احذروا سرقه الموبايل وانت سايق في الزحمه
السلام عليكم ياشباب اجمل منتدى
انا شفت انهارده موقف قلت لازم احكيهلكم وانبهكم منه:frown:
انهارده كنت عالدائري حوالي الساعه 1 الظهر والطريق كان واقف عند نزله مسطرد ببص في المرايه لاقيت اربع شباب شكلهم بلطجيه عمالين يلفو وسط العربيات ويبصو عاللي راكبين فيها وطبعا بيصطادوا اللي بيبقى لوحده المهم عدا اثنين منهم جنبي وبصوا جوا العربيه قوي طبعا انا قلقت وقفلت الزجاج على طول.
المهم العربيه اللي قدامي صاحبها كان بيتكلم في الموبايل وحاطه على ودنه الشمال يعني ناحيه الشباك والشباك مفتوح ودول عدوا من جنبه وشافوه قامو راجعين تاني وواحد راح عند الباب اليمين وقام فاتحه الراجل اتخض طبعا:eek:
والثاني قام جاي في ثانيه خطف الموبايل واختفي واللي فتح الباب اختفى هو كمان طبعا معظم العربيات شافت المنظر وكله قفل الزجاج وقلق..
اخيرا ربنا يسترها معانا جميعا ويعدي الأيام دي على خير.:H_angry[1]:
اسف عالأطاله بس النصيحه واجبه واحنا هنا اخوات وبنفيد بعض باللي نقدر عليه وخلو بالكو من نفسكوا....ربنا يحرسنا