العربية بتقطع...

**tabeb** · 26-10-2011 04:42 PM

عملتها معايا العربية
كنت رايح الشغل علي الساعة 8 الصبح ولقيتها مرة واحدة بتنتش وراحت واقفة
احايل فيها المارش بيقوم بس مش بتدور كأنها مفيهاش بنزين
المهم ركنت و سبتها 10 دقايق ودورت دارت ومشيت معايا 200 متر زي الفل
ورجعت قطعت تاني
سبتها شوية دارت وبقت زي الفل
خلصت الشغل ورجعت بيها زي الفل ولا الهوا
رحت للميكانيكي غيرلي فلتر البنزين ولقاه مسدود
شيك علي طقم الكهربا وغيرناه بالمرة
العربية بعد كده مشيت كويس والسحب اتحسن
دلوقتي بقي هل العيب كان في الفلتر ولا ممكن تكون الطرمبة؟
وهل لازم اغيرها
علما بان العربية بتغيب في الدوارة ولازم اديها سنة بنزين عشان تقوم الصبح بس الكلام ده من زمان ومش جديد واعتقد كل العربيات القديمة كده
خايف لتعملها معايا تاني في منطقة فاضية خصوصا اني ساعات بسافر بيها
العربية 131
بحطلها بنزين 80

**mido51eg** · 26-10-2011 05:33 PM

هو واضح كده ان العيب كان من فلتر البنزين. مشكلة غياب الدوارة الصبح برغم انك مغير طقم الكهربا ده بسبب البنزين الـ 80 اللي بتحطه.

**mido51eg** · 26-10-2011 05:38 PM

آه نسيت اقولك ان فيه حاجة في الكربراتير اسمها كاوتشة الرداخ ... او كاوتشة مفاجئ السرعة ... الكاوتشة دي فائدتها انها بتحجز شوية بنزين في الكربراتير علشان الدوارة الصبح وكمان علشان لو دوست بنزين بشكل مفاجئ العربية تسحب معاك على طول. الكاوتشة دي لو ناشفة يبقى مفيش بنزين محجوز للدوارة الصبح (تضطر تديها سنة البنزين برجلك) وكمان لما تدوس بنزين وانت ماشي بشكل مفاجئ العربية تنتش نتشة واحدة وبعدين تسحب. لو عندك الأعراض دي غير كاوتشة الرداخ.