عايزة عمرة او نص عمرة ربنا يستر :(

**egy_3assy** · 26-10-2011 03:41 PM

ياجماعة ياريت لو حد مر بالموضوع ده يفيدني بخبرته وتجربته فالمجال ده ... اولآ انا معايا فورد اسكورت 1998 موتور 1300 سي سي العربية فيها بوجيه واحد بييجي علي سن الشمعة بتاعته زيت وبيخلي العربية تمشي علي تلاته بس واول ما اغيره تمشي كويس روحت للميكانيكي قالي محتاجة طقم شنبر نصف عمره ,, السؤال لو سمحتم تكاليفها قد اية الاسعار, وتاخد وقت فالتركيب قد ايه ,وهل لو حد عملها يرشدني عربيته عامله اية معاه بعد تغير طقم الشنبر والف شكر مقدمآ واسف للاطالة

**mido51eg** · 26-10-2011 03:46 PM

الأول الميكانيكي جرب يركب بوجيهات سن قصير ؟ ده اول اجراء بيتم قبل الدخول في قصة الشنبر والعمرة.

**aYaBooY** · 26-10-2011 03:50 PM

بما انها وصلت لموضوع زيت على البوجيه ( رغم اني اعرف ان البوجيهات الاصلية ليها نظام تسخين بيحرق الزيت )
يبقي مفيش مفر يعني السن قصير هايمش وقت قليل قوي و كذلك موضوع كرسي بوجيه
بس انصحك ولا نص عمرة و عمرة و نص
هات موتور تاني

**mido51eg** · 26-10-2011 03:53 PM

عاوز اسألك سؤال ياجوزيف .... هي لسه فيه عربيات اسكورت وفيستا بره وبتتقطع وبتيجي لنا ؟

**aYaBooY** · 26-10-2011 04:40 PM

الفورد منتشر جدا في اوروبا و تقريبا ليهم في كل بلد مصنع معنى كدة ان المبيعات تسمح بكدة و إلا ليه
في روسيا البيضاء و المانيا و فرنسا و اسبانيا و البرتغال و انجلترا و إيطاليا بس الاخيرة فيها مصانع قطع غيار مشابهه من كتر ما الفيستا مثلا هيا سيارة الشباب زي الـ 128 عندنا
حاجة تانية لو فرضنا ان كل البلاد ديه فيها انت الوحيد تقريبا الي بيشترى المستعمل منهم
علشان عندك السعودية مبيتعملوش غير في العربيات الامريكاني الكبيرة و مفيش اسكورت و فيستا تقريبا
و عندك الخليج كله كدة طيب الناحية التانية ليبيا و دول بشوات معتقدش انهم بيشتروا مستعمل اصلا غير كدة
تعاملهم كله مع الفولكس و الاودي و البي ام و المرسيدس و التيوتات بكل اشكالها و فيه عداء شديد للسيارات الفورد و الشيفورليه و باقي الماركات الامريكية
نيجي للجزائر و تونس و المغرب معرفش عنهم حاجة
و دول افريقيا كل العربيات عندهم سولار و نادرا ما بتلاقي عربية بنزين
و طبعا احنا بنقسم العربية الي بتيجي من بره على 10 عربيات عندنا
فاعتقد انه لسة فيه عربيات بتتقطع و الدليل انك لما تنزل الحرفيين كتير بتلاقي انصاص كاملة
بموتورها و سلاطتها و باباغنوجها

**aYaBooY** · 26-10-2011 04:47 PM

بس تيجي مثلا تطبق نفس الموضوع على قطع غيار عربية زي الـ 128 انتاجها في اوروبا اتوقف تقريبا سنة 74 و فضل عندنا و في دول شرق اوروبا الي هما اصلا افقر مننا و برده وقفوا انتاجها في 85 تقريبا و احنا كملنا و تيجي تسال على قطع استيراد منها هيا ديه الي تقول عليها ازاي
لكن معانا العربيات انتجت سنة 97 يعني من حوالى 14 سنة نقول مشيت عندهم 9 سنين و اتباعت للمقابر و عقبال ما تتقطع و تتبعت هنا و تتفصص عندنا و يجي مشتيرى ليها اعتقد برده يا دوب كدة

**egytamer** · 26-10-2011 06:47 PM

اعتقد المتور ال 1300 سهل يتعملو نص عمرة فجرب وروح لميكانيكي كويس.

**egy_3assy** · 27-10-2011 10:22 AM

انا ركبت سن قصير بقالي يومين اهو وماشية كويس لغاية دلوقتي ... قدامي اسبوعين كدة لغاية بعد العيد ...

يا ayaboody المشكلة عشان اجيب موتور جديد هدخل في 3 او 4 الاف بلبل و دة طبعا مستحيل في الوقت الحالي بما اني داخل على تجهيز شقتي عشان اتجوز بقا .. و موضوع الموتور الجديد احنا متفقين انو زي البطيخة ممكن يبقي كويس قوي او يبقي زي اللي عندي و نبقي معملناش حاجة غير تكاليف زيادة .. الموتور اللي عندي انا شايفة كويس بس محتاج اهتمام .. الخروف اللي كان راكب العربية دي كان معزبها والله اعلم كان بيحط بنزين 80 ولا اية .. المهم انا هشوف واتابع معاكو بس والنبي يا رجالة خليكو معايا خطوة بخطوة عشان انا لانج و هيتعمل عليا شغل اصلي .. انا محتاج حد فاهم عشان يقيم اللي هيحصل معايا واحدة بواحدة و يقولي كدة صح ولا في حاجة مش تمام او بيتعمل عليا نصباية في الفلوس و كدة . وعلي العموم انا هكتب يوميا اللي بيحصل عشان تبقو معايا في الصورة و هحاول ارفع الصور ان شاء الله.

**aYaBooY** · 27-10-2011 11:56 AM

موتور استيراد 1300 في حدود 2000 جنيه و مصنعية تركيب 600 جنيه و المفروض تقاول الميكانيكي انه يروح يشتريه و يكون هو المسؤول لو طلع خفيف بيتغير و معاك حوالى اسبوعين تجربة
العمرة بقي علشان تبقي ماشي مطمن بيها هاتحتاج تغير شوية حاجات حتى لو مش محتاجة
عندك طقم جوان علوي و طقم جوان سفلى ( ادخل اهم مواضيع القسم فيه موضوع عن قطع الغيار و كان حد كاتب الخامات كلها بالاسعار )و جوان وش و طقم شنبر و مصنعية خراط بلوك و مصنعية خراط وش و مصنعية خراط كرنك و بعد كل ده غلطة في التليين او ان العربية تسخن زيادة شوية في فترة التليين يبقي كل ده كلاكيت تاني
يا سيد عاصي انت مش محترف سواقة و اكيد ملينتش قبل كدة و اكيد معندكش حساسية السواقة المطلوبة في التليين ( و على فكرة اغلب الي بشوفهم بيلينوا العربية كويس كان معاهم فيات زمان و اتعلموا فيها الموضوع كويس ) فطبعا منصحكش تتعلم في فورد
يعني جنب تمن العمرة حط احتمال انها تطلع مش مظبوطة و تتعاد تاني و جنب تمن تغيير الموتور حط تمن مصنعية تغيرة تاني بس
يعني العمرة نقول في حدود 2500 و لو اقل من كدة يبقي انت جايب جوانات و كمليات و قطع غيار مش اصلية فيه احتمال تتعاد تاني يعني 2500 تاني
الموتور ( كنت سالت عليه من فترة لمحمود ابو زيد ) عند اوتوستار الموتور الـ 1300 بالفتيس 3000 يعني من غير الفتيس 2000 مثلا و نشوف يشيل منه كاربراتير و شوية الحاجات ديه ممكن يقع اقل و تركيب موتور 500 او 600 مصنيعة بالتيبس يعني اجمالى 2500 برده طيب لو طلع موتور تعبان يبقي حضرتك هاتفكة و تجيب موتور تاني

**egy_3assy** · 27-10-2011 05:35 PM

ممممم .. مش عارف والله انا مدايق جدا من الموضوع وحاسس ان فية نحس .. عموما انا بفكر في حاجة تانية خالص انهاردة .. هي اني ادورلها على بيعة و اوصي الميكانيكي يشوفلي فيستا و اهي عربية كويسة و حلوة او اتجة للويرا او السويفت .. مش عارف اضايقت من اللتلبيسة اللي حصلتلي دي و في نفس الوقت بفكر لو بعت اجيب اسكورت تاني بس 1600 او زد تك. حد عندو اقتراحات بالنسبة للكلام دة ؟؟

الموضوع: عايزة عمرة او نص عمرة ربنا يستر :(

LinkBack

أدوات الموضوع

عرض

-

-

-

-

-

-

-

المواضيع المتشابهه

مش عارف الفليشيا عايزة عمرة ولا لا

مساعدة عاجلة جدا : أوماترا بتقول السيينـــــا عايزة عمرة وبكام ؟؟؟؟

الاضافات السائله لرفع كفائة المحرك او عمل عمرة اونصف عمرة

نص عمرة ولا استنى و أعمل عمرة كاملة

عمرة كاملة - نصف عمرة - أم تغيير ما هو تالف فقط؟

الكلمات الدلالية لهذا الموضوع

المفضلات

المفضلات

ضوابط المشاركة