما تتخيل ....... كأنى بالظبط حاقدم فى المناقصة

حسبت الحسبة اللى ماتخرش المية طلعت تكلفة المحطة ......... 1.2 مليار دولار

تمام وزارة الكهرباء عرفت الرقم التقديرى و بدأت تحضر مواردها و تاخد قروض من البنوك الأجنبية عشان تمول المحطة فى حدود الرقم ده ....... 1.2 مليار دولار

طرحنا المناقصة ....... الشركات العالمية و المحلية كلها قدمت ....... و جه ميعاد فتح العروض المالية لأختيار أقل سعر اللى متوقع يبقى فى حدود 1.2 مليار دولار كأجمالى

أوباااااااااااااااااااااا ااااااااااااااااااا

أقل سعر 1.5 مليار دولار ........... يعنى 300 مليون دولار أكتر من estimation طب ليه كده ؟؟؟؟؟

و فيه أسعار تانية واصله ل 2 مليار دولار !!!!!!!!

يأما أنا غلط فى حاجة ....... يأما فى حاجة مش مفهومة

راجعت شغلى تمام 100 فى 100 ....... طب فين المشكلة

جبنا الشركة العالمية صاحب أقل عرض سعرى ........

- انتوا حاسبين السعر ده ازاى على أساس ايه ؟؟؟؟

- سألونا انتو حسبينه ازاى أصلا ده ما ينفعش أقل من كده !!!!

- حساباتنا كانت 1.2 مليار دولار ........ خد راجعها بنفسك

- حسابات و estimation ممتازين الحقيقة ....... بس فين تكلفة الفساد ؟؟؟

- نعم حضرتك ....... تكلفة ايه ؟؟؟؟؟!!!!!!!!!!

- تكلفة الفساد ....... بلدكوا مصنفة كدولة فاسدة الى حد كبير Highly Corrupted

- و ده مين ان شاء الله اللى مصنفها كده بلدنا زى الفل ...... كفاية اشاعات بقى حرام عليكما

- انت ماشفتش Corruption Perception Index اللى بيصدر عن مؤسسة الشفافية العالمية Transparency International

- طب ورينى كده

- اتفضل

- يانهار اسود و مطين بطين ....... طب و حضرتك مالك و مال الكلام ده ...... ده خلاك ترفع سعرك ليه ؟؟؟؟

- بما أن بلدكوا دولة Highly Corrupted ....... يبقى كل الأسعار الرسمية و اسعار المواد الخام و تكاليف استخراج الأوراق و التصاريح و التخليص الجمركى و الضرايب و التأمين و النقل و التخزين و العمالة

أكيد أغلى و أعلى من الأسعار الرسمية ...... نتيجة الرشاوى و العمولات و السوق السودة و كل البلاوى التانية اللى حضرتك عارفها

انتوا فاكرين اننا حندفع الفلوس دى من جيبنا ولا ايه ؟؟؟!!!!

طبعا انتو اللى حتتحملوا كل ده كجزء من السعر

يا سنة سوخة طيب و بعدين حنجيب فرق السعر ده منين ........ تضطر وزارة الكهرباء للتوسع فى الأقتراض من البنوك العالمية بفوائد عالية لتمويل المشروع لحاجة مصر للكهرباء المتزايدة يوم بعد يوم

طب وزارة الكهرباء حتسد الديون و القروض و الفوايد اللى عليها دى كلها منين ؟؟؟؟؟

هو فيه حد غيرك ............ من جيبك أخى المواطن J

الحقيقة وزارة الكهرباء معذورة ....... حتسدد كل ده منين مش حيبقى قدامها غير رفع سعر الكهرباء على كل المواطنين فى مصر عشان تقدر تسد الديون و القروض و الفوائد الهائلة دى

فى النهاية أنت اللى دفعت ثمن الفساد ده من جيبك الشخصى و بفوايد عليه كمان ...... لأن ببساطة كلنا بنستخدم الكهرباء

قيس على المثال اللى فوق ده كل حاجة حواليك ........ أكلك شربك لبسك العربية اللى بتركبها الشقة اللى بتشتريها

أى منتج ناتج عن مشاريع استثمارية مباشرة ............... انت بتدفع ثمن الفساد فوق ثمن المنتج ده

الموضوع هدفه التنوير و التوعية لوجه الله ....... و من اعدادى الشخصى اللى عايز ينقل الموضوع ينقله و مش لازم يقول المصدر لو مش عايز المهم نوصل التوعية و التنوير لكل الناس فى بلدنا

أن شاء الله الموضوع ده مش حيبقى الأخير فى السلسلة بس يا رب يعجبكم

و أى أسئلة أو استفسارات أنا مستعد

فكرة الموضوع فى حد ذاته رائعه

و الموضوع و عرضه جميل جدا بطريقة السهل الممتنع
عن نفسى قرب لى الكثير ممن كنت اعرفه و لا اعلمه

شكرا يا فندم ده من ذوق حضرتك بس

موضوع رائع يا مهندس محمد

على فكرة مش الشركات الأجنبية بس...لأ و المحلية كمان و على أقل مستوى

والحكاية مش مرتبطة بفساد مادي فقط..لأ الفساد الإداري لا ينبغي تجاهله

والفساد الإداري يشمل-على الأقل- الإهمال و عدم القدرة على إتخاذ القرار في الوقت المناسب و من الشخص المنوط به اتخاذه

يعني أنا عارف إن الهيئة الفلانية مهندسيها دون المستوى و ممكن يستخدموا معدات بصورة خاطئة...فاضطر أحمل عقود الضمان و الصيانة أكثر من قيمتها الفعلية

عموما محدش يفتكر الفساد بيروح في يوم و ليلة

ربنا يخليك يا باشا ...... كل كلمة فى الموضوع حقيقية و صحيحة و انا معاك على فكرة فى موضوع الفساد الأدارى أو الفشل الأدارى اللى أحيانا بيبقى ليه تأثير أعظم من الفساد المالى

موضوع هايل يا باشمهندس محمد
مستنيين باقي السلسلة

بس فعلا موضوع الفساد المالي و الاداري محتاج وقت و مجهود كبير علشان يتغير
علشان تغير أخلاق فاسدة و ذمم خربة و مفاهيم خاطئة و طباع سيئة و ضمائر ميته و ناس مطنشه و فاكره أنها عايشة كويس طول ماهو بياكل و يشرب هو و عياله و يكاش باقي الناس تولع بجاز
متهيألي محتاجيين نبدأ من الأجيال الصغيرة علشان تعرف تغرس فيهم مبادئ و قيم غير اللي الناس الكبيرة بيعملوها و متعودين عليها , علشان اللي بقاله 20 ولا 30 سنه صعب يغير من نفسه

ربنا يهدينا جميعا لما يحب و يرضى

موضوع رااائع
شكرا لك

موضوع ممتاز شكرا لك.

وفى امثلة كتير
ممكن موظف فى المرور يعطلك ويطلع عينك علشان تديلوا عشرين جنيه
وممكن تكون انت مدرس ابنه اللى ما بتشرحش وبيضطر يدى لابنه دروس ب500 جنيه فى الشهر يبقى هو ذات نفسه دفع تكلفة فساده
او موظف فى البريد مكسل يبعلك حوالة نقدية لشخص ممكن يكون هيستخدم الفلوس دى علشان يعمل مشروع هيشغل اخو الموظف الكسلان ده
أو الموظف المتخلف اللى بيعطل اجراءات تسجيل مشروع هيشغل ناس
وبالرغم من أن الامثلة دى تبدو سطحية وبسيطة،لكن فى النهاية الدائرة مقفولة علينا وما حدش بيكسب كلنا بنخسر بعض
وفى نقطة تانية ان الموظف ده لو عطلك وما عملكش شغلك ما بيتحسبش لكن لو اشتغل وعمل غلطة ممكن يجيب وجع الدماغ لنفسه فيقولك انا مالى وهو ماله فعلا
النظام الادارى كله عايز يتغير من اول التعيين لتقييم الموظفين لاسلوب للشكاوى
لكن هتقول لمين

والله كلام زي الفل. واضح ان الشعب كله محتاج تغيير لمفاهيمه . ليه مايتعملش مشروع قومي لإعادة بناء الإنسان المصري زي ما تفضل احد الخبراء واتكلم عن المشروع ده في بريد الأهرام من كام سنة ؟؟!!! مشروع يعمل عليه علماء الإجتماع وعلم النفس والأقتصاد وخبراء الأمن . عارف طبعا ان مشروع زي ده محتاج سنين ، لكن ليه مانبدأش !!!!!!!!

اقتباس:

---

المشاركة الأصلية كتبت بواسطة mido51eg

والله كلام زي الفل. واضح ان الشعب كله محتاج تغيير لمفاهيمه . ليه مايتعملش مشروع قومي لإعادة بناء الإنسان المصري زي ما تفضل احد الخبراء واتكلم عن المشروع ده في بريد الأهرام من كام سنة ؟؟!!! مشروع يعمل عليه علماء الإجتماع وعلم النفس والأقتصاد وخبراء الأمن . عارف طبعا ان مشروع زي ده محتاج سنين ، لكن ليه مانبدأش !!!!!!!!

---

يا ريت
المعوق الرئيسي للمشروع هيكون الناس اللى تقولك يا عم انا فاهم كل حاجة وشوية فهلوة والدنيا تتظبط
انا ما قراتش المشروع للاسف
لكن مثلا ممكن سواق الميكروباص ياخد محاضرة فى سلوكيات المرور والتبعات القانونية قبل ما ياخد الرخصة
أصحاب كل مهنة ظباط، مدرسين، مهندسين، لازم يعملوا ميثاق شرف للمهنة دى بمساعدة خبراء فى الموضوع

موضوع جديد ورائع... وتجربة شرح أكثر من مبدعة

الأفة الحقيقية فى بلدنا و اللى عشانها بجد عملت الموضوع و السلسلة كلها ان شاء الله

السلبية وعدم الأكتراث بالغير

لازم المصيبة أو الكارثة تيجى على بابى و تخبط عشان أحس بغيرى أو أحس ببلدى

كانت من الحاجات اللى بتشلنى بصراحة أثناء الثورة و كشف فساد الداخلية و امن الدولة

ألالقى واحد جاى يسألنى و هو مش عاجبه اللى حصل

انتوا ليه زعلان من الداخلية و امن الدولة ....... هو عمر حد فيهم عملك حاجة ؟؟؟؟

هو لازم حد يعملى حاجة شخصيا و الألاف اللى اتعملهم دول مش بنى أدمين زينا

نفسى الناس تعرف ...... ان كلنا مضرورين و انها فعلا دائرة مغلقة أكثر مما يتصور البعض

فكرة رائعة و طرح اروع, و صورة واحدة حتى من صور الفساد يمكن مش كتير شايفينها , و لو كتير اخدوا بالهم من الصور التانية اللي هما عارفينها و ركزوا فيها اكتر , اكيد الوضع هايختلف

شكرا لكل من رد فى الموضوع ...... و أنا برفعه مرة أخيرة لزيادة الفائدة

شكرا جزيلا لحضرتك على الموضوع اللى زودلى معلومه جديده
الموضوع دا اكيد كلنا بنعانى منه كمان فى شغلنا
الضمير بقى مش موجود اللهم الا من رحم ربى

أنا كنت ومازلت مقتنع بالموضوع ده جدا
لدرجة إن وجهة الهجرة بقت للسويد و فنلندا بسبب الكلام ده
قبل ماالموضوع يقف

موضوع رائع
جزاك الله خيرآ

حقيقى آفة المجتمع المصرى هى "السلبية"

موضوع ممتاز ياباشا

شكرا ليك

كمل ربنا معاك ويارب منتوقفش بس لان الواحد اتخنق بجد

موضوع اكثر من رائع

و سبحان الله المفروض ان الدين الحنيف بيدفعنا لكده

قول المصطفى صلى الله عليه وسلم :

"مثل المؤمنين في توادهم وتراحمهم وتعاطفهم كمثل الجسد الواحد إذا أشتكى منه عضو تداعى له سائر الجسد بالسهر و الحمى "

ويقول صلى الله عليه وسلم: "المؤمن للمؤمن كالبنيان يشد بعضه بعضا وشبك بين أصابعه"

وقال صلى الله عليه وسلم: "المسلم أخو المسلم لا يظلمه ولا يسلمه ومن كـان في حاجة أخيه كان اللّه في حاجته، ومن فرج عن مسلم كربة فرج الله عنه كربة من كرب يوم القيامة ومن ستر مسلما ستره الله يوم القيامة",

وقال أيضا عليه الصلاة والسلام: "من نفس عن مؤمن كربة من كرب الدنيا نفس الله عنه كربة من كرب يوم القيامة ومن يسر على معسر يسر اللّه عليه في الدنيا والآخرة ومن ستر مسلما ستره اللّه في الدنيا والآخرة والله في عون العبد ما كان العبد في عون أخيه"


تقبل تحياتى

أول مرة أعرف الكلام دة ...شكراً

و عن الفساد

قال النبي صلى الله عليه وسلم :

(مثل القائم في حدود الله والواقع فيها كمثل قوم استهموا على سفينة فصار بعضهم اعلاها وبعضهم أسفلها، وكان الذين في أسفلها إذا استقوا من الماء مروراً على من فوقهم، فقالوا: لو أنا خرقنا في نصيبنا خرقاً ولم نؤذ من فوقنا ، فإذا تركوهم وما أرادو هلكوا جميعاً ، وإن أخذوا على أيديهم نجوا ونجوا جميعاً)

ممتااااااز
جزاك الله خيرا
:Bravo: