ليه قطع الغيار لأستيراد كالجديدة ؟؟؟؟

**ehab_mansour** · 26-10-2011 11:32 AM

انا كنت في ايطاليا من سنة بالضبط و فعلا العربيات هناك شكلها غير هنا خالص الأسباب :-
1- الصيانات دائما في مراكز خدمة محترمة و فنيين مدربين وحتي لو مش وكيل ولكنه مدرب ومعه كل العدد و الأجهزة اللازمة لصيانة السيارات (ياريت واحد يقلي فين مركز الصيانة او الميكانيكي او حتي التوكيل اللي مش بيفتي و يعك و فك وتركيب بأي حاجه و استخدام عدد في غير موضعها و مافيش أصلا العدد الصحيحة اللي بستخدم في السيارات ) انا نفسي رحت التوكيل و خرجت من عندهم بدون حل مشاكلي و بفتي للصبح و بمسامير ألانكيه قربت تبوظ لأن العدة نص كم
2- أسلوب القيادة و استخراج الرخص .. مافيش حاجه عندهم اسمها كوسة و تطلع رخصة بالفلوس و واحد يكسر عليك او عربية تدخل عكسي او عربية تتخطي غلط (ده اللي شفته بعيني )احترام غير عادي للبني أدم .. أماكن محددة للسيارات و ممرات أخري للعجل و الموتيسكلات و لما الاشارة بتقفل في اي اتجاه بتعدي العربيات الأول و بعدين بييجي وقت بيعدي البني أدمين و بعدين تفتح مش كله مع بعضه
ولو حصل وحبيت تعدي من مكان غير مخصص لذلك بتقفلك العربيات لوحدها من غير متشاور ولا تعرض نفسك ولا العربية للغلط
لو حصل و اوتوبيس نقل عام وقف في محطة كل العربيات بتقف وراه و محدش بيتخطي غلط أبدا ولا بيزمر
3- مافيش هناك تراب علي الرغم ان ايطاليا فيها أراضي رزاعية كتيرة جدا و كنت نازل في أطراف مدينة بارما والفندق اللي كنت فيه محاط من كل جانب بالأراضي الزراعية و الجو ممطر ومع ذلك تنتهي المياة علي الطريق نهائيا مع نهاية المطر ( يا ناس انا قعدت هناك اسبوعين جزمتي متوسختش لحد ما رجعت القاهرة بتلمع كما هي علي الرغم من اني مشيت كتيييييييير جدا علي رجلي )
4- مافيش هناك قلة ذوق :- يعني مافيش حد بيعقد علي عربية في الشارع ولا فيه طفل بيمسك مسمار و يتمشي يرسم علي عربيات الناس ولا واحد بيركن في مكان غلط كل شيء منظم و مرتب و معمول له حساب
5- المطبات هناك :- يوجد مطبات هناك ولكن مش زي الكباري المصغرة اللي عندنا دي ولكنه مطب طولي يعني طوله من 80 الي 1 متر و ارتفاعه من الأرض حوالي 6 الي 10 سم بالكتير اوي يعني ممكن تاخده بسرعه عادي من غير ميضرك و فيه علامات تحذيرية قبله و عند اي تقاطعات او ملفات او اشارات

6- قطع الغيار :- هناك قطع الغيار بتشتريها بالبارتنمر بتاعها من علي الانترنت او لما بتروح تعمل سيرفس هو بيحطهالك من عنده مع الصيانة و كلها قطع غيار أصلية تماما مافيش حاجه اسمها مضروبة و مافيش نصب زي هنا

في النهاية حابب أقلكم ان مشكلتنا الرئيسية هنا هي الأخلاق يعني هما هناك غير مسلمين يتخلقون بأخلاق المسلمين و نحن هنا مسلمون ولكن بدون أخلاق و ما أقصده هنا هي أخلاق المعاملات مع الناس

و علي فكرة العربيات هناك أساسا أسعارها رخيصة لأن فيه مثل اقتصادي بيقول ( الجنيه جنيه في بلده ) يعني هما هناك اليورو بالنسبة لهم زي الجنيه عندنا (كقيمة) لذلك انت لما تحب تشتري سيارة أوروبية في مصر تلاقيها دايما سعرها غالي جدا بالنسبة لنا ولكن هناك رخيصة او عادي لأنهم هما اللي بيصنعوها و بعملتهم اللي هيا 8 أضعاف عملتنا
وكمان قطع الغيار لو حبيت تشتري قطعة غيار اوروبية لسيارة اوروبية في مصر هتلاقي مثلا الكوبلن هناك ب 150 الي 200 يورو و ده سعر عادي بالنسبالهم شوف دي لما تيجي هنا و تتحول لعملتنا و نكسب فيها هتلاقي بقت ب 2000 جنيه و علي النقيض دول و صناعات و سيارات شرق أسيا و اللي هي عملتهم مش غالية و العمالة عندهم رخيصة و التصنيع و التكلفة و الخامات رخيصة تقوم تلاقي الكوبلن من عندهم يساوي 200 الي 300 جنيه طبعا فرق شاسع بين الاتنين في كل شيء

و الله الموفق ولو حد حابب أحكي كمان أحكي ولكن بتعب بصراحة و بزعل لما بفتكر الكلام ده لأن نحن الأولي بهذه الأخلاق و المعاملات لأنه من أساس ديننا
والله المستعان

**ashouhdy** · 26-10-2011 02:49 PM

ايهاب منصور

الله يسامحك يأخى

**ahmedsrs** · 26-10-2011 04:42 PM

مش كل العربيات عندهم كده دى العربيات المتصانة لكن العربيات الى نص نص او متبهدلة بتترمى فى ساحات الخردة وطبعا فى مصر مفيش ساحات خردة لان العربيات الخردة ماشية عادى فى الشوارع

**Ahmed Nasser** · 26-10-2011 07:19 PM

تجريبتى فى النوبيرا 1
العربية عن طريق المعاقين باسم والدى من بورسعيد
العربية موديل 1997 عاملة 113000 فبريكة بالكامل
تركبها تقول عاملة 1000 ولا 2000 كيلو

**ehab_mansour** · 27-10-2011 09:29 AM

المشاركة الأصلية كتبت بواسطة ashouhdy

ايهاب منصور

الله يسامحك يأخى

ليه بس يا دكتور أحمد ؟؟؟؟؟؟؟
ربنا يسامحنا جميعا لكن صدقني انا رجعت من هناك قعدت فترة بحاول أمشي زي هناك و أحترم كل شيء لقيتني بتبهدل في الشارع و بيتلطشلي من كل مخاليق ربنا اللي ماشية في الشارع !!!!!!!!
قلت يعم كبر دماغك و خليك زي بقيت الخلق و خلاص ولكن صدقني لما بمشي في مكان و ألاقي حد بيحترم الطريق بحترمه جدا و بحييه علي ذلك لأنه صبووووووووووووور جدا وربنا يكرمه

و صدقني احنا فقط ينقصنا الأخلاق و بس احنا شعب متدين و فطرته سليمة و محترم جدا ولكن محتاجين نفعل أخلاق الاحترام المتبادل و احترام حقوق الأخرين و احترام حق الشارع اللي هو ملك للجميع و ليس ملكي ولا ملك أحد
و ينقصنا أيضا ان نقيم العدل بيننا و ان تقيم فينا حكامنا العدل و المساواه

" ربك بيقيم دولة العدل ولو كانت كافرة و بيسقط دولة الظلم ولو كانت مسلمة "
الهم وحد صفوفنا و ارزقنا الحكام الصالحين و جنبنا الفتن ما ظهر منها و ما بطن